Wie is Jesus? Deel 1Voorbeeld

Sal Jy Vir 'n Leuen Sterf?

In hierdie hoofstuk verklaar God hard en duidelik dat Jesus sy geliefde Seun is. God se luide stem uit die hemel, verklaar hierdie waarheid oor Jesus by sy doop! Ons vind verwysings na Jesus se goddelikheid regdeur sy bediening. Sy ouers word aangesê om Hom Immanuel te noem. Dit beteken "God by ons". Toe Jesus sy dissipels gevra het wie hulle dink Hy is, het Petrus geantwoord: "U is die Christus, die Seun van die lewende God" (Matteus 16:16). Jesus het ook die volgende oor Homself gesê. Hy het gesê Hy het al voor Abraham bestaan, dat Hy die Vader gesien het en dat Hy die vermoë en gesag het om sonde te vergewe. Dit is alles dinge wat net vir God moontlik is!

Wat doen ons met hierdie inligting? Kan ons vir Johannes glo as hy sê dat ons God mens geword het en tussen ons kom woon het? 

As ons kyk na die aansprake wat Jesus gemaak het, het ons drie opsies: ons kan glo dat Jesus 'n leuenaar is, dat Hy gek is of dat Hy Here is. C.S. Lewis lewer sy kommentaar oor hierdie keuse as volg: 

“Ek probeer voorkom dat mense hierdie werklik dwase ding oor Jesus kwytraak, wat hulle dikwels oor [Jesus] doen: Ek aanvaar Jesus as die groot morele leermeester, maar ek aanvaar nie sy aanspraak dat Hy God is nie. Dit is die een ding wat ons nie moet sê nie. 'n Man wat bloot 'n mens is en die soort dinge gesê het wat Jesus gesê het, sou nie 'n groot morele leermeester wees nie. Hy sou of as gek beskou word — soos bv. iemand wat glo hy is 'n gekookte eier — of hy sou beskou word as die duiwel reguit die hel. Jy moet jou keuse maak. Hierdie man was nog altyd die Seun van God; of 'n gek; of iets erger. Jy kan Hom stilmaak en sê Hy is 'n dwaas of jy kan op Hom spuug en doodmaak as 'n duiwel. Of jy kan aan sy voete neerval en Hom Here en God noem. Moet egter nie enige neerhalende snert kwytraak dat Hy 'n groot morele leermeester is nie. Hy het nie daardie keuse vir ons gegee nie. Dit was ook nie deel van sy plan nie.”

Die een ding wat Jesus nie kan doen nie is om bloot 'n goeie leermeester te wees nie. Hy het daarop aanspraak gemaak dat Hy God is. Dus, Hy het of gelieg, of Hy was heeltemal gek of Hy het die waarheid gepraat. Was Jesus 'n leuenaar? Daar is nie baie mense wat sal doen wat Jesus gedoen en deurgemaak het vir 'n leuen nie. Hy is onherkenbaar gemartel en het toe die grusaamste dood gesterf deur in sy eie bloed te verdrink. Al wat Hy moes doen om dit stop te sit, was om te erken dit alles is 'n klug. Nee, Jesus was nie 'n leuenaar nie. 

Wel, was Jesus dan 'n gek? Het Hy in 'n dwaal gelewe? Mense sal 'n gek vir 'n rukkie volg — terwyl dit vermaaklik is. Maar niemand sal sterf ter wille van vermaak nie. Die vroeë volgelinge van Jesus het almal geweldig gely vir hulle lojaliteit aan Hom en sy boodskap. Selfs nadat hulle gemartel en in die tronk gegooi is, het hulle nie opgehou om Christus te verkondig nie — sy dood en opstanding. Nee, Jesus was nie 'n gek nie. 

Daar bly net een opsie oor: Jesus het die waarheid gepraat. Hy is ons Here … Immanuel, God by ons. Wat is ons reaksie? Sal ons soos Petrus reageer op die vraag wie Jesus is?

U is die Christus, die Seun van die lewende God.