Vergewe

"U soek nie net my woorde,

U soek my hart.

U klee my met verlossing,

In ruil vir my smart."

Het jy al ooit gevoel asof jy nie weet wat om te bid nie? Asof jy nie die regte “towerwoorde” ken om God se hart te draai nie?

Die liedjie "Vergewe" begin met ‘n herinnering dat God nie net ons “towerwoorde” soek nie - Hy soek ons hart. Net soos met enige ander verhouding in ons lewens, gaan dit nie net daaroor om die regte ding op die regte tyd te sê nie - dit gaan oor ons hart.

God soek ‘n hart wat oop en gebroke is teenoor Hom. Dit is vir Hom baie meer waardevol as gevleuelde woorde met verskuilde bymotiewe.

Die God van die ewigheid, wat alles oor ons weet — ons diepste drome, vrese, hope, en al ons sondes raaksien — het ons vergewe en ons sondes verruil vir verlossing. 

Wanneer ons bewus word van hierdie vergifnis, het ons ‘n besluit om te neem. Hoe reageer ons teenoor Hom? 

God soek ‘n eerlike reaksie op sy goedheid en guns, net soos ‘n bruidegom ‘n eerlike reaksie soek van sy bruid op die troudag. Ons is die bruid van Christus, en Hy soek nie net ons woorde nie, Hy soek ons hart.

U kan die hele Vredevors EP nou kry op alle musiek platvorms hier