BINZEN 23
23
Sarah Kesi lo Abraham le Meshunbin Kehei
1Sarah le chen tsio nkiotsenyü yhunlo. 2A-le Kanan kazü Hebron nyu sila, tson-o Abraham le a-kesi chechü.
3A-nu kesimin le kebin nken-o gü Hitnyu temi dan ka, 4“Ale tesin nme thyüo hika hagun dan nyu yhun bin nyo; ano anu pe sun nrün genyu kazü peha pe aka jwe shülo,” tsonshü.
5Tsontsin anyugun le a-ka, 6“Agun khwenyü shülo, kedagü. Nle agun dan nyu sharhi kedanyu nme; agun sika dan nyu kegwatsin gü ka nnu sun lo. Agun ligü higü sika nme le pe ntsü nyü bin le, nno a-khipe sun lo gwale.”
7Tsontsin Abraham le nkhün anyu keluo, 8“Hagun le ano anu pe hinyu sun kethyü hagun kenda yatselo Zohar nyugü Efron no 9Makpelah tsokü tsüpe aka jwe shülo tse ketso shülo, tsüle a-low tegwen ka bin nyo. Hika hagun mhundyüka, a-no a-min aphu lo-o tsüpe aka jwe shülo, tson-o ano tsüpe ahon meshun bin nme thyülo lo.”
10Efron ko Hitnyu temi dan zen-o nyida gü chwida kenthon bin ka bin; a-le tsünyu kebin nyu aphu le nyükebin ka Abraham jo kenio, 11“Akhwenyü shülo, kedagü; ale lothyü tsügü apentha lo tsokü tsünyu kebin gü-e pe ntsü tile. Hika atemi dan mhundyü nyu, ale tsü pe ntsü ti, tsügenyu nle nnu sun logwa le.”
12Ai Abraham le Hitnyu dan mhundyü nyu nkhün a-kelu shüo, 13Efron ka zokeshü temi aphu nyü, “Hagun cheno-e akhwe nyüshü ti mon. Ale low gü apentha heiti. Aka ami khilo lo ale anu pe tsüka sun tile.”
14Efron le Abraham jo kenio, 15“Kedagü, kazü tsügü min le shekel tsizi lakhi gwenzin- tsü keche tsüle nnyi jaka nyukon mon? Nnu pe tsünyu sunlo.” 16Tsontsin Abraham le a-kenda la tson-o Efron le zokeshü hontse temi dan mhundyü ka rakagi shekel tsizi ndo pe a-tsüshü, hakethyü nyu le nda kehü then-o.
17Tsühontse Makpelah ka Efron kazü Mamre yhüko kechwizin kebin gü tsüle Abraham hon thyülo. Lothyü tsügü, tsokü tsünyu kebin, lo tsünyu senbin kebin aphu tegwen keti tsü le a-hon thyülo. 18Tsüle Abraham hon laso tse kethyü Hitnyu kenthon bin tsüka kehü nyu aphu shakü lola.
19Tson-o Abraham le a-nu Sarah pe Kanan nyu kazü nyu tsokü tsügü ka sunla. 20Hitnyu lobu, tsokü le a-nyu kebin gü tsüle meshun bin thyü nrün genyu Abraham hon thyüla.
Currently Selected:
BINZEN 23: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
