God se Genade Voorbeeld

Klim van die Prestasie Trapmeul af

'n Trapmeul is 'n oefenapparaat wat iemand toelaat om op dieselfde plek op 'n bewegende band te loop of hardloop. Die persoon se treë vermeerder, maar hy bly op dieselfde plek — fisies gaan die persoon nêrens heen nie. 

As Jesus se volgelinge doen ons soms dinge wat ons glo God gelukkig sal maak of dat Hy ons liewer sal hê. Ons doen soms iets uit pligsbesef vir Hom, eerder as gevolg van ons verhouding met Hom. Ons dink wat ons doen sal ons nader aan Hom bring. Wanneer ons onsself op hierdie pad bevind, het ons onwetend op 'n prestasie trapmeul geklim — ons doen baie, maar ons bly op dieselfde plek. Dink na oor hierdie teenstrydige stellings:

• In plaas daarvan om die Bybel te lees om God se liefde te verdien, lees ons dit om van God se liefde te leer. 
• In plaas daarvan om kerk toe te gaan om 'n geestelike taak af te merk, gaan ons kerk toe om God saam met ander volgelinge van Jesus te aanbid.
• In plaas daarvan om goed oor onsself te voel as gevolg van wat ons doen, vind ons ons waarde in wie God sê ons is.

Aan die begin is die prestasie trapmeul maklik, maar mettertyd word dit al hoe moeiliker om by te bly. Op 'n dag klim ons af en gee moed op omdat ons dinge vir die verkeerde redes doen. Daar sal altyd nog iets wees wat ons dink ons moet doen om God se liefde te verdien. As ons glo God het ons lief as gevolg van ons goeie prestasie, sal ons altyd wonder wanneer sy liefde gaan ophou as ons nie ons doel bereik nie.

Dit is noodsaaklik om van die prestasie trapmeul af te klim om sodoende in vryheid in Christus te kan lewe. Ons verhouding met God, nie ons dade nie, moet die fondament van ons geloof wees. God se liefde vir ons sal nie eens 'n bietjie verminder nie, al hou ons vir 'n jaar op Bybellees en bid. Ons sal natuurlik nie so naby aan Hom voel nie, maar dit is net omdat ons nie tyd saam Hom deurgebring het nie. Dis 'n gebrek aan verbintenis, nie 'n gebrek aan liefde nie. 

Verlossing kom uit genade deur geloof. Dit is vir ewig volbring. Ons ontvang nie die ewige lewe deur ons dade nie. Dit is genade wat ons red en ons goeie dade is 'n neweproduk van die verlossing wat ons ontvang het. 

Noudat hierdie leesplan ten einde kom, laat ons onthou dat genade voortdurend vernuwe. Met elke mislukking kan ons van voor af begin asof ons niks verkeerd gedoen het nie. God se genade gee nie vir ons toestemming om te sondig nie, maar is 'n geleentheid om die genade wat ons ontvang te deel. Wanneer ons onthou hoe nodig ons genade het, word dit makliker om dit te gee. 

Dit is wat God se genade so wonderlik maak.