Dapper GebedeVoorbeeld

Hier Is Ek. Stuur My!

Oeps. Vandag se gevaarlike gebed is die "stuur my"-gebed. Ons staan almal op die punt om binne sestig sekondes van ons gemaklike rusbank na die warm Saharawoestyn te gaan. Miskien nie. Om die waarheid te sê, as jy versigtig is om die "stuur my"-gebed te bid omdat jy bang is dat God jou na een of ander ver land kan stuur, hoef jy nie bang te wees nie. God gaan jou waarskynlik nie na 'n ver land stuur nie.

Soos baie van ons, is jy waarskynlik nie vir so iets gereed nie. Ek kan nie namens God praat nie, maar om mee te begin, wed ek jou dat Hy gelukkig sal wees om die meeste van ons wat in ons lui gemaksones is, net oorkant die straat te stuur om ons bure te ontmoet. Lees weer daardie laaste sin, en glimlag oor God se geduld.

“Stuur my” beteken om die eie-ek sirkelgang te verlaat waaroor ons op dag een gepraat het. Hierdie gebed gaan daaroor om God te vra om ons uit ons eie wil na Syne te stuur. O, en net omdat God jou nie iewers heen sal stuur voordat Hy gereed is nie, beteken dit nie jy sal voel dat jy gereed is nie. Kyk na die dissipels. Hulle was vissermanne wat predikers geword het, en hulle het 'n paar baie slinkse en afstootlike dinge in hul eerste paar jaar gedoen en gesê. Petrus het een soldaat se oor afgekap voordat hy Christus teenoor 'n ander verloën het. 'n Paar weke later, het hy met groot vrymoedigheid 'n skare van duisende toegespreek en hulle gelei om die Christelike kerk te begin.

Vandag se gebed is deur Jesaja 6:8b geïnspireer. Die profeet Jesaja het pas die stem van die Here gehoor wat vra wie Hy as boodskapper kon uitstuur om sy woord aan sy volk te verkondig. Jesaja het geantwoord: "... Hier is Ek! Stuur My!" Jesaja moes 'n visioen gekry het om deur God gestuur te word. Ons het dit nie nodig nie. Jesus het sy laaste woorde op hierdie aarde gebruik om ons te vra om sy boodskappers aan alle mense te wees. Die sendingopdrag is om ons uit te stuur. Wanneer ons bid: "Stuur my," vra ons nie vir 'n nuwe opdrag nie — ons aanvaar die een wat Hy reeds vir ons gegee het. Net soos Petrus, sal ons dalk foute maak, maar ons is reeds gestuur. Kom ons begin!

Bid: Jesus, Petrus was net 'n visserman, en ek is net 'n ________. Tog aanvaar ek die sendingopdrag waartoe U my geroep het. Ek gaan die Heilige Gees nodig hê om my die dapperheid en krag te gee om dit te kan uitvoer. Ek is so gereed as wat ek ooit sal wees. Waar wil U my gebruik? Amen.