BINZEN 24
24
Isak le Tenu Kelo
1Ntsoka we Abraham le thenla, lo Npugü le tha lihi ka-e jochü pe Abraham tsü. 2A-le a-gonyu peshütsin gü, a-hon kebin aphu ntsen kehü gü ka, “N ben pe a- dinhvu jaka shüo keswe nme thyü shülo. 3Ale nno Kanan hinyu tenunyu lo pe anyu tsü loha tse Npugü, tsang lo kazü Sunggigü zan nyu keswe nme thyü nyü bin nle. 4Nle gü annyu kelo kazü ki a shvunye dan nyu tenu nme fü pe anyu gü Isak tsü mvulo shvu.”
5Tsontsin gogü le a-ka, “Lünyu güle a-ka kheo azen kazü higü ki ryümvu yatselo ntse thyü mon? Ano nnyu gü nipe nle hü tseo chwikeryü kazü günyu shü tile?”
6Abraham le, “Nle anyu nipe tsüki shü kemvui tse sha tsen tsülo! 7Tsangge kehü Npugü, Sunggigü le a-le kazü higü pe a tsipwen tsü titse a-johoshüo a pvü ka lo a shvunye le kebin kazü günyu a-zen chwiryü laso. A-le a-lokethyünyu nipe nmhundyü shü ti, tsügenyu nle tsüki anyu gü nu hyu logwa le. 8Lünyu güle nzen ryünyü mvuya tselo, nle sweshü kenjü hinyu ketekhi ndiso. Ai nle lihi thyüe anyu zen-o tsüki rani gü nya.” 9Tson-o gogü le a-ben pe a-npugü Abraham din jaka shüo, Abraham le ano nyu thyü lotse bin nyo tsü thyüti tse swela.
10Gogü, Abraham kenya hon ntsen kehü güle a-npugü ut tseryü zenlo njio Mesopotamia tesozin Nahor le yhun kehü nyida gü nyu gunla. 11A-le gü tilo ntsin, chwida teki zülu seka ut dan no khosen bin. Tsüle ngwünki tenunyu le zülü chwi keryü gwenkho. 12A-le kehi thyüo, “Npugü, a npugü Abraham Sunggigü, nle a npugü shwi njün kehü tsin shüta lo ano tha thyüwhü kela pe a tsüta. 13Ale hika zülvu ka bin-o nyida günyu lünyu dan le zülü ryülo, 14ale anyugun ka, ‘Nlaki penshe shüo ano zü tsülo ta.’ Tsülo, lo ale ut dan genyu ko penryü tile, tsezokeshü gi tsüno ngogü Isak genyu kejü kenjü thyülo nda. Hihontse loya tselo, nle a npugü ka njohoshü kenjü sen bin nyo tse ale shalo ti.”
15A-le kehithyü thü kemvu ka Rebeka le laki nme pe a-buthun ge dun-o ryü. A-le Bethuel nyugi, Bethuel le Abraham sikezengü Nahor nyu lo a-nu le Milkah. 16Tsügi le lünyu zegwa lo phusen nme. A-le zülvu ka nshegü zülü pe a-laki sülo-o raniryü. 17Tsontsin gogü le tin gü, “Ncheno-e nlaki ka züpe a lashü ti mon?” tson zoshü.
18Tsüselo a-le, “Tsülo ta kedagü” tson-o whütse a-laki penshe lo njio nmhupen-o a-no tsülo. 19A-le tsülo ntsin tsügi le, “Ale hagun ut dan genyu ko zü penryü tile anyugun no tsü kenyü kho tsülo.” 20Tson-o a-laki run pe nyukhudan tsü ketsükhun ka shüla-o zülvu ki zülü ni güla, ut dan le tsükü lo kemvuthen a-le zülü shü. 21Temi gü le nramvu tse tsügi nrio, Npugü le a-no thathyü to kelo khishü tile nmvuyo tse bin.
22Tsontseo ut dan le zütsü lola ntsin, temi güle suna ring a-min ketsen nme khipe tsügi yhinkon bünshü lo suna pin keda kenyhun pe a-benkhin shü. 23Tson-o, “N pvü le segü yo aka zoshü lo. Lo ntsoje a gun no sun lo kegwa a-kanyu bin le bin le mvu la?”
