Bruikbaar vir GodVoorbeeld

Doelgerig

Die wêreld word al hoe meer bedrewe om verhale te vertel wat God verloën. Namate hierdie verhale posvat, loop Christene 'n groter risiko om fokus te verloor. Ons leer "die gewoontes van die heidennasies" aan en is bang vir die "tekens aan die hemel" (Jeremia 10:2). Sodoende word ons versoek deur die heidennasies se sinlose gebruike (Jeremia 10:3). Kortom, ons aandag word afgelei.

Afleiding is 'n subtiele weg na afgodery. Terwyl die volke in die tyd van Jeremia 10 na "hulle afgode" kyk wat "so min praat as ‘n voëlverskrikker in 'n komkommerland", begin ons vertrou op dit wat "nie kan praat nie", "nie kan loop nie" en "geen mag [het] om goed of kwaad te doen nie" (Jeremia 10:5). Met ander woorde, ons gee onsself oor aan dit wat nie net afleiding kan bewerkstellig nie.

In plaas daarvan om op die sinlose "gebruike van die heidennasies" te vertrou, moet Christene hulle verlustig in die uniekheid en grootheid van die Here (Jeremia 10:6). Die wysheid van die nasies is niks anders as hout nie. Hulle is almal "gekke en dwase" (Jeremia 10:8). Hoe indrukwekkend die kwalifikasies en voorkoms van diegene wat afgode skep, ook al mag wees, hulle werk verbleek in vergelyking met die Here, wat "die ware God" is (Jeremia 10:9-10). Geen afgod, nasie of volk kan "teen sy woede dit uithou nie" omdat Hy die "Koning vir altyd" is (Jeremia 10:9-10).

Ons aandag kan vinnig afgelei word deur die optrede en gebruike van nasies. Ons is te vinnig om ons tot afgode te wend wanneer die lewe moeilik raak. Afgode is maklik om te volg omdat dit nie van ons vereis om te verander nie. Dit bied die skyn van veiligheid op die korttermyn en trek ons aandag weg van wat God in ons lewens en in die wêreld doen.

Om soos die heidennasies bang te wees oor die "tekens aan die hemel", verblind ons om te erken dat daar niemand soos God is nie (Jeremia 10:7). Die aanvaarding van die bekommernisse van diegene wat nie die Here ken nie, trek ons aandag daarvan weg om in die Here se wysheid te lewe.

Ons moet versigtig wees om nie weggevoer te word deur teorieë en argumente wat misleidend is nie (vgl. Kolossense 2:8). Ons moet die afleidings vermy wat ons daarvan weerhou om aan die voete van Jesus te sit (Lukas 10:38-42) of om ons oë op Jesus te vestig (Hebreërs 12:2). Ons fokus moet daarop wees om dissipels vir Jesus Christus te wees, en te maak, deur aandag te skenk aan die wysheid van God en koers te hou op die weg wat Hy aangewys het (Psalm 17:5).