Oorwin Die TwyfelVoorbeeld

Gryp die dag

My vrou, Jill, het ’n jasmynheining geplant. Die geur is soms oorweldigend, maar heerlik! Dit herinner my altyd aan die wonderlike lewe wat die Here vir ons gegee het. Dit laat my dink aan die woorde: Carpe Diem. Dit beteken om die meeste te maak van die tyd wat ons gekry het. Gryp die dag! Jesus sê: “Moet julle nie oor môre bekommer nie. Môre sal sy eie bekommernisse bring. Vandag se moeilikhede is vir een dag heeltemal genoeg” (Matteus 6:34). Begin om vir vandag te lewe.

Party van ons is so bekommerd oor môre en al die dinge wat dalk nooit eens gaan gebeur nie. Moenie twyfel nie. Moenie uitstel nie. Begin daadwerklik leef in die oomblik. Soek die wil van die Here en jaag dit na. Gaan koop ’n bos blomme vir jou vrou. Maak daardie spesiale aandete vir jou man. Vra haar om te trou. As jy nie met haar wil trou nie, beëindig die verhouding.

Ons moet almal die dag gryp. Ons moet uit die boot klim. Doen daardie ding wat jy nog altyd wou doen. Leef die droom en geniet ’n wonderlike dag. Onthou, as God vir jou is, is daar niks wat teen jou kan wees nie (Romeine 8:31).

Hierdie oordenkings is saamgestel uit ALLES WAT EK NODIG HET deur Angus Buchan © Christelike Uitgewersmaatskappy.