24“A pvü le Nahor lope Milkah au nyugü Bethuel le.” tsonshü. 25“Agun kanyu npenkon lo nyukhu chvü-e kechon bin lo hagun no sunlo kegwa bin le bin nle.”
26Tsontsin temi gü le Khonsen tsügü Npugü rüshvushü. 27Tson-o, “A-le a npugü Abraham Npugü Sunggigü shwe, a-le a npugü Abraham ka a-johokeshü tsü kheshü kemvu genyu. Npugü le a tsontsin zen ryüo a npugü shvunye nyu ka shüshü laso.”
28Lünyu gile tin gungü tha rüla tsü apentha pe a-jvü nyu kaminyu ka zoshü. 29Rebeka le a-tsügü Laban tse kethyü nme le bin, a-le Abraham gogü le zülvu ki kehü teno titse tin gü. 30Laban le a-lügi yhikon ka ring lo a-ben ge pin hyu tsü ntimvu le temi güle a-lügi ka kezojo tsü nyülo. A-le Abraham go güle a-ut dan zen-o zülvu ki sokebin bin ki gü, 31a-ka, “Nnyi ka ki gun tile ryülo. Nle Npugü le jochü pe ketsünyu nme le. Nle nyuthyüo hika sobin nla? Ale a kaki ngenyu bin nda njün nle lo n ut dan genyu ko bin le bin nle.”
32Tson-o temi güle kaki gun, lo Laban le ut dan khvushela-o npen lo nyukhu chvü dan pe tsüshü. Lo a-le Abraham gogü lo a-zen kehü dan no anyugun pha süla lotseo zü senryü. 33Ketyüketsü senryü laryü, temi güle, “Ale nyuzo tiya binyo zola kemvu ka we tyütsü kemvui,” tson shü.
Laban le, “Zoshülo,” tson shü.
34A-le, “Ale Abraham go gü le.” 35“Npugü le jochü pe a npugü Abraham tsüsa shüo a-thyü pe kenya nyu nme thyü laso. A-le tanyü, tenyü, methu, raka, suna, go tenu lo pechy-e, ut lo gada pe a-tsü shü laso. 36Lo a npugü nu Sarah le a-thengwen ki peche nme nnyu pe a-tsüshü, tson-o a npugü le a-hon aphu pe a-tsü laso. 37A npugü le ano a-khwenyü titse swen-o aka, ‘Kanan nyu lü lope anyu tsü nya. 38Ai a pvü temi dan ki gü ashvunye nyu nme kejü pe no a-nu thyülo.’ 39Lo ale a npugü ka, ‘Lünyu gü le athen ryü mvu ado?’ tsonshü. 40Laryü a-le, ‘Ale a-jozen zin kehü Npugü le a-lokethyü nyu nishüo no nzen hüti, tson-o thyüto kelo pe ntsü ti. Nle a n pvü atemi, a pvü kami nyu dan nyu anyugü nu nme hyu loti. 41Nle sweshü kebin gü nyu tin lo kegwa le nme nti: nle ashvunye dan ka güo, anyugun le pe ntsümvula yatselo n keswe le pen laso,’ tsonshü le.
