Bruikbaar vir GodVoorbeeld

Biddend

Jesus se onderrig oor gebed volg 'n eenvoudige patroon met die herhaling van die frase "as jy bid". Hy vertel ons hoe om nié te bid nie (Matteus 6:5, 7) en dan hoe óm te bid (Matteus 6:6, 9-13).

Jesus waarsku eers teen gebed om deur ander vereer te word (Matteus 6:5). Hy is nie gekant teen openbare gebed as sodanig nie. Jesus self het nie altyd in die geheim gebid nie (Matteus 15:36; Lukas 23:34, 46). Sy besorgdheid is egter dat gebed nie gebruik moet word om 'n mens se vroomheid te demonstreer "sodat die mense [julle] kan sien" (Matteus 6:5) nie. Die klem hier is op die beloning wat 'n mens ontvang deur die goedkeuring van diegene wat 'n mens se vroomheid deur openbare gebede erken. Jesus beveel aan dat gebed tot God gerig moet word, wat diegene sal beloon wat sy goedkeuring soek, eerder as dié van die wêreld (Matteus 6:6).

Jesus waarsku ook om nie soos die heidene te bid nie. Sonder enige leiding van hulle gode het die heidene dikwels probeer om hulle gode in gebed te manipuleer (Matteus 6:7). Om tot waardelose gode te bid, vereis sinlose woorde. Jesus wil nie hê sy volgelinge moet bid asof hulle God nie ken nie, maar om te erken dat "julle Vader weet wat julle nodig het, nog voordat julle dit van Hom vra" (Matteus 6:8).

Jesus raai dan sy volgelinge aan om te bid dat God se Naam as heilig erken sal word (Matteus 6:9) en dat sy wil op die aarde geskied net soos in die hemel (Matteus 6:10). Ons moet bid vir wat ons daagliks nodig het en nie meer nie (Matteus 6:11). Ons moet om vergifnis vra vir ons oortredings soos ons ook dié vergewe wat teen ons oortree het en ook vir verlossing van versoeking deur die Bose (Matteus 6:12-13).

Hy sluit af deur die verband te beklemtoon tussen vergewensgesindheid en om deur die hemelse Vader vergewe te word. Diegene wat nie bereid is om te vergewe nie, sal nie vergifnis ontvang nie (vgl. Markus 11:25). Ons bereidwilligheid om te vergewe, is 'n teken van die genade wat ons ontvang het en ons gereedheid om vergewe te word (vgl. Matteus 18:21-35).

Om 'n biddende volk te word, vereis dat ons die basiese eienskappe van gebed verstaan. Dit is nie iets wat ons doen om ons vroomheid aan ander te demonstreer, of om God te manipuleer om óns wil te doen nie. In plaas daarvan is dit 'n manier om ons begeertes in pas met God se begeertes te bring, en ons lewens in God se hande te plaas deur tot 'n gehoor van Een te bid en Hom te vertrou om ons van alles te voorsien wat ons ooit nodig sal hê.