Hou Op Om Bekommerd Te WeesVoorbeeld

Herinner Jouself

Bekommernis is ons onvermoë of onwilligheid om God te vertrou. Eina, dit maak ietwat seer, nie waar nie? As ons regtig oor kommer nadink, moet ons erken dit ontstaan omdat ons nie weet of God sal doen wat ons wil hê Hy in ons lewens moet doen nie. Dus is ons bekommerd en stel vrae te midde van ons twyfel. Sal Hy ...

... ons kinders beskerm?
... ons huwelike herstel?
... vir ons gesinne sorg?
... genesing bring?

Aangesien ons nie weet wat voorlê nie, moet ons kies om in geloof te wandel en die God te vertrou wat ons leer ken het. As ons onsself herinner aan wat Hy in die verlede gedoen het, kan ons in die hede gerus wees en hoop vir die toekoms hê. Daar is soveel waaraan ons oor God se vermoë en karakter kan dink. Hier is net 'n paar dinge:

• Hy is ewig, word nooit moeg of afgemat nie, terwyl Hy ons terselfdertyd versterk (Jesaja 40:28). 
• Hy is ons Voorsiener, slaap nooit nie, maar in plaas daarvan waak Hy oor ons (Psalms 121: 2-4).
• Hy verleen 'n oorweldigende oorwinning aan ons en laat nooit toe dat iets ons van sy liefde skei nie (Romeine 8: 35-39).
• Ons kan al ons bekommernisse op Hom werp omdat Hy so intens vir ons omgee (1 Petrus 5: 7).

Hierdie God, ons God, is die Een op wie ons kan vertrou. Daar is nêrens iemand soos Hy nie. Hy is almagtig, alwetend en alomteenwoordig. Daar is geen plek waar ons kan kom, waar Hy nie alreeds is nie. Hy begelei, troos, verskaf, versterk en voorsien vir ons omdat ons sy kinders is, en Hy ons baie liefhet. As ons onsself daaraan herinner en dit elke dag uitleef, sal dit help om die simptoom van kommer uit ons lewens uit te roei. 

Ons is nie gebore om kommervrate te wees nie. Ons is gebore om krygsmanne te wees. Dieselfde krag wat ons Verlosser uit die dood opgewek het, stel ons hemelse Vader ook vir ons beskikbaar. Dit is wat God oor ons sê:

• Hy sê dat ons sy kinders en erfgename saam met Jesus Christus is (Romeine 8:17).
• Hy noem ons meer as oorwinnaars (Romeine 8:37).
• Hy het ons as sy meesterstuk nuut gemaak om goeie werke te verrig (Efesiërs 2:10).
• Hy het ons gekies, en ons is sy eie besittings (1 Petrus 2:9).
• Hy het ons uit die duisternis geroep in sy wonderlike lig (1 Petrus 2:9).

Om te keer dat bekommernis ons lewens oorneem, verg net 'n voorneme van ons kant af. Ons moet ophou met giftige, kommerwekkende gedagtes, sodat dit ons nie verhinder om die lewe te leef waarvoor God ons geroep het nie. Ons doen dit deur aanspraak te maak op die waarheid van God, dit op ons lewens toe te pas en God in geloof te vertrou omdat ons nie kan sien wat môre inhou nie. Ons God is te alle tye goed en het die heel beste plan vir ons uitgewerk om aan deel te hê. 

Oordink

• Wat is die belangrikste boodskap wat jy uit hierdie leesplan wegneem? Hoe gaan jy dit in jou lewe toepas?