BINZEN 33
33
Jakob le Esau Keteno
1Jakob le, Esau le a-temi tsizi zen-o ryü kejü hyu shüo ntsenyu dan kenjün kho pe Leah, Rachel lo a-thünu hvu tsü la. 2A-le thenu hvu lo au nyenyu dan no rilo, tsüsika Leah lo a-nyenyu dan tson-o Rachel lope Josef au no kenkhin thyülo. 3Jakob le anyugun mhundyü rio gwen tsenyü ge kazü nyu nkhün tsüo a-tsagü kho nni gü. 4Ai Esau le tinryü a-teno-o, a-gwenlo njüo a-nboshüo au mihvu nren chü sola. 5Esau le au khoka tenunyu lo ntsenyu dan nrishüo, “Nzen kehü hile dikipon nyula? tson ketsoshü.” Tsontsin Jakob le, “Sunggigü le shwikenjün nyu khipe a ketsü ntsenyu dan le.” 6Tson-o thenugi hvu le au nyenyu dan zen nsin ryü-o nkhün a-kelushü. 7Tsüsika Leah lo a-nyenyu dan lo kenkhin tsin ki Rachel lo Josef au le nsinryü nkhün-o a-kelushü.
8Esau le, “Ale teno kela dan kecha gü tsüle ntsekethyü la? Tsüle nyu genyu la?”
Tsontsin Jakob le, “Tsüle nsopfülo nrün genyu le,” tsonshü.
9Ai Esau le, “Ako kechon le bin nle, asikezen gü, nhon tsü nle lota.”
10Tsontsin Jakob le, “Nmvu, ncheno-e, nle ashwi njün yatselo ajwe khilo. A genyu nmhun kehyu le Sunggigü mhun kehyu hontse le, nle a shwi njüo azen lo laso. 11Ncheno-e ale senryü nketsü a jwe hi khilo lo; Sunggigü le aso njün-o ale sen mvulo keshvu lihi-e pe atsü laso.” A-le lolo kemvuthen Jakob le tenge tse lola.
12Esau le, “Ngun gwen nda lo njüo tsonchü shü je. Ale hagun mhundyü ri gü tile.”
13Jakob le, “Ntsenyu ju le bwerizun lo senru anyu kezen dan hi khenyüme jon-e hü ketsun shülo sikü lalo gwa, ale hidan phin rüchün mvulo keshvu le. 14Tsügenyu nle amhundyü ri gun tselo, lo ale senru dan lo ntsenyu ju zen-o nmhelo kegwathen nmhe nthen ashvuthyü Edom ki ryü tile.”
15Esau le, “Tsonlo ale atemi peha khepe no hagun zen bin tile.”
Ai Jakob le, “Ale nso pfülo kenyü genyu nti a-me tsühontse mvue gwale,” tsonla. 16Tson-o tsünyü Esau le ranio Edom ki gunla. 17Ai Jakob le Sukkoth ki gü a-ka nme thyülo lo a-senru dan genyu thenpon thyülo. Tsügenyu bin tsügü zan pe Sukkoth tse tholo.
18Jakob le Mesopotamia ki hüo rani keryü ka kenshvu teno mvutse ryü Kanan kazü Shekim nyida tilo njüo nyida gü khoka lobu nme nyu a-kensenbin thyülo. 19A-le raka tsime pe Shekim a-pvü Hamor tsipwen dan ka lobu tsügü peha heilo. 20Tson-o tsüka kershvubin nme thyüshüo El-Elohe-Israel tse tholo.
Currently Selected:
BINZEN 33: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
