Elke Verlangende HartVoorbeeld

'n Nederige Diensmeisie en haar Wonderlike God

Sy was 'n ongetroude en binnekort swanger tiener uit die onbelangrike dorpie Nasaret. Volgens haar eie opinie was sy niemand van belang nie. Tog het die engel Gabriël nuus vir haar gehad wat die teendeel gesê het. Hy het vir haar gesê dat God haar baie goedgunstig was en dat sy as die mees geseënde óóit onder vroue beskou sou word.

Haar ondeurgrondelike voorreg was dat sy swanger sou word en 'n Seun sou baar, die Messias, en sy koninkryk sou geen einde hê nie. Miskien was die skokkendste van alles, die feit dat sy as 'n maagd die Messias sou dra.

As enige vrou rede gehad het om paniekerig te raak oor die nuus van 'n onverwagte swangerskap, was dit Maria. Haar situasie was byna onmoontlik om te verduidelik en kon haar sosiaal ruïneer. Maria se reaksie op hierdie nuus was egter so anderwêrelds; net soos die boodskapper wat dit oorgedra het. Dit het 'n jong hart geopenbaar wat so deurtrek was met die waarhede van die Woord van God dat niks haar kon ontstel nie.

Maria se lied, of die Loflied, het oorgeloop van aanbidding vir wat God vir haar, Israel en toekomstige geslagte gedoen het. Terwyl jy dit lees, dink aan hoe Maria se hart daarna verlang het om God te aanbid en te dank.

1. Sy het dankie gesê vir die geskenk

Oorweldig met lof, het Maria meer as twintig keer na God in haar lied verwys, en agt keer het sy Hom geprys vir wat Hy gedoen het. Haar hart was ingestel om God se werking in elke area van haar lewe raak te sien. Maria se grootste begeerte was om die Naam van die Here groot te maak.

2. Sy het dankie gesê vir die toekoms

Maria het die toekomstige reddingswerk gesien wat God sou doen deur die Seun wat sy gebaar het. Selfs in haar jeugdigheid het sy besef dat God besig was om die normale sosiale orde omver te werp en haar as 'n nederige diensmeisie op te hef.

3. Sy het dankie gesê vir die verlede

As gevolg van haar deeglike begrip van die Skrif, kon Maria haar besondere omstandighede sien in die lig van alles wat God reeds vir Israel gedoen het. Sy het haar aandeel in God se ingrypende verlossingsverhaal gesien en terug verwys na die verbond met Abraham. God was in die verlede getrou en sou voortgaan om getrou te wees te midde van al haar onbekendes.

Maria was die eerste wat erken het dat sy net 'n nederige diensmeisie van die Here was. God het egter verby haar stand gesien en haar die wonderlikste voorreg gegee wat Hy ooit aan enige vrou gegee het.

Sedert Eva is ons almal onder die vloek van sonde gebore, maar Maria se Seun was die uitsondering. Nie omdat Maria sondeloos was nie, maar omdat Jesus uit die Heilige Gees gebore is.

Maria was geseën, en haar lied het 'n jong hart geopenbaar wat oorloop van danksegging en ontsag. Oordink haar woorde en probeer om haar nederigheid en erkenning van haar onwaardigheid voor God na te volg. Wanneer ons dít doen, sal ons vir God sien soos Maria het — as die ware verlange van ons harte.

• Dank God vir jou verlede, hede en toekoms. Hoe het sy getrouheid aan jou in die verlede jou vertroue in Hom nou en in die toekoms verhoog?
• Hoe herrangskik God jou liefde om Hom meer lief te hê?
• Hoe roep God jou om vandag meer dankbaarheid te betoon?