BINZEN 31
31
Jakob le tin Kela
1Jakob le, Laban nyu dan le, “Jakob le ngun pvü hon aphu khilo laso. A-kenya tsü aphu ngun pvü hon le.” 2Lo a-le, Laban ko himhundyü ki hontse a-zen kenme thyümvu kela hyulo. 3Tsontsin Npugü le a-ka, “Nle ranio npvü lo nshvunye ki gun lo. Ale nzen hüti.”
4Tson-o Jakob le Rachel lope Leah au no a-senru le kehü bin ki ryü lotse josin shü. 5A-le au ka, “Hai pvü le age himhundyü hontse mvukela ale sha laso; ai apvü Sunggigü le azen hü nyo. 6Hai mihvu nren ale akekvu aphu pe hai pvü lothyü keryü shabin nyo. 7Tson-e a-le asala lo gwentseryü ge achün kelula. Ai Sunggigü le a-no a nthyü nnyü lamvu. 8Laban le, ‘Tenyü kemeren dan pe nchün thyüti,’ tseshülo tenyü kemeren nti nchela. Lo a-le, ‘Rhithürhirü kethyü pe nchün thyüti tse shülo,’ aphu rhithüthü kethyü nche küla. 9Hihontseo Sunggigü le npvü senru dan khipe atsüla.
10“Senru dan le cho kebin ka aminki tenyü tse chokebin dan tsü le rhithüthü, meren lo kenphenkenrün tse kethyü nmin. 11Lo aminki Sunggigü jolo güle, ‘Jakob!’ tse ako shü. Laryü ale, ‘khinshü.’ 12Tsontsin a-le, ‘Nrishü,’ ‘tenyütse chokebin dan aphu rhithüthü, meren lo kenphenkenrün. Laban le n ge thyükebin aphu ale hyu kela genyu ale hihontse thyü shü bin nle. 13Ale Bethel nyu nyhühyu thyü keshü ka nle rüchün hü nrün genyu oliv-terzü pe tso nme yünlo, swen-o thyükenshün pe Sunggigü tsüle. Ranio n nnyu kelo kazü günyu gunla nrün genyu ngwen ndolo.’ ”
14Rachel lope Leah au le Jakob ka, “Ahi pvü kanyu thame ahi jün le ndiso. 15A-le ahi lope tesin hontse gwenzin. A-le ahi jwen la-o ahi min aphu senkü laso. 16Sunggigü le ahi pvü hon khikelo hi aphu ahi lo ahi nyenyu ju honle. Sunggigü le nka lihi zoshüe tsü thyü lolo.”
17-18Tson-o Jakob le ranio Kanan kazü nyu a-pvü ki gun titse gwen ndalo. A-le a-nyenyu lo a-nunyu dan pe ut ge shülo, lo a-le Mesopotamia nyu hyukelo a senru dan aphu hüzen-o a-mhundyü rilo. 19Laban le a-tanyü hütse titse güla lo a-kendi ka Rachel le a-pvü hon anyugun kaminyu teromen kezü rühu lola. 20Jakob le a-le tin kejü zomvuo Laban sala. 21A-le a-hon aphu khilo njüo kechokelo thyü tinla. A-le Eufrates züri pfüthüo Gilead kazü rincho ki gunzhü.
Laban le Jakob Hü Kegun
22Jakob le tinla jonshen siki Laban ka zoshü. 23A-le a-temi dan zenlo njüo Jakob hülo kemvuthen then gun gü jontsenyü ki Gilead rincho ki hülo. 24Tsüje Laban minki Sunggigü le ryüo a-ka, “Nle tha lihi-e pe Jakob kedün mvuti tse petsülo nye.” 25Jakob le kazüthun nme ge kensenbin thyü bin, lo Laban le a-tsagü-sikezen nyu dan zen-o Gilead rincho ge anyugun kensenbin thyülo. 26Laban le Jakob ka, “Nle nyuthyüo teri ka tenunyu tenzen kehü hontse, anyugi dan zentin zhü nla? 27Nle nyuthyüo aka zomvu le asao kebu tin zhü nla? Nle akazo yatselo, nno shekerhün thyü lüthyü-o tamborin lo harp sen nnishü nrün. 28Nle ano a tsunyu dan lo anyugi dan-e nboshüo anyugun zenkekha mvu. Tsüle kemonkenu thoso! 29Ale nnthyünnyü lalo kegwa kekvu le bin nyo, ai nje npvü Sunggigü le ano nkedün nyalo tse kela genyu le. 30Nle nkaki rani gunla nyüri kela genyu tin laso tse ale shabin nyo, ai nyuthyüo a kaminyu teromen kezü rühu lola hü nla?”
31Tsontsin Jakob le, “Nle nnyugi hvu zenlo lati adotse ale rüchün-o nshvu kela genyu le. 32Ai hika kebin ligü higü ge-e nhon teromen kezü dan tsü hyukelo gü we dushvu lati. Ngun shvunye hidan mhundyü nyu nhon nyule hika bin yo shwio khilola.” Rachel le Laban hon teromenkezü dan khilo kela Jakob le shamvu.
