“Vreugde vir vandag”

Om vandag met vreugde te leef, is nie altyd eenvoudig nie. Die wêreld is net nie meer veilig nie. Om op ons paaie te bestuur, is ’n uitdaging en inbrake, kapings en verkragting is deel van elkedagse gebeure.

In Psalm 118:24 lees ons dat vandag die dag is wat die Here gemaak het, ’n dag om oor te juig en bly te wees. Die Here het vandag vir jou gegee om tot die eer van sy Naam te leef. Die Here het hierdie dag geskep en verwag van jou om dit te gryp en voluit te leef. 

Die keuse oor hoe jy die dag gaan inkleur, lê volkome in jou hande. Ons besef dit nie, maar jou houding wanneer jy opstaan, bepaal jou dag. As jy depressief opstaan, gaan die dag waarskynlik so uitdraai. As jy die dag met entoesiasme aanpak, kan daar net verrassings op jou pad wag. As jy jou dag saam met die Here begin, is dit ’n stap in die regte rigting. Jou fokus is dan op die Here, en die keuse van die rigting van jou dag is gegrond met jou oë op die Here.

Die opdrag in die tweede deel van die vers vir vandag is merkwaardig. Ons moet bly wees oor die nuwe dag en ons moet juig daaroor. Waar gaan jy ’n duideliker opdrag kry dat jy die dag met blydskap moet aanpak? Dis nie ’n “besluit maar hoe jy voel”-opdrag nie. Nee, dit is duidelik en ondubbelsinnig. Wees bly oor nog ’n dag wat die Here aan jou lewe toegevoeg het en leef hierdie dag voluit asof dit jou laaste dag is. Leef die dag met vreugde, en eer die Here daarin.

GEBED: Here, dankie vir hierdie nuwe dag in my lewe. Help my om uit dankbaarheid en met vreugde hierdie dag aan te pak. Amen.

Hierdie oordenking is geneem uit MET ’N LIED IN DIE HART deur Marietjie Joubert © Christelike Uitgewersmaatskappy. Besoek www.cumbooks.co.za vir meer inligting.