BVÜKESHHU 6
6
1Apvüwa na Mosa wi khi, “Hi khili kadimiwa miwi mangwa sa chiten khe no muyaben. Hi ma meten pi inyithu ya bvü thsüaben. Hi ma meten pi ma yyi wina mathu jügüshiaben.”
Anyiza na Mosa keci
2 #
Ade 17.1; 28.3; 35.11; Bvü 3.13-15. Anyiza na Mosa ccüneng nu khi, “Hi Apvüwa. 3Hi Kekhang ntsawa Nyiza sala Abraham, Isak, nu Jakob tuwi gho, isala inyan kemetha Apvüwa#6.3: Apvüwa: 3.14 wi ghangchi. Ibri jüh wi tsüna Yahweh, tsüti zhükemili pi Jehovah satheng, ha zhükemilikechi na kezhüketiwa wi APVÜWA saben. le tsüpi mathu nchü thsü. 4Hi mathu ssinu cenkethenjüh sa, nu mathu na asangthu sala kahang yyi Kanaan yyiwa tsü la pi mathu cüle ijüh khuchidha. 5Hi khili Israel nyithu na Ejipt nyithu nssümagha sala ghadhi keben zayadha, nu hi cenkethenjühwa tsü meshenben. 6Tsalina Israel nyithu wi hi mathu wi khiben le kizalo, ‘Hi Apvüwa, hi nthu khushiya nu Ejipt nyithu kwen wi nssümagha sa keben wi nthu lishachi cüaben. Hi kekhang kwen na kemeten-kemesha qhethiketen kesa sengho mathu miwi chi nu nthu hangshaya ben. 7Nthu pi inyi saya nu hi nthu Nyiza saben. Hi Ejipt wi nthu nyu nssümagha sa keben wina nthu lishachi cü lethu nthu na hi Apvüwa nthu Nyiza kesa chüyaben. 8Hi nthu ssi wa ayyi pi Abraham, Isak, nu Jakob cüle khishi ketheng witsü chicü nu tsüpi nthu ji saya thsüaben. Hi Apvüwa le.’ ” 9Mosa na ha khipi Israel nyithu kiza, isala mathu na ma jüh nkina, kepaghenanye mathu nyu nssümagha kesa wi agüccü ntsa sa nu accükwenshü kesalina.
10Tsaseng wi Apvüwa na Mosa wi kiza, 11“Wala Ejipt kadimiwa wi ma yyi wina Israel nyithu ya bvü thsü nsathu yishü le kiza chilo.”
12Tsalina Mosa na khineng, “Israel nyithu cükhala ijüh nkina lethu khatinu kadimiwa na ijüh kinaya mehai nu? Hi ajühkhi kemehai nyi nye le.”
13Apvüwa na Mosa nu Aaron manyi kizachi, “Wala Israel nyithu nu Ejipt kadimiwa wi kiza chilo, hi nshinyi kesun pi Ejipt wina Israel nyithu ssishhu thsüaden.”
Mosa nu Aaron Theghi cüki
14Jakob tsa tssütsewa Reuben na atsa mejü ben: Hanok, Pallu, Hezron, nu Karmi; mathu mizza pi mathu myi nyan ci. 15Simeon na atsa tugho ben: Jemuel, Jamin, Ohad, Jacin, Zohar, nu Kanaan nyi wubvü tsawa Shaul; mathu mizza pi mathu myi nyan ci. 16#Scs 3.17-20; 26.57,58; 1 Kc 6.16-19. Levi na atsa kecheng ben: Gershon, Kohath, ni Mirari; mathu mizza pi mathu myi nyan ci. Levi na amapi 137 hang. 17Gershon na atsa keni ben: Libni nu Shimei, nu manyi na atsanga kejon ben. 18Kohath na atsa mejü ben: Amram, Izhar, Hebron, nu Uzziel. Kohath na amapi 133 hang. 19Mirari na atsa keni ben: Mahli, nu Mushi. Hathu hana Levi shi wina keshhugho nu mathu shicüthu.
20Amram na ma ba tssüggüwa Jokhebed yaya nu ma Aaron nu Mosa manyi pvügha cü. Amram na amapi 137 hang. 21Izhar na atsa kecheng ben: Kora, Nefeg, nu Zikrei. 22Uzziel la atsa kecheng ben: Mishael, Elzafan, nu Sithri.
23Aaron na Amminadab nga Nashon tssüggüwa Elisheba yaya nu ma Nadab, Abihu, Eleazar, nu Ithamar, pvügha cü. 24Kohath na atsa kecheng ben: Assir, Elkana, nu Abisaf: mathu na Kora shi kegishü pahan baqhaithu. 25Aaron tsa Eleazar na Puthiel nga kesü yaya nu ma Fineha pvügha cü. Hathu hana Levi mizza nu mathu shi wi alikesathu.
26Aaron nu Mosa manyi wi Apvüwa na hati khi, “Israel mizzathu tsü Ejipt wina ssinu shhulo.” 27Manyi na Ejipt kadimiwa wi Israel nyithu lisha chi cülo kiza.
Apvüwa na Ahza Pi Mosa nu Aaron Manyi cü
28Apvüwa na Ejipt yyi wi Mosa keccüneng wi 29ma khi, “Hi Apvüwa. Hi pi no kekiza tsüdi khi pi Ejipt kadimiwa kizalo.”
30Isala Mosa na khineng, “Hi ajühkhi kemehai nyi nye kesa tsü no chüben; isathu khatinu kadimiwa na ijüh kinaya mehai nu?”
Currently Selected:
BVÜKESHHU 6: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