33Laban le Jakob phikanyu, tsüsika Leah, lo gogihvu phikanyu tse yügü fü ai a-teromenkezü dan tsü fü kendila. Tsüsiki a-le Rachel phika nyu yü. 34Rachel le anyu kaminyu teromenkezü dan tsüpe ut senkela bin nyu shüo a-soge dunbin. Laban le phikanyu tha aphukese ai hyulomvula. 35Rachel le a-pvü ka, “Ale tenu nyu jvü thyü kebin genyu, nmhundyü ka soshü loshvu bin nlaryü, kedagü, age nnyunta nyalo,” tsonla. Laban le a-kaminyu teromen dan tsü füe fü kendila. 36Tsüselo Jakob le a-nyunta-o Laban ka, “Ale nyu kemu thyüo la? tson-o a-kesü. Ale nyu thyüzü shü letseo nle nnyunthün-o ahü tsüryüla? 37Nno a kanyü aphu kese kegun nhon nyu hyulo la? Tsü khishwi pe hika shü ntemi lo atemi dan no nrishüo nhi digü le njüyo anyugun no zoshülo. 38Ale chenki nzen gunryü; ntanyü lo ntenyü le nchemvu kela thyümvu, lo ale nsenru dan nyu ntanyü tse nme boshvu tyümvu. 39Lihi gwenkho ka tehenthyü le tanyü nme tün laya tse-e ale a npfü tsü thahü. Tsüle a kemu mvu letse ale senryü ntesha hümvu. Nwe mele nhenyu nmvue khejenyu-e rühulo kela dan aka tsü lolo tse hünyo. 40Gwenkechon ale nhenyu tsangkeyün nyu kenjünthyü lo khejenyu sesi hü. Ale zhü lomvu. 41Ale tsühontseo chenki nzen bin. Ale nnyugihvu genyu chentseryü pezi lo nsenru genyu chen tsero tse nlothyü gunryü. Tson-e nno gwentseryü ge achün kelu la. 42A pvübon nyu Sunggigü, Abraham lo Isak Sunggigü le azen hü mvuya tse kethyü we nle akenben anikelai so. Ai Sunggigü le akenjün kethyü lo ale thyü keshü thodan hyukela genyu nje nrhoshü so.”
Jakob le Laban au Kejozenkelo
43Tsontsin Laban le Jakob ka, “Lünyu hidan le anyugi; anyugun nyenyu le ahon, lo senru hidan hile ahon. Ketsin nle hyu kebin hi apu ahon le. Ai ale thame thyüo anyugi ju lo anyu nyenyu dan khin bin keloi kemvu genyu. 44Ale nhi kejozenkelo nme thyüla titse nda bin nle. Nhi rüchün lo nrün genyu tsokhwe nme khwela tinu,” tsonshü.
45Tson-o Jakob le rüchün hü nrün tso nme pe senshü. 46A-le a-temi dan no tso jün kequen pe khweshü lotse zoshüo, anyugun le tsokhwe khweo a-khoka tyütsülo. 47Laban le tsüpe Jegar Sahadutha tse kolo lo Jakob le tsü zan pe Galead tholo. 48Laban le Jakob ka, “Nthu tsokhwe higü hile nhi jaka rüchün lo nrün thyüti.” Tsügenyu tsüpe Galead tse kolo. 49Laban le, “Ngun le khinyu nyu zen kekha tinla-e Npugü no ngun nrihü nda,” tson-o bin tsügü zan ko khipe Mizpah tse tholo. 50Laban le zo sin-o, “Nle anyugi ju shwisomvu nmvue tenu kecha loya tselo ale tsü shamvu yatse-e Sunggigü le ngun nri bin nyo tse rüchün lo. 51Nhi janyu tsokhwe gü, lo rüchün hü nrün tso kesen le hika bin nyo. 52Tsokhwe higü lo tso kesen higü hile nhino n hisi rüchün nilo nrün güle. Ale thame ka-e tsokhwe higü nken-o nwhen loha lo nko tsokhwe higü nmvue rüchün hü nrün higü nken ryü awhe nya. 53Abraham Sunggigü lo Nahor Sunggigü no nhi jaka jopen keshü gü thyüti.” Tson-o a-pvü Isak le rüshvu kehü Sunggigü zan sen-o Jakob le a-le zokeshü dan then titse swela. 54Jakob le nyukhu nme dushvuo kazüthun gü ge kershvu nme thyüo a-temi dan kope tyütsü. Anyugun le tyütsü kelosiki tsüje a-nyugun le kazüthun ge sunlo. 55Tsüsinyü lonyü nshwe ka Laban le atsunyu dan lo anyugi ju nboshüo jochü anyugun tsü shüo a-kaki rani gunla.
Currently Selected:
BINZEN 31: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
