Wysheid vir GeestesgesondheidVoorbeeld

Ligtorings

Uitdagings ten opsigte van geestesgesondheid kan jou laat voel asof jou gedagtes in die oop see vasgevang is. Sommige dae is rustig, terwyl ander chaoties is. Enige dag kan 'n oomblik van vrede, skrikwekkende storms of doellose ronddryf meebring.

Hoe kan ons ons onvoorspelbare geestesgesondheid hanteer? En hoe kan ons vorentoe beweeg as ons nie weet of ons verstand sal saamwerk met ons planne, verantwoordelikhede en drome nie?

Kom ons verbeel ons ons is op 'n regte skip in die middel van 'n hewige storm. Ons het nie 'n GPS-toestel om ons te lei nie, en ons weet nie of ons op die punt is om in 'n ander skip vas te vaar of 'n rotsagtige krans te tref nie. Ons enigste gids is 'n klein ligpunt wat van 'n ligtoring op die kus kom.

Ligtorings is effektiewe hulpmiddels wat matrose gebruik om te navigeer. Hulle laat storms nie weggaan nie; hulle verskaf leiding om matrose te help om gesonde keuses te maak.

Wat is jou Ligtorings? Wie is die mense wat jy nader wanneer jy neerslagtig of angstig voel? Watter hulpmiddel kan jou help om hoop te vind?

Oor die volgende paar dae gaan ons 'n paar geestesgesondheid-ligtorings identifiseer. Ons sal deur die Skrif kyk en wysheid ontdek om ons te help om hoop, hulp en rigting te vind. Kom ons begin.

Ligtoring Een: Gee Jouself Genade

Jou geestesgesondheid hou verband met baie dinge, soos jou: liggaam, gewoontes, verhoudings, chemiese samestelling van jou brein, ervarings en geestelike lewe. Uitdagings met betrekking tot geestesgesondheid is kompleks en dikwels buite ons beheer.

Miskien word jou geestesgesondheid beïnvloed deur wêreldgebeure of 'n onlangse verlies. Miskien het jy 'n klinies gediagnoseerde geesteskrankheid, en jy probeer blywende gemoedsrus vind. Dit maak nie saak waardeur jy gaan nie, jou uitdagings met geestesgesondheid is nie tekens van swakheid nie.

Miskien voel jy ook skaamte, hartseer en verleentheid weens jou geestesgesondheid. Indien wel, is jy nie alleen nie. Weet egter net: God is nie kwaad, gefrustreerd of skaam oor jou geestesgesondheid nie. In plaas daarvan wil Hy jou help om hoop en genesing te vind.

Haal dus vandag asem en gee jouself genade. Ongeag die oorsprong van dit wat jy in die gesig staar, God is met jou, en Hy het jou lief.

Bid: Vader, dankie dat U by my is wanneer ek verlore voel. Gee my asseblief krag deur u genade sodat ek vrede kan vind. In die Naam van Jesus. Amen.