Malako 1
1
Musagu Musoga Wasanzilue na Malako. Yoana Mubatizia.
Mat. 3:1-11; Lk. 3:1-16; Yoana 1:6-8, 19-28.
1Kulinga kua musagu musoga wa Yesu Klisto, Muana wa Kalaga. 2Anga buasanzilue ku mulengania Yesaya, bune,
Unguililazi, nalinga kusinga mugenzi wane,
Ukakunga nzila zo be;
3Iyuki lia muntu likulaluka mu kalula buno;
Kungazi nzila za Mukota,
Isiazi matingilo mage. #Yesaya 40:3; Malaki 3:1.
4Yoana avule, nu abatizizie mu kalula nu kusambala bubatizio bua kuiyania bualusizie isigililo lia misako za buagi. 5Nu bantu bansania ba mu kisi kia Yudaya bamuendede nu bantu bansania ba ku Yelusalema; nu babatizizibue mu luzi lua Yadene, nu beigongile misako za buagi buabo. 6Nu Yoana abezaga avuala nsulu za mioza za ngamia, nu abezaga na mukoma wa kikoba mu kibunda, nu aliaga nzige nu buki bua mu lubanda. 7Nu abasambalilaga bune, Ukavua kumbusa kuane antinga, kubuno nsiatananina kukumbama nu kukandula mizigi za bisalapata biage. 8Namubatizizie na mazi; tondo we amubatizie na Muuza Wasililila.
Yesu Ekubatizibua.
Mat. 3:13-17; Lk. 3:21, 22.
9Nu busi bubo, Yesu atukile ku Nazaleta wa Galela, nu abatizizibue na Yoana mu Yadene. 10Nu kazanga kongo gabede esatuka mu luzi, nu amonine igulu liakandulua, nu Muuza agelile anga nkulimba gantata gage: 11nu iyuki liatukile mu meigulu liatendile bune, Uwe uli Muana wane, Ngoli zane, nakomana nobe.
Satana Ekulindika Yesu.
Mat. 4:1-11; Lk. 4:1-13.
12Nu kazanga kongo Muuza amusindikile mu kalula. 13Nu abezaga mu kalula bindi makumi manazi nu alindikilue na Satana; nu abezaga ku nyama nkali; nu migenzi bamukitilaga.
Yesu Ekusambalila Bantu ba Galela Musagu wa Kalaga.
Mat. 4:12-17; Lk. 4:14.
14Kusila kua kukandua kua Yoana, Yesu endile ku Galela, kusambala musagu musoga wa Kalaga, 15nu atendile bune, Nkungu zakuka, nu bukota bua Kalaga buse buigi; iyaniazi, nu katiziazi musagu musoga.
Yesu Ekumana Petelo nu Andele.
Mat. 4:18-22; Lk. 5:10, 11.
16Nu atingile mu ntungo mua kiziba kia Galela, amonine ku Simona nu Andele muto wa Simona babezaga bekuisa tukila mu kiziba; kubuno babezaga bazubi. 17Nu Yesu ababuide bune, Nyangazi, nu namubike buno mube bazubi ba bantu. 18Kazanga kongo basigile tukila, nu bamuyangile. 19Nu gabede esalombozia, amonine ku Yakobo muana wa Zebedayo, nu Yoana muto wage, nubo babezaga mu buato balandaga tukila tuabo. 20Nu kazanga kongo, abamanine: nu basigile isibo Zebedayo mu buato, na bakiti babo, nu bamuyangile.
Yesu Ekutikia Musumbu wa Nsese mu Muntu wa Kapenuma.
Lk. 4:31-37; Yoana 1:35-42.
21Nu bendile ku Kapenuma; nu kazanga kongo ku busi bua sabato, eingide mu numba za musanganano nu eigisizie. 22Bangamine na meigisia mage: kubuno abegisizie anga uli na buangato, nu nteigisizie anga basanzi. 23Nu kazanga kongo kuabezaga muntu wabezaga na basumbu ba nsese mu musanganano wabo, alalukile neiyuki inene, 24atendile bune, Tuli nobe buni Yesu wa Nazaleta? ndi wavule buno utubigie? Nizi buno uli Wasililila wa Kalaga. 25Nu Yesu amuzugide, atendile bune, Ikala kibibi, nu tuka mu muntu wono. 26Nu wozo musumbu wa nsese amugusizie nu alilile neiyuki ibibu, nu atukile mu wozo muntu. 27Nu bansania bangamine nunse, nu babuzanizie bune, Buni bubo? mese mango meigisia! kubuno akukakizia basumbu ba nsese na buangato, nubo bekumuanza. 28Nu kazanga kongo lukumu luage luakukile mu kisi kinsania kia Galela.
Yesu Ekonia Ninabiala wa Petelo Isusila.
Mat. 8:14, 15; Lk. 4:38, 39.
29Nu kazanga kongo, gabatukile mu numba za musanganano, beingide mu numba za Simona nu Andele, na Yakobo nu Yoana. 30Nu ninabiala wa Petelo abezaga neisusila; nu bamusambalide musagu wage: 31nu endile kueli nu amukatile geikoko nu amuemanukizie, kazanga kongo isusila liasilile, nu abakitide.
Yesu Ekutikia Basumbu mu Bantu.
Mat. 8:16, 17; Lk. 4:40, 41.
32Nu muigolo, geidile busi, bamuvuilide na bantu bansania babezaga na nsambo, nu babezaga na basumbu. 33Nu bantu bansania ba mu muino bamukonganine ku luibi. 34Nuwe onezie bantu beingi babezaga na nsambo za nkita ningi, nu atikizie basumbu beingi; nu ntazigile basumbu batenda, kubuno babezaga bemuizi.
Yesu Ekusambala Kuingo Mino za Galela.
Lk. 4:42-44.
35Nu mu nindunindu, ku mukelo nunse, ayukile nu endile ku kalula, nu asegile kuko. 36Simona nu babo babezaga nage bamuyangile. 37Nubo gabamusangile bamubuide bune, Bantu bansania bakukulonda. 38Nu abatendile bune, Tuendazi kuingo mino zili buigi, buno nisambale kuko; kubuno bubo ubunavuilide. 39Nu eingide mu numba ningi za musanganano mu kisi kinsania kia Galela, abasambalilaga nu atikizie basumbu.
Yesu Ekonia Muiya Bibali.
Mat. 8:2-4; Lk. 5:12-14.
40Nu muntu umozi muiya bibali amuvuilide, nu amukomene mazu, nu amusegile bune, Ndi watunda, unavuama kunengia. 41Yesu amukuilide kiombo, alambizie kuboko kuage, nu eitubizie kueli, nu amubuide bune, Natunda; enga. 42Nu kazanga kongo bibali biatukile kueli, nu engile. 43Nu amukakizizie bubibu, nu kazanga kongo amusingile kumbuga, 44nu amutendile bune, Unguilila, ntutende ungo muntu: tondo enda tugu widolesie ku sankoga, nu ukasane ku kabamba ka kuengibua kuobe anga buakakizizie Mose, kuba bulongeki kubeli. 45Tondo we atukile, nu alingile kusambala bubibu, nu kukukia lilio idagi kunsania, nu Yesu ntavuamine kubasa lingo mu mino zezo na mugulu, tondo abezaga ku kiziki kia kalula: nu bantu bamuvuilide nu batukaga ku biziki binsania.
Currently Selected:
Malako 1: NTKI57
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nouveau Testament en Kilega © Bible Society of the Democratic Republic of Congo, 1957.
