7 dae van hoop om eetversteurings te oorkomVoorbeeld

Die Waarheid Sal Seëvier

Daar is baie faktore ter sprake om eetversteurings te oorkom, maar dit is geweldig belangrik om negatiewe selfgesprekke te vervang. Wat in ons denke is, word dit wat ons glo; en wat ons glo, word uiteindelik wie ons is. Die wetenskap ondersteun nie net hierdie begrip nie, maar die Bybel bevestig dit in Spreuke 4:23: "Wees veral versigtig met wat in jou hart omgaan, want dit bepaal jou hele lewe." 

Ons denke is kragtiger as wat ons besef. Terwyl ons ons gedagtes en gedrag herhaal, word senuweebane in die brein geskep, wat patrone is wat gewoontes kan vorm. Dit neem slegs 20 herhalings om so 'n senuweebaan te vorm en net 40-50 herhalings om 'n gewoonte te skep. Dink dus na: hoeveel keer per dag dink jy aan selfvernietigende gedagtes? 

Dit kan skrikwekkend wees om daaroor na te dink. Miskien het jy daardie 20-merk bereik nog voordat die dag verby is. Daarom is dit so belangrik om bedag te wees op wat jy oor jouself dink en sê. Paulus het in sy tweede brief aan die Korintiërs verduidelik waarom jy jou selfgesprekke moet verander, en hoe jy dit kan regkry: 

"Daarmee vernietig ons die redenasies en elke hooghartige aanval wat teen die kennis van God gerig word. Ons neem elke gedagte gevange om dit aan Christus gehoorsaam te maak" 2 Korintiërs 10:4-5.

As jy gedurig vir jouself sê: "Ek is nie goed genoeg nie," "Hulle sal my nooit liefhê as ek so bly nie," "As ek net meer soos _____ gelyk het," "God moes my anders geskep het, ” en so aan, sal jy uiteindelik glo dat daardie gedagtes waar is. Om egter daardie gedagtes te glo, is om aan Christus ongehoorsaam te wees; God het nie en sal nooit daardie dinge oor ons sê nie.

Inteendeel, die vyand doen dit beslis en sal beslisaanhou om dit te doen. Hy is die vader van leuens, wie se doel is om ons die ergste oor onsself te laat glo. As hy ons kan oortuig dat ons onvoldoende is, weet hy dat hy ons in ons spore sal laat vries, en ons sal nie die werk waartoe God ons geroep het, kan voltooi nie. Wanneer ons egter luister na ons hemelse Vader, die een wat verklaar: "Ek is die waarheid," sal ons onsself begin sien soos Hy sien: geliefd, geroepe, Syne, waardig, 'n kind van die lig, uitverkies en verlos. Sjoe! Kan jy jou indink wat kan wees as jy kies om te glo dat ditis wie jy is? God is waarheid. Hy is nie tot leuens in staat nie. Hy het dit van jou gespreek, en jy is vry om dit te glo. Neem elke gedagte gevange wat jou anders vertel, vervang dit met sy waarheid en leef in die vryheid van wie God vandag sê jy is.