BINZEN 34
34
Dinah Nrhukela
1Khenyüme Jakob lope Leah au nyugi Dinah le Kanan nyu tenunyu ju shwishü titse gü. 2Laryü Hivite nyu raja Hamor nyugü Shekim le a-süo zenzhüla. 3Ai a-le lünyu tsügi shwi akenyü sa-o tsügi so lo no a-shwi a-kenyü lo nrün ndabin. 4Tson-o a-pvü ka, “Lünyu higi lope ano anu thyülo,” tsonshü.
5Jakob le a-nyugi nrhukela rüla shala, ai a-nyu peche jule a-senru zen-o loki kehü genyu, anyugun le ryü kemvu ka a-le thame thyü mvubin. 6Shekim a-pvü Hamor le Jakob nthon shü ti tse chwiryü, 7tsüka Jakob nyu peche ju le loki hüo ryüjü. A-nyugun le tsü rüla nyükelo ka, Shekim le Jakob nyugi nrhuo Israel temi dan nshwe kela genyu anyu kerü lo nyunta sala. 8Hamor le a-ka, “Anyugü Shekim le nnyugi zen keso hünyo, tsügenyu nnyugi no a-zen bin ta. 9Agun temi lo ntemi jaka kelo kethyü no bin titse nhi kejozen tile. 10Tson-o hagun no akazü nyu agun zen bin ti, nle lika hika-e nkenyü ka bin, nkeshathyü hathyü lo nhon no bin lo.”
11Shekim le Dinah a-pvü lo a-tsünyu juka, “Akenyü kon higü hi thyüshülo, hagun le nyu hiyo ale tsü khipe hagun tsüti. 12Jwe nyu lonyü bin yo, lo temi dikho tetso nyübin yo aka zoshü lo, hagun le a-lope akashü tiya tse kethyü we hagun le nyu hiyo ale tsüpe hagun tsüti le.”
13Shekim le anyugun lügi Dinah nrhukela genyu Jakob nyudan le Shekim lo a-pvü Hamor au sala. 14Anyugun le, “Agun le agun lügi pe temi a-girü kemvu nyu ka kalu lo nrün ndi, tsüle agun genyu kezhakepfü nmeso. 15Hagun le agun hontse peche aphu a-girü laya tselo ngun kerhün logwa. 16Tsonya tselo ngun khinyu nyu kelo kethyü agun kenda ti. Agun le hagun dan nyu bin-o hagun zan kemethyü tin lati. 17Ai hagunle agun jotsü then-o hagun girü lakemvu we agun le agun lügi zen-o tin lati.”
18Jo hile Hamor lo a-nyugü Shekim au kenyü la; 19tsüselo ponyu gü le Jakob nyugi zen keso kebin laryü nyuthyü lotse shüyo ntsü lamvu. A-le anyugun kaminyu a-kentsen tsingü thyü bin.
20Hamor lo a-nyugü Shekim au le nyida gü chwida ka kenthon bin kagü anyugun temi dan ka zoshü. 21“Temi hidan le nzen kengü gwa gwenzin; anyugun no nkazü nyu bin-o a-keshathyü hakonhalü thyülo. Kazü gü le anyugun genyu ai nmhun sa bin nyo. Ngun anyugun nyugi lo lo ngun nyugi pe anyugun ka kalu shü tse tile. 22Ai temi hidan le ngun le anyugun hontse peche aphu a-girü la kemvu we ndan nyu yhun-o nzen kengü nme thyü lomvu letse bin nyo. 23Anyugun senru lo anyugun hon kebin lihi-e pe nhon thyümvu la ti ole? Tsügenyu no ndan nyu yhunlo nrün genyu anyugun zen kejozen lo tile.” 24Nyida günyu phenyü nyu aphu Hamor lope Shekim au le nyuzoshü yo tsüle a-kenda küla, tson-o pechenyu aphu a-girü küla.
25Jonshen siki temi dan le a-gikerü le thyü kebin ka Jakob nyu Dinah tsügü Simeon lope Levi au le au jenthon khilo-o nyida günyu yügü mele rüchünmvu kebin ka pechenyu aphu dushvu küla. 26Hamor lope anyugü Shekim au ko sin dushvula. Tson-o Shekim kanyu Dinah zen tinla. 27Jakob nyu dan le anyugun lügi no tetsin pfü kela khünzo-o temi dan dushvukela siki rünyi gü nyu kanyü dan khilo la. 28Anyugun le tanyü, methu, gada, lo kecha lihi le rünyi nyu lo tehen ki kebin aphu hü lola. 29Tson-o anyugun kanyu kebin kanyü miketsen lo tenunyu lo ntsenyu aphu tenzen tinla. 30Jakob le Simeon lo Levi au ka, “Hai le kevü hü süpe age shü laso; tsüselo Kanan nyu Periznyu lo kazü gü nyu kebin aphu ashwintsü kelai so. Ale temi chonmvu; tsügenyu anyugun le kengü kerhün ryüo awhe yatselo, nkaminyu apentha nke kelaiso.”
31Ai anyugun le, “A-no agun lügi lope keyüla chüntyü kehü nme hontse lo kemvui le.” tsonla.
Currently Selected:
BINZEN 34: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
