BVÜKESHHU 2
2
Mosa Kepvügha
1Tsü tsü wi Levi mizza wi anyi kesü ma ketanla ma mizza wi nza kesü yaya, 2#Kek 7.20; Ibr 11.23. nu nzawa na atsa kesü pvügha pi ma cü. Nzawa na meme tsüna atsimehaitsü mukeya wi ma asha kecheng ma pi kuthi. 3Isala ma atsawa pi kuthi meyala kesa wi ashijü kesü khuya nu atssü ya ndu thsüle kesalina anie pi zenbhonya. Nu ma memewa pi tsü non wi chiya nu pie wa aghaku katen wi ahuphon jawi chia. 4Memewa tssüggüwa na alen kesie wi ben nu memewa tsüna khati saaten nu kesa ghangben.
5Kadingawa na aghaku wi atssükizü le dugho nu ma maghalethu na aghüsa wi keqoe den. Ma ashijü kesü na ahuphon jawi keben muya, nu ma maghale kesü kesun pi wa tsü sengho thsü. 6Kadingawa na tsü lishi wa nan meme npvüza kesü muya. Memewa na qai keben ghena kadingawa na ma tizenya nu khi, “Ha Ibri nyi meme kesüdha.” 7Memewa tssüggüwa na wala kadingawa wi keü, “Hi wa Ibri nza kesü cichi nu memewa ha ghanja pi no cü thsüla?”
8Ma khineng, “Anlo.” Tsalina ghalawa na wa memewa jja tsü ci sengho. 9Kadingawa na nzawa wi kiza, “Meme ha ssi wa ghanja pi hi cülo, hi nkutimen sapi no cüben.” Tsalina nzawa na memewa tsü pie wa noncca wa. 10#Kek 7.21. Ghanyiwa na zügü keshagha seng wi nzawa na ma ssinu kadingawa wi wa, nu ma kadinga tsa sa wa. Kadingawa na ma ketanla ma wi khi, “Hi atssü wina ma zanshikeya ghena ma nyan pi Mosa#2.10: Mosa: Anyan hawa ha Ibri jüh wina “zanshiya” ciden.”
Mosa na Midia wi Bvüwa kesa
11 #
Kek 7.23-28. #Ibr 11.24. Mosa na qhai keshagha seng wi ma nyi Ibri nyithu hhainan wa nan mathu meten pi kekuli kekhang sa thsü keben muya. Ejipt nyi kesü na Ibri nyi kesü, tsüna Mosa nyi, pathi keben la muya. 12Mosa na ghang kevüli chi nan anyi kesütanla ciwi keben nmu, tsalina ma Ejipt nyi tsü pathi nu ma kamang pi ahachan non wi kuthia. 13Ma dhitsüwa wi ciwi wa nan Ibri nyi keni na kesali keben muya. Ma meshu kesü sazzi kebenwa wi tsü khi, “Mangkesa na no ketanla no Ibri nyi kiccü ben nu?” 14Anyi tsüwa na khineng, “Thowa na no pi ishinyi miwi kediwa nu kaghanwa sa thsü nu? No Ejipt nyiwa pathi kesa tsüti hi la pathia le ben kwe?” Tsaseng wi Mosa na messi nu ma ketanla ma wi khi, “Hi kekuli tsü nyu na chüyadha.” 15-16Kadimiwa na mangwa khati sadha khe chükeya wi ma Mosa pathiale sa, isala Mosa na bvü wa Midia yyi wi hang wa.
Ghanan kesü Mosa na atssükhang kete wi donki keben Midia wi keqhaikediwa Jethro nga tagü na atssü de pi mathu ba khaghaneni nu anenithu khu wi chile gho. 17Isala anenikehiethu pahan na gho Jethro ngathu tsü jügü zighe. Mosa na wa mathu sheipiya nu atssü pi mathu sahangthu la jjüya thsüa. 18Mathu kheneng mathu ba wi gho nu ma mathu wi keü, “Nthu mangkesa na nansü shishi ghodha nu?” 19Mathu luneng, “Ejipt nyi kesü na anenikehiethu kwen wina ikhang bisha cü nu atssü de pi ikhang cü nu pi ikhang sahangthu la jjüya thsüle.”
20Ma ma ngathu wi keü, “Ma khiewa ben nu? Nthu mangkesa na ciwi ma teshi nu? Wa ma ci sengho ikhang gweghe anün dsa thsülo.”
21Tsalina Mosa na ciwi hangle cenya, nu Jethro na ma nga Zippora pi ma wubvü sa thsü, 22nzawa na atsa kesü pvügha pi ma cü. Mosa na ma ketanla ma wi khi, “Hi ayyi hewi asang saben, tsalina ma nyan pi Gershon #2.22: Gershon: Anyan hawa ha Ibri jüh wina “asang” ciden.”
23Amapi pahan seng wi Ejipt kadimiwa na shüa, isala Israel nyithu na mathu nssümagha kesa wi ghadhi nu kekiqa ghena qaiben. Mathu kiqai hhai na wa Anyiza cuya. 24#Ade 15.13,14. Anyiza na mathu kiqai hhai tsü zakeya wi ma Abraham, Isak, nu Jakob ssinu cenkethenjüh tsü meshenya. 25Anyiza na Israel nyithu nssümagha sa keben tsü mu nu mathu cüki meshenben.
Currently Selected:
BVÜKESHHU 2: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.