BINZEN 35
35
Sunggigü le Bethel ka Jochü Pe Jakob Ketsü
1Sunggigü le Jakob ka, “Bethel ki gü tsünyu yhun tin lalo. Tson-o kershvubin nme thyü pe nle ntsa Esau mhundyü nyu tin kejü ka nyhühyu thyü keshü gü Sunggigü tsü shülo.”
2Tson-o Jakob le akami lo a-zen kehü dan aphu ka, “Hagun le sen kehü sin rünyi tero tsü khela; hagun npfü hagun thyü kenshün lo phinya kenshün bennya külo. 3Ngun hika binmvuo Bethel ki gunla ti. Ale tsüka kershvubin nme thyü pe ale thyülo keshvu ka a keche keshü lo ale lika hika gü-e azen kehü Sunggigü tsü ti.” 4Tson-o anyugun le kebin sin rünyi teromen dan lo anyugun lera kehü nye dan ko pe Jakob tsüla. A-le Shechem khoka tesho bin gü hensin nyu tsü pe sunla.
5Jakob lo anyudan le tin kejü ka rünyi tsü khoho kebin dan le nshvu salao, anyugun thenryü mvula. 6Jakob le a-temi dan aphu zen-o Luz ka ryü, ntsoka tsü pe Bethel tse hü nyo, tsüle Kanan kazü nyu bin. 7A-le tsüka kershvubin nme thyülo-o, bin tsügü pe Bethel Sunggigü zan tholo, a-le a-sikezengü nshvuo tin kejü ka Sunggigü le tsünyu a-yhühyu thyü keshü genyu. 8Rebeka lüyi kehü gü Deborah le si lao pe Bethel tesinzin tesho bin gü hensin nyu sunla. Tson-o tsü zan thope chükebin tesho bin tse kola.
9Jakob le Mesopotamia ki bin-o rani keryü ka, Sunggigü le a-yhühyu thyü ni-o jochü pe a-tsü. 10Sunggigü le a-ka zoshü, “Nzan le Jakob, ai ntsoka gerho tsü pe Israel thyü lati.” Tson-o Sunggigü le a-zan pe Israel thyü shüla. 11Lo Sunggigü le a-ka zoshü, “Ale kekvutsin Sunggigü le. Nle nyu kechon nkin lolo, N tsipwen ge senye le chwiryüti, lo nno rajanyu bon thyü ti. 12Ale khipe Abraham lo Isak ketsü kazü gü pe ntsüti, lo ale tsü pe siki n tsipwen dan ko tsüti.” 13Tsonshüo Sunggigü le a-khe-o tinla. 14Sunggigü le a-nthon keshü bin tsüka, tsü rüchün hü nrün genyu Jakob le tso nme sen shüo vainzu lo oliv terzü ja pe tsüge shüo thyü kenshün lo. 15A-le bin tsügü zan thope Bethel thyülo.
Rachel Kesi
16Jakob lo a-kaminyu le Bethel nkenla, lo Ephrath ti nrün le nithen din kebin ka Rachel a-nyu kezen gwenkho le ryüla, tson-o a-ginthyüsa lola. 17A-ginthyüsa kebin ka a-ntsenkebin gi le a-ka zoshü, “Rachel, nshvu nyalo; tsüle ntsenyu a-kecha nme le” tseshü. 18Ai a-le sigü jüla, a-le a-nyugü zan pe Benoni thoshüo a-teshye hen kenkhin gü thyüla, ai a-pvü le a-zan pe Benjamin tholo.
19Rachel le sikela ka pe ntsoka Bethlehem tse kehü, Ephrath ki kegü tson teka sunla. 20Jakob le rüchün hü nrün tso nme pe tsüka sen shü, nthu keti tsü le Rachel sika tse hü. 21Jakob le ketu-o Eder tsokhwe pere kipon a-kensenbin thyülo.
Jakob nyu Peche Dan
(1 By 2:1-2)
22Jakob le kazü tsügü nyu yhun kebin ka Reuben le a-pvü thenu a-zan le Bilhah tse kethyü nme zen jüla; Jakob le tsü rüla nyülo-o nthün sa lola.
Jakob le a-nyu peche min tseryü kenyhun le bin: 23Leah nyu peche dan le Reuben (Jakob nyurigü,) Simeon, Levi, Judah, Issachar lo Zubulun. 24Rachel nyu peche le Josef lo Benjamin au. 25Rachel gogi Bilhah nyu peche le Dan lo Naftali. 26Leah gogi Zilpah nyu peche le Gad lo Asher. A-nyu peche hidan hile Mesopotamia ki nnyu lo.
Isak Kesi
27Jakob le Abraham lo Isak au le yhun kehü Hebron khoka Mamre ka a-pvü Isak ki gü. 28Isak le chen tsio hen tetse la 29lo a-le then sao si: tson-o a-nyu Esau lo Jakob au le a-sunla.
Currently Selected:
BINZEN 35: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
