BINZEN 25
25
Abraham Tsipwen Kechadan
1Abraham le tenu kecha nme loni, a-zan le Keturah. 2A-le Zimran, Jokshan, Medan, Midia, Ishabak lo Shuah tse nnyu pe Abraham tsü. 3Jokshan le Sheba lo Dedan au pvü, lo Dedan tsipwen le Asshurim, Letushim lo Leummin. 4Midia nyenyu jule, Efa, Efer, Hanok, Abida, lo Eldaah. Hidan hi aphu Keturah tsipwen.
5Abraham le a-hon aphu khepe Isak tsüla; 6ai a-le yhun ketseka, tha khipe a-thenu dan ge nnyu kelo a-nyenyu dan tsü küshü. Tson-o a-nyenyu Hidan no Isak kho ka bin mvuo nipe kazü yhüko kechwi kipon shüla.
Abraham Kesi
7-8Abraham le chen tsio hentsenyü pvün yhun, a-le then sa-o si. 9A-nyu Isak lo Ishmael au le Hitnyu temi Zohar nyugü Efron lo Mamre nphozin Makpelah tsokü nyu a-sunla. 10Abraham le Hitnyu kazü hei kelo günyu tsü; Abraham lo a-nu Sarah au sun. 11Abraham le sikela siki Sunggigü le jochü pe a-nyugü Isak tsü, a-le “Rhünkehü gü le ahyu bin zülvu gü,” khoka yhun hü.
Ishmael Tsipwen
12Sarah gogi Ijiptnyu gü Hagar le nnyu pe Abraham ketsü gü Ishmael le, 13a-nyu peche hidan le bin, nche peshü thu kethen keshü: Nebaioth, Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Nafish lo Kedemah. 16Hidan le anyugun tsipwen tseryü kenyhun bon ju, anyugun zan ka anyu rünyi lo a-nyu kebin bin zan thalo. 17Ishmael le chen tsio shenryüo tsenyü yhunlo-o sila. 18Ishmael tsipwen le Ijipt nphozin Assiria ki kegun tson nyu Havilah lo Shur au ja kipon yhun. Anyugun le Abraham tsipwen kecha dan zen bin kecha ki yhun hü.
Essau lo Jakob Au Kenyu
19Abraham nyugü Isak rüla le hihontse. 20Isak le chen henzi ka (Mesopotamia kazü ki Aramean nyu) Bethuel nyugi, Laban lügi Rebeka lope a-nu thyülo. 21Rebeka le a-nyenyu kendi genyu, Isak le a-genyu kehithyü shü. Npugü le a-kehi nyüshüo Rebeka le nyuphu pfülo. 22A-le mihvu phupfü bin, lo au nnyu lo kemvu ka a-gin nyu au kega sola. Tsügenyu a-le, “Nyuthyüo age hihontse bin yo?” Tseo Npugü ketso titse gü.
23Npugü le a-ka,
“Senye kenyhun le ngin nyu bin nyo;
Nle kentsun kethyü temi dan kenyhun nnyu shüti.
Lo nme le kecha gü nyeki kvukvu ti;
Peshü gü le nchegü lothyüti,” tsonshü.
24A-nyu kezen gwenkho pen lo ntsin a-le peche mihvu nnyulo. 25Nyuri gü le nhon, lo a-gi le thyühü phi hontse, tsügenyu a-zan pe Essau tholo. 26Kenyhun gü le Essau pha tezenryü sen kehü nnyulo, tsügenyu a-zan pe Jakob tholo. Isak le chen hentsero ka au nnyulo.
Esau le Nyuri Chün Jwekela
27Nyuhvu le yhun soryüo, Esau le thyühü kesha nyu nme lo tehen ki kehü le a-kenyü, ai Jakob we matse kanyu bin hü. 28Isak le Esau le tehenthyü ga pfüryüo tyüketegvü kehü genyu Esau so, ai Rebeka le Jakob so.
29Khenyüme Jakob le rhütsi nibin laryü, Esau le thyühü güo ryü. A-le nnyo bin 30tson-o Jakob ka, “Ale pesi laso; tsügenyu nle boni pe nhomai tse kebin tsü peha pe ano tyü lota.” (Tsügenyu a-lope Edom tse kola.)
31Tsontsin Jakob le, “Nle nyuri chün pe atsü yatselo ale pe ntsüti.”
32Esau le, “Keshathyü! Ale sigü zhü laso; ale akenjüle agenyu kegwa nyu thyü lo tila?”
33Tsontsin Jakob le, “Nle nkenjü tsü pe atsüti tse swela rilo.”
Tson-o Esau le a-kenjü tsü pe Jakob tsü titse swela. 34Tson-o Jakob le tensü lo henkeni peha pe a-tsüshü. A-le tyütsü lo njio tinla. Hihontse Esau le nyuri a-kenjü tsü tepen mvula.
Currently Selected:
BINZEN 25: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
