BINZEN 30
30
1Ai Rachel we nyu nme-e nnyu pe Jakob tsümvu, tsügenyu a-le a-tsagi shwi a-yhüthyüo Jakob ka, “Nyu khipe atsülo, kemvu we ale si lati.”
2Jakob le Rachel ge a-nyuntao, “Ale Sunggigü sun thyü logwa ole? Nno nyuzenlo kemvu tsüle A-le le.”
3Tsontsin Rachel le, “Agogi Bilhah le hika hü nle; a-no nyu nme nnyu pe atsü nrün genyu a-zenzhülo. Tsühontseo ale mejvünyu nme thyü logwa.” 4Tson-o a-le Bilhah pe a-nyepvü tsüo no zenzhü. 5Bilhah le nyuphupfü lo-o peche nme nnyu pe Jakob tsüshü. 6Rachel le, “Sunggigü le a njün shü laso. A-le a kehi nyüshüo peche nme pe atsüshü laso”; tson-o a-zan pe Dan tholo. 7Bilhah le nyuphupfü nilo-o peche kenyhun gü nnyu pe Jakob tsüshü. 8Rachel le, “Ale atsagi ayi kenren tsensa tse kenren-o ale kvulo laso”; tson-o a-zan pe Naftali tholo.
9Leah le a-le nyuzenmvu kela shalo njio a-gogi Zilpah pe Jakob no a-nu thyü. 10Tson-o Zilpah le peche nme nnyu pe Jakob tsü. 11Leah le, “Ale ahengwa bin nle”; tson-o a-zan pe Gad tholo. 12Zilpah le peche kecha nme nnyu nipe Jakob tsüshü, 13Leah le “Ale ditsükhi asherhün la! Tenunyu ju le sherhünle tse ako tiso”; tson-o a-zan pe Asher tholo.
14Thoshe logvü gwenkho ka Reuben le loki tsü laryü nye (mandrakes) hyulo-o sen gunryü a-jvü Leah tsüshü. Rachel le Leah ka, nnyu gü nyetsü peha pe atsüta, tsonshü.
15Leah le, “Nle anyepvü khilo kela nti mvule anyugü nyeko khilo la tiya bin ole?”
Rachel le, “Nle nnyugü nye pe atsü yatselo, ntsoje Jakob hai zhü logwa.”
16Jakob le loki tsüo khejegwen ryü laryü, Leah le a-teno-o a-ka, “Nle ntsoje azenzhü mvuloshvu, ale anyugü nye khipe nmin thyü laso.” Tson-o a-le tsüje tsügi zenzhü.
17Sunggigü le Leah kehinyü shüo a-le nyuphu pfülo njio peche pvün gü nnyu pe Jakob tsüshü. 18Leah le, “Sunggigü le achün pe atsü laso, ale agogi pe anyepvü ketsü genyu”; tson-o a-zan pe Issachar tholo. 19Leah le nyuphupfü nilo njio peche tsero gü nnyu pe Jakob tsü. 20A-le, “Sunggigü le kenrun nyu thakegwa nme pe atsü laso. Ntsoka we anyepvü le azen bin tiso, ale peche mitsero nnyu pe a-tsü laso”; tson-o a-zan pe Zebulun tholo. 21Kenkhin ki a-le tenunyu nme nnyu lo-o a-zan pe Dinah tholo.
22Sunggigü le Rachel rüchünshü, a-le tsügi kehinyü shüo a-no a-nyenyu hyulo. 23Tsügi le nyuphufülo-o peche nme nnyu shü. A-le, “Sunggigü le peche nme pe atsüo atetsin sen tin laso. 24Npugü no peche kecha nme pe atsü nda”; tson-o a-zan pe Josef tholo.
Jakob le Laban ka a-jün Kehi
25Josef nnyu kelo siki, Jakob le Laban ka, “Ano a kaki rani gunla nrün genyu a hoshülo. 26Ale nlothyüo chün kelo anu lo anyudan khishüo ano tinla gwenlo. Ale dihontse nlothyü kegwa thyü shüyo nle sha bin nyo.”
27Laban le a-ka, “Ano johi zoshülo: Ale shakelo le Npugü le ngenyu jochü pe atsü. 28Nchün dan swü shülo, lo ale khipe ntsü ti.”
29Jakob le, “Ale dihontse ntho thyüyo, lo n senru dan dihontse a ben nyu chvükenye loyo nle sha bin nyo. 30Ale keryü mhundyü kerhokhi kebin tsüle, chonkenye pe danda thyülo laso, lo ale lika hika güe Npugü le jochü pe ntsüshü. Ntsoka we ale a npfü a kakhün genyu ketsenlo mvulo shvuso.”
31Tsontsin Laban le, “Ale nyu pe ntsü tila?”
Jakob le, “Ale achün thame lo kemvui. Nle tha higü hi nkendo yatselo, ale n senru dan ntsenni binti. 32Ano nthu ntanyü dan nyu gü lihi-e kemetsen dan, lo tenyü lihi-e meren nmvue rhithü rhirü kethyü dan khi lota. Ale lonyü kebin achün le tsü nti le. 33Ale joketsin zole mvuyo siki shawhü lo nrün genyu. Nle achün shwiryüo, keshanyu laka ale tenyü meren nmvue kenphenkenrün kemvu, nmvue tanyü lihi-e metse kemvu le bin yatselo tsüle rühu kelo tse nle shalo gwale.”
34Tsontsin Laban le, “Akenda le. Nnyi nle kezo hontse ti.” 35Tson-o tsünyü Laban le tenyü tse rhithürhirü nmvue kemeren le kebin lo a-lü rhithürhirü nmvue kechon le a-ge kebin kemeren dan; lo tanyü kemetsen dan aphu hüzen tinla. A-le tsüpe anyu dan tenyen shüo, 36no zen Jakob anyu janyu jonshen tsonkechü bin ki güla. Lo Jakob le Laban senru a-sen dan nucha bin.
37Jakob le Poplar, almond lo plane sen kerhün ro nti lo-o a-yhü peha tsola njio kechon no rhithürhirü lo. 38Tson-o pe senru dan le zütsü kehü kun mhundyü ka shü, senru dan no zütsü ryülo tsü nrio cholo nrün genyu. 39Tenyü dan le senro dan mhundyü ka a-nyupfü lo-o chonro, rhithürhirü lo meren kethyü ncheshü.
40Jakob le tanyü lo tenyü dan hü kholo njio no kerügü Laban hon rhithürhirü lo metse kethyü dan ntsunlo. Hihontseo a-le a-hon dan no Laban kerhün mvuo ntsenlo.
41Senru aphukegwa dan le cho solo Jakob le senro dan khi sengü zü ketsü kun ka shü, tson-o no senro dan nyu a-nyupfülo nrün genyu. 42Ai a-le senro tsü khipe senru kenthü dan mhundyü ka we shü hümvu. Tsügenyu thonmvu tse senru kenthü dan aphu Laban hon, lo aphukegwa aphu Jakob honthyü lola. 43Hihontse Jakob le nnya sa chwiryüla. A-le senru, gonyu, ut lo gada-e kechon le bin la.
Currently Selected:
BINZEN 30: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
