Gebede om God te KenVoorbeeld

"Hulle het mekaar toegeroep: 'Heilig, heilig, heilig is die Here, die Almagtige! Die hele aarde is vol van sy heerlikheid!'"

— Jesaja 6:3 (NLV)

Bewondering

Hemelse Vader, ek gee erkenning aan u heiligheid en ek staan voor U in verwondering oor u heiligheid. U is soos die engele in u teenwoordigheid verklaar het: "Heilig, Heilig, Heilig". Daar is niemand soos U nie. Niemand verpersoonlik alles wat heiligheid behels en beteken soos U nie. U is uitsonderlik. U is rein. U is volmaak. U is uniek. U is buitengewoon. U is aan die buitekant, maar tog van binne. U bestaan uit 'n ongeëwenaarde mate van heiligheid.

Vandag, in my hart, verhef ek u Naam en die volle mate van wie U is. Ek loof U en staan in verwondering omdat ek weet dat U alleen dié titel en dié eienskap kan opeis: Heilig is U.

Belydenis

Vader, ek bely dat ek dikwels nie vir U die eer gee wat u heiligheid verdien nie. Dit sou vir my makliker wees om teenoor U op te tree soos ek moet as U in fisieke vorm voor my was, want dan sou ek voor u heiligheid te staan gekom het — óf in gestalte, teenwoordigheid, mag óf al drie tesame. Ek sou weet om eerbiedig te staan of uit respek stil te bly. Ek sou weet om my kop te laat sak wanneer U verbyloop. Omdat U egter die God is wat in die Gees en in waarheid wandel, faal ek dikwels om U te vereer soos ek moet. Die lewe se verpligtinge en eise lei my aandag te maklik af.

Vergewe my tekort aan eer vir u heiligheid. Vergewe my vir die ligsinnige manier waarop ek U partykeer benader of versuim om te erken hoe groot, volmaak en magtig U is. Vergewe my dat ek dit wat dalk mag gebeur vrees, eerder as om U met bewondering te vrees. Laat my met ‘n groeiende gewaarwording van u heiligheid lewe – sodat ek teenoor U kan optree soos ek moet en U respekteer soos ek moet.

Danksegging

Dankie Here, dat U eg en heilig bly. Dankie dat U nie verander in ‘n wêreld van toenemende agteruitgang van dit wat moreel en suiwer is nie. U het Uself op geen manier laat verminder nie. U het u heiligheid gehandhaaf, te midde van die rumoer van 'n gebroke samelewing.

Dankie dat U sterk staan vir dit wat reg, suiwer en heilig is. Dankie dat U nooit wankel, u houvas verloor of die wat U volg mislei nie. Dankie dat U vir my die insig gee om te begryp hoe ware heiligheid lyk en hoe heiligheid, besluite en gedrag kan beïnvloed. Slegs wanneer my verhouding met U groei en dieper word, sal ek die weg na persoonlike heiligheid vind wat, volgens u Woord, my na ‘n lewe van seën en guns sal lei (Matteus 5:8).

Smeekgebed

Vader, u Woord dryf my om na heiligheid te streef, want U is heilig (1 Petrus 1:16). Lei my, volgens u wysheid en Woord, na ‘n leefstyl wat beide innerlike en uiterlike heiligheid kweek in alles wat ek doen en sê. Laat my woorde min wees tensy hulle hierdie karakter van U weerspieël — heiligheid. Laat wat ek doen, gedoen word vanuit ‘n hart wat daarna smag om U beter te ken en daarna streef om my weë by u weë aan te pas.