42“Tson-o ale nthu ryüo zülvu ka, kehithyüo, ‘Npugü a npugü Abraham Sunggigü, ale nyuthyü bin yo thyüto kelo pe atsülo. 43Ale hika zülvu ka hü nle. Lünyu nme le zülü ryü yatselo, ale a-ka n laki ka zü pe ano tsü lota tseshün keshüka. 44A-le tsülo lo ale ut dan genyu ko zülü shü tile tse keshügi tsüno nle a npugü nyugü genyu kejü kelo gü letse nda,’ tsonshü. 45Ale anyunki hizo-o kehithyü thümvu ketseka, Rebeka le laki nme pe a-buthun ge dun-o zülü titse nsheryü, Ale a-ka, ‘Ncheno-e zü pe ano tsü lota.’ 46Tsontsin a-le a-laki penshe whü shüo, ‘Tsülo, lo ale ut dan genyu ko zülü shü tile,’ Tson-o ale tsülo lo ut dan kono tsülo. 47Tsüselo ale a-ka, ‘N pvü le següla?’ Tsonshü laryü a-le, ‘A pvü le Nahor lope Milkah au nyugü Bethuel le,’ tsonshü. Tson-o ale ring gü pe a-yhikon ka shü lo pin pe a-ben ge shü shü le. 48Ale khosen tsügü Npugü rüshvu. A npugü, Abraham Npugü Sunggigü atsontsin zenryü, a npugü shvunye ka shüo, ano a-nyugi fü pe a-nyugü nu thyü keshü gü shwe shü. 49Tsügenyu hagun le kenjü nyu a npugü ge thyü kezü gü thyüshü tile nmvuyo, ntsoka aka zoshü lalo; nmvuya tselo nmvule tse zoshüo ano nyuthyü tiyo rüchün lolo,” tsonshü.
50Tsontsin Laban lo Bethuel au le, “Hile Npugü kipon ryü laso, tsügenyu ayi le thame kezoi ndi le. 51Rebeka le hika hü, a-zen-o gun lota. Npugü le a n pvü zokeshü hontse, a-no n npugü nyugü nu thyülo ta.” 52Abraham go gü le jotsü shalo ntsin, a-le nkhün tsügü Npugü rüshvu. 53Tsüselo a-le phinya, rakagi lo suna tye khi shwipe Rebeka tsüshü. Lo a-le a-min ketsen dan khipe a-tsügü lo a-jvü au ko tsüshü.
54Tson-o Abraham gogü lo a-zen kehü dan le tyütsü lo njio tsüje tsünyu binlo. Anyugun le lonyü soryü ntsin, a-le, “Ano ranio a npugü ki gun la gwenlo,” tsonshü.
55Ai Rebeka tsügü lo a-jvü au le, “Lünyu gino hapta nme nmvu-e jonryü bin lo-o tsüsiki gun lo.”
56Ai a-le, “Agun no bin tinla nya. Npugü le akenjwen no tha thyüto lo laso; tsügenyu ano a npugü ki rani gun lalo.”
57Anyugun le, “Lünyu gi koshüo a-le dihontse zoshü tiyo sha lo tile.” 58Tson-o anyugun le Rebeka koshüo, a-ka, “Nle temi higü zen gun lanyü bin nle?” tse ketsoshü.
Tsontsin tsügi le, “Ele,” tsonla.
59Tson-o anyugun le Rebeka no anyu kami gonyu nme zen-o Abraham gogü lo a-temi dan zen gunla. 60Anyugun le hihontse jochü pe Rebeka tsü:
“Agun lügi, nno temi yieyie jvü thyü lo nda!
N tsipwen no a-shwikerüchün nyu nyida dan lo lo nda!”
61Tson-o Rebeka le Abraham gogü zen gun titse a-nizin gi dan zen-o ut ge dun lo njio anyugun aphu tsonchü shüla.
62Isak le Lahai-roi (Ahyu kebin rhükehü gü zülvu) tson kipon ryü, a-le Kanan tesinzin kehü genyu. 63A-le ngwen gü ki lonyu gü nda hü laryü ut dan le gunryü kejü hyu shü. 64Rebeka le Isak hyukeshü ka a-ut ge tsenla. 65Tson-o Abraham go güka, “Ngun denzin npharyü kejü lonyu kehü gü lile segü la?” tse ketsoshü.
Tsontsin gogü le, “A-le a npugü le,” tsonshü. Laryü tsügi le mhunkesun phi pe a-mhunje lola.
66Gogü le a-le nyuthyü yo tsü aphu pe Isak ka zoshü. 67Tson-o Isak le Rebeka zen a-jvü Sarah le bin kehü phika günyu yüryülo, njio a-nu thyülo. Isak le Rebeka sohü, tsügenyu a-jvü kesi siki-e anyu bwen lo.
Currently Selected:
BINZEN 24: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
