Wie is Jesus? Deel 3Voorbeeld

Anders Gebou

In hierdie hoofstuk vind ons nog 'n ongewone vraag wat Jesus gebruik om ons van sy koninkryk te leer. Hierdie keer is dit Jakobus en Johannes se ma wat namens haar seuns 'n guns vra. 

"… Sy sê vir Hom: ‘Belowe my dat hierdie twee seuns van my in u koninkryk langs U mag sit, een aan u regterhand en die ander een aan u linkerhand’” Matteus 20:21. 

Sjoe. Onbeskroomd. Sy het nie regtig geweet waarvoor sy vra nie, behalwe 'n ereplek vir haar kinders. Dit volg in die trant van Petrus se vraag uit die laaste hoofstuk. Wat kry my kinders eintlik daaruit om U al die tyd te volg, Meneer? Hoe kan U dit die moeite werd maak? 

Hier is Jesus se antwoord. Hy herlei weer die fokus: 

"Jesus roep hulle toe nader en sê: 'Julle weet dat dit by die nasies so is dat die regeerders oor hulle baasspeel, en dat die groot manne die mag oor hulle misbruik. Maar by julle moet dit nie so wees nie. Elkeen wat in julle kring groot wil word, moet julle dienaar wees; en elkeen wat onder julle die eerste wil wees, moet julle slaaf wees. So is dit ook met die Seun van die mens: Hy het nie gekom om gedien te word nie maar om te dien en sy lewe te gee as losprys vir baie mense'” Matteus 20:25-28.

Jesus is anders en Hy het 'n heel ander soort koninkryk ingestel. In vergelyking met die koninkryke van hierdie wêreld, waar die sterkes oor die swakkes regeer het, het konings dikwels met selfdienende dekrete gelei, en mense met mag het diegene wat minder bevoorreg is, onderdruk, Jesus se koninkryk is onderstebo en agterstevoor. Dit is 'n koninkryk waar die grootstes die minste dien, die Koning lei met onbaatsugtige liefde, en diegene met mag gebruik dit tot voordeel van ander. 

Jesus is nie die soort koning wat sy mense stuur om vir hom te sterf nie. Hy is die soort koning wat Homself gewillig vir sy volk opgeoffer het. By Hom gaan dit nie oor mag, voorreg of posisie nie. Dit gaan oor diens, opoffering en nederigheid. Dit is die kenmerke wat lei tot grootheid in die koninkryk van die hemel. 

Hoe kan ons dus voortgaan om ons denke om te draai? Hoe kan ons leer om in hierdie koninkryk te leef saam met hierdie Koning wat so anders is? Ons hou ons oë gevestig op Jesus. Hy is die Pionier, die Stigter van die hele proses. Dit gaan alles oor Hom.