Malako 2
2
Yesu Ekonia Muntu Wabezaga na Lungu.
Mat. 9:1-8; Lk. 5:18-26.
1Nu abasile ku Kapenuma kusila kua bindi bimozi, nu bongule buno eli mu numba. 2Nu kazanga kongo beingi bakundamene, nu ku luibi takuakukawa lingo: nu abasambalide idagi. 3Nu bamuvuilide na muntu wabezaga na lusambo lua kugilimina ekua na bantu banazi. 4Nu tabavuamaga kuika kueli kubuno kuabezaga musanganano, nu babotuede gantata numba gago gabezaga: nu gabasilile kubotola, bagezezie mugu wa wono wakuaga na lungu. 5Nu Yesu gamonine ku bukatizio buabo atendile wakuaga na lungu bune, Muana wane, misako za buagi buobe zasigililua. 6Tondo basanzi bamozi babezaga kuko, bakengede mu mitima zabo buno, 7kubuni muntu wono akutenda bubo? ekulinga Kalaga: nazi unavuama kusigilila misako za buagi, uteli Kalaga wenyene? 8Nu kazanga kongo Yesu amenyine bubakukengela mu mitima zabo, abatendile bune, Kubuni mukukengela bubuno mu mitima zeinyu? 9Buni buatinga busoga, kutenda ku wono uli na lusambo lua kugilimina bune, Misako za buagi buobe zasigililua; aba kutenda bune, Emanuka, nu utole mugu wobe, wende? 10Buno mumenye buno, Muana wa muntu eli na buangato mu kisi buakusigilila misako za buagi (abuide wabezaga na lusambo lua kugilimina), bune 11Nkukubula bune, Emanuka, nu weke mugu wobe, nu wende kuobe ku numba. 12Nu emanukile, nu kazanga kongo ekile mugu wage, nu asigile bansania; nu bansania bangamine, nu baganuine Kalaga, batendile bune, Isue tatumonaga lingo ku bubuno.
Yesu Ekumana Lewi. Lingo Izina Liage Matayo.
Mat. 9:9-13; Lk. 5:27-32.
13Nu atukile lingo endile lisilia lia kiziba; nu musanganano unsania wamuendede, nu abeigisizie. 14Nu gabezaga esatinga, amonine ku Lewi muana wa Alufayo abezaga ekile ku mulimo wa kuligia idigo, nu amubuide bune, Nyange. Nu azanzukile nu amuyangile.
15Nu gabezaga esalia idia ku numba zage, bandelelombe nu bagi beingi beikede na Yesu nu beigisibua bage: kubuno kuabezaga beingi kuko, nu bamuyangaga. 16Nu gamuene basanzi nu baFalese buno ekulia na bagi nu bandelelombe, babuzizie beigisibua bage bune, Kubuni kuakulia nu kunua na bandelelombe nu bagi? 17Nu Yesu gongule ku bubo, abatendile bune, Batakusamba tabaneiyanina musakizi, tondo basambi: nsiavule kumana beisanana, tondo bagi.
18Nu beigisibua ba Yoana nu baFalese babezaga bekugila; nu bavule nu bamutendile bune, Kubuni beigisibua ba Yoana nu beigisibua ba baFalese bakugila, tondo beigisibua bobe tabakugila? 19Nu Yesu abatendile bune, Bana ba musongi ndi banavuama kugila, ndi bekile na musongi? Mu nkungu zibeli na musongi, tabanavuama kugila. 20Tondo bindi bikatikibua musongi, ubindi bibakagila.
Misumo.
Mat. 9:16, 17; Lk. 5:36-39.
21Takuli muntu unalanda kibe kia nsulu za mubalabala ku nsulu za mukungio; kubuno nsulu za mubalabala nti zata zezo za mukungio, nu itengu nti liaba inene nunse. 22Takuli muntu ukongolaga maku meituba mu tutembe tukulu; ndi amongola mu tuto tutembe nti tuabuga, nu maku, nti makubuka, nu tutembe nti tuabiga: tondo bakongolaga maku meituba mu tutembe tuto.
Yesu eli Mukota wa Busi bua Sabato.
Mat. 12:1-8; Lk. 6:1-5.
23Nu gatingaga Yesu mu masoa busi bua sabato, beigisibua bakalile mabela. 24Nu baFalese bamutendile bune, Kubuni beigisibua bobe bekukita butakulungana ku mulembe busi bua sabato? 25Yesu abatendile bune, Ndi tamusomaga bubo buakitile Davidi, gabezaga ekukua na nzala, we, nu banyage babezaga nage? 26Buingide mu numba za Kalaga mu nkungu zabezaga Abiatala sankoga munene, nu alile tumpampa tuakitagua tulolesio, tutakulungana ku mulembe kulibua nongo gantata na basankoga bobenyene, nu akasile banyage babezaga nage? 27Nu abatendile buae, Busi bua sabato buakitilue ku bantu, tondo bantu tabakitilue ku busi bua sabato: 28bubo Muana wa muntu eli mukota wa busi bua sabato.
Currently Selected:
Malako 2: NTKI57
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nouveau Testament en Kilega © Bible Society of the Democratic Republic of Congo, 1957.
