Wysheid vir GeestesgesondheidVoorbeeld

Ligtoring Vyf: Ontkoppel

Ons brein kan gevange geneem word en in 'n kringloop van angstige gedagtes en vrese verstrik raak. Daardie oomblikke kan ons hopeloos laat voel, maar daar is altyd 'n uitweg. Kom ons ontdek vandag hoe om vrede te vind wanneer ons deur negatiewe gedagtes oorweldig word.

Op sekere maniere is ons brein net soos elke ander deel van ons liggaam. Wat ons dit voer maak saak. Terwyl die kos wat ons eet, ons geestesgesondheid beïnvloed, is die inligting wat ons ons brein voer net so belangrik.

Vra jouself af: Wat voer jy jou brein?

Lukas 6:45 sê vir ons dat ons woorde en dade ons gedagtelewe sal weerspieël. Alhoewel ons nie altyd in beheer van ons gedagtes is nie, het ons 'n mate van beheer oor hoe ons ons gedagtes vul.

Jy weet reeds van alles in die lewe en aanlyn wat vrees, vergelyking, negatiwiteit en hopeloosheid aanwakker. Om te veel tyd aan daardie dinge te bestee, sal jou geestesgesondheid beïnvloed. Daarom is dit raadsaam om te ontkoppel.

Ontkoppeling kan wees om jou toestel weg te sit en tyd in die buitelug deur te bring. Jy kan die Skrif oordink of na 'n hoopgewende liedjie luister. Jy kan ook kies om 'n vriend te skakel wanneer jy vasgevang voel in al hoe meer bekommernis en twyfel.

Om te ontkoppel is nie om in ontkenning te leef nie. Jy probeer nie jou probleme ignoreer of maak asof dit nie jou lewe beïnvloed nie. In plaas daarvan is ontkoppeling 'n doelbewuste keuse om stil te staan, asem te skep en bewus te wees.

Ligtorings in die storm

Uitdagings met geestesgesondheid kan soos 'n storm voel. Met wysheid uit die Bybel kan ons egter ligtorings bou om ons hoop te gee. Genade, vriende, gebed, die Skrif, en ontkoppeling sal nie dit wat jy in die gesig staar laat verdwyn nie, maar dit kan jou aanmoedig en jou rigting gee terwyl jy na vrede beweeg.

Bid: Vader, U hou my hele lewe in u hande. Ek vertrou U, en ek weet U het my lief. Help my om maniere te vind om te rus, te ontkoppel van die lewe, en weer met U te verbind. Dankie dat U my ondersteun. Lei my asseblief na gesonde stappe vorentoe. In die Naam van Jesus. Amen.

Uitdaging: Oor die afgelope vyf dae het ons wysheid vir geestesgesondheid uit die Bybel ondersoek. As jy seer het, of jy ken iemand wat geestesgesondheid uitdagings in die gesig staar, kan hierdie gids 'n nuttige volgende stap wees.