BINZEN 32
32
Jakob le Esau teno titse gwendo kelo
1Jakob le a-tson nyu gun kejü ka tsanggelonyu peha le a-teno. 2A-le tsüdan hyu keshüka, “Hile Sunggigü kensenbin laso,” tson-o bin tsüpe Mahanaim tse kolo.
3Jakob le jolonyu nipe a-mhundyü rio Edom kazü Sier nyu kebin a-tsagü Esau kishü. 4Anyugun no, “Njozenkehü ngogü Jakob le, ale Laban zen hü tinlao ntsokanyu hü nle tse a npugü Esau ka zoshülo. 5Ale methu, gada, tanyü, tenyü lo gonyu le bin laso. Kedagü, ano nyhühyu ka nsopfülo nda tson hü nle,” tson shülo.
6Lo lonyu dan le Jakob ki raniryüo, “Agun le ntsagü Esau ki gü, lo a-le nteno titse ryüjü nle. A-le temi tsizi zen hü nyo.” 7Tsontsin Jakob le nshvu lo a-shese sala. A-le temi a-zenkehü dan, a-tanyü, tenyü, methu lo ut dan ko tse kenjün pe dan hvu thyülo. 8A-le rüchün-o, “keshanyu laka Esau le ryü a-dan kerigü when ryülo, kecha güno tinlo ti.”
9Tson-o Jakob le kehithyüo, “Abon Abraham Sunggigü lo apvü Isak Sunggigü a kehi nyü shüta! Nle ano ranio a kazü lo ashvunye ki gun lo agenyu tha lihi-e kegwa ndo shüti tse aka zokeshü Npugü. 10Ale nshwikenjün lo nkentsen kenjü nle pe ngo gü tesha keshü tsü hyulo kümvule. Ale athün nme nyeki thame sen mvutse Jordan pfüthü gun, ai ntso ka we danhvu thyü rani ryü jünyo. 11A tsagü Esau ben nyu akenishü ta. Ale nshvu bin nyo- a-le ryü agun when-o tenunyu lo ntsenyu-e pe agun aphu sin nkekela nshvu bin nle. 12Nle agenyu tha lihi-e kegwa thyüshü ti lo a tsipwen no temi nme swülo bukeho züda seka hachon hontse shüti tse zo kenjü rüchün shülo.”
13-15Tsüje tsünyu bin tse njüo, Jakob le jwe thyü pe atsagü Esau tsü nrün genyu asenru kejülo: tenyü lü tsihvu lo tse nki, tanyü lü tsihvu lo tse nki, ut a-nyüzü kethün a-nyu kezen shenryü, methu pvü henzi lo tse tseryü, gada lü nki lo tse tseryü. 16A-le tsü pe a-dün kechacha thyüo a-gonyu nme no dan meme ntsenlo. A-le anyugun ka, “Amhundyü ri gunlo, dan me lo tsüsigü au kekhoni nya.” 17A-le go kerigü ka, “Atsagü Esau le nteno lo-o nka, ‘N npugü le següla? Nle diki gü jü nla? Nmhundyü ka kebin nyukhu hile segü hon la?’ tse ketso shülo, 18nle a-ka, ‘Hile ngogü Jakob hon le. A-le hi nipe a-npugü Esau tsüshü bin nle. Jakob ko agun siki hü nle.’ ” tsonshülo. 19A-le tsühontse pe kenyhun gü, kenshen gü lo nyukhu ntsen kehü kechadan aphu ka zo küshü. “Hagun le Esau teno yatselo a-ka hihontse zoshü mvu loshvu. 20Hagun le, ‘Ele, ngo gü Jakob ko agun sika hü nle.’ ” Jakob kerüchün le, “Ale jwe pe a-tsü keshü genyu, ale a-zen keteno kethyü ka a-le akemu jüshü ti ado,” tson bin. 21A-le jwe dan tsü nishüla njüo tsüje kensenbin tsüka sun tinla.
Jakob le Peniel ka Tsanggelonyu Zen Kepe
22Tsüje Jakob le so-o a-nuhvu, a-thenuhvu lo a-nyenyu min tseryü nme dan zen-o Jabbok züri pfüthü chwila. 23A-le tsüdan nipe rinyu gü nken shü kela siki, a-hon dan ko aphu nikü shüla, 24ai a-npfü anyugun siki bin. Tsüka temi nme le ryü a-zan kepe bin-o tsangkeben münti. 25Temi tsügü le Jakob zenloha güjü kela hyulo ntsin Jakob makhun vükeshü ka vükela la. 26Temi gü le, “Tsangben ryüzhü laso; ano tinla gwenlo.” Tsontsin Jakob le, “Nle jochü pe atsü kemvu we nhoshü kemvui,” tsonla.
27Temi güle, “Nzan le segü la?” tse ketso, tsüka a-le, “Jakob le,” tseshü.
28Temi güle, “Nzan no Jakob thyüsin loha so. Nle Sunggigü lo temi zen kecho-o kvulo kela genyu; nzan pe Israel tsonti.”
29Jakob le, “Nzan pe aka zoshü ta.” Tsontsin a-le, “Nle nyu genyu azan shanyü bin nla? Tson-o jochü pe Jakob tsüshü.”
30Jakob le, “Ale mhuntsun Sunggigü zenkehyuo rhün binzun,” tson-o a-le bin tsügü zan pe Peniel tse tholo. 31Jakob le Peniel nkentin kejü tsüle yhüko chwiryü la, a-makhun kekela genyu a-le nyhon hü. 32Nthu keti Jakob tsipwen le thyü a-dinru kekeren ka thyüyhen tsü tyü hümvu, a-le Jakob nkhin ka a-yhen vü keshü genyu.
Currently Selected:
BINZEN 32: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
