BINZEN 22
22
Sunggigü le Abraham no Isak pe Kershvu thyülo Tse Keshü
1Tsüsiki Sunggigü le Abraham ketenyen kegwakeshvu shanyüo, A-le, “Abraham tse a-koshü!” Tsontsin Abraham le, “Ale hika hü nle!” tsonshü.
2Sunggigü le a-ka, “Nnyu zenlo.” “Nnyu chegü Isak, nle sosa kehü gütsü zen-o Moriah kazü nyu gunlo. Lo ale kazüthun nme tsin pe nhi shüti, tsü ge a-rope kershvu nme thyü pe a tsülo.”
3Tsüsigü lonyü nshwe ka Abraham le tesen peha lüpe a-gada khvu thyülo, lo Isak lo gonyu mihvu zenlo. Tson njio anyugun le Sunggigü le a-ka zokeshü bin nyu gun titse tsonchü shü. 4Jonshen nyü Abraham le ntsenki bin tsügü hyushü. 5Tson-o a-le gohvu ka, “Gada zen-o hika sun tselo. N tsenyu gü ayi le gü kershvu thyü shüo rani ryü tile,” tsonshü.
6Abraham le rope kershvu thyü nrün tesen gü khipe Isak no penlo, lo a-le jenshe lo mah khilo. Tson-o au le tsonchü gü kejü ka, 7Isak le, “A pvü” tseshü, Tsontsin a-le, “Whe anyugü?”
Isak le a-ka, “Mah lo tesen le bin nyo ai rope rüshvu nrün tanyü nyu gü le diki ola?”
8Abraham le a-jokenio, “Sunggigü le khishü tile.” Tsonshüo au kengüo tsonchü gunla.
9Au le ryüo Sunggigü le a-ka zokeshü bin gü tilo ntsin, Abraham le kershvubin nme khwenlo njio tesen gü khipe ndanron lo. Tsüselo a-le a-nyugü phin lo-o pen pe kershvubin tesen so ge shülo. 10Tson-o dushvu titse a-jenshe gü sütholo. 11Ai tsangge Npugü lokethyü gü le a-ko-o, “Abraham, Abraham!” Tsontsin a-le, “Whe, ale hika hü nle,” tsonshü.
12Lo a-le, “Ntsenyu gü ge nbenshü nmvue tha thyü nya,” “N tsoka we ale nle Sunggigü rühvu lo a-jozen hü tse kethyü sha laso, nle nnyuche gü-e pe a-tsü tepen-o khilo la kemvu genyu.”
13Abraham le lizin hizin nrishü laryü tanyü tse nme le a-tse pe tehenphun nme ge hüsü pfü kebin hyulo. Tson-o a-le gü tsü khipe a-nyugü sun ka rope kershvu nme thyü shüla. 14Abraham le bin tsüpe Jehovah-jireh tse kola (a-kon le, “Npugü le khi shühü.”) Lo nthu keti temi le, “Npugü kazüthun ge a-le khishü hünyo tson zohü.”
15Lo tsangge Npugü lokethyü güle gwenhvu ge gü Abraham ko-o, 16“Ale a npfü azan sen-o swen-o- Npugü le zobin nyo- ale jochü pe ntsü sati. Nle nnyuche gü pe atsü tepen la kemvu hithyü keshü genyu. 17Ale n tsipwen no tsangge shenyü nmvue züda seka hachon kechon hontse pe ntsüti tse a johoshü bin le. N tsipwen no anyugun shwikerüchün nyu nye kvuloti. 18Lo ntsi ge kazü nyu senye aphu no jochü pfü loti, nle a johokeshü zenkelo genyu.” 19Abraham le rani a-gohvu ki ryüo anyugun kengüo a-le yhun kehü bin, Beersheba ki gunla.
Nohor Tsipwen
20Tsüsiki Abraham le Milkah le nyu mitetse nnyu pe a-sikezen gü Nahor tsüla sele tse kethyü shalo: 21Uz le nyurigü, Buz le a-sikezen gü, Aram a-pvü Kemuel, 22Chesed, Hazo, Pildash, Jidlaph lo Bethul, 23Rebeka a-pvü. Milkah le peche mitetse hidan hi nnyu pe Abraham sikezen gü Nahor tsü. 24Nahor thenugi Reumah le Tebah, Gaham, Tahash lo Maakah tse nnyu shü.
Currently Selected:
BINZEN 22: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
