Die Einde Van Ek Deur Kyle IdlemanVoorbeeld

Swak om Sterk te Wees

In Corrie ten Boom se boek "Tramp for the Lord", vertel sy van 'n vrou wat sy tydens die Koue Oorlog toe Christene vervolg is, in Rusland ontmoet het.

Corrie skryf die ou vrou het op 'n bank gelê. Veelvuldige sklerose het 'n geweldige uitwerking op hierdie vrou gehad. Haar liggaam was in elke rigting verdraai, en sy was afhanklik van kussings om haar te stut. Sy het geen beweeglikheid gehad nie, dus het haar man sy tyd deurgebring met haar versorging. Die wysvinger van haar regterhand was al wat sy kon beheer. Niks anders nie.

Daardie vinger het egter soveel vermag. Dit het heeldag en tot laat in die nag oor 'n tikmasjien-sleutelbord beweeg en woorde en sinne en paragrawe getik terwyl sy die Bybel en ander Christelike boeke in Russies vertaal het.

Haar man het toegekyk en opgemerk dat dit dikwels lank geneem het vir die gerimpelde vinger om 'n toets te slaan — maar dit het aanhou beweeg, letter vir letter, deur die Bybelboeke.

Toe kom kuier Corrie ten Boom. Sy het na die verdraaide geraamte op die bank gekyk en deernis het haar oorval. Sy het gebid: “O, Here, hoekom genees U nie hierdie arme vrou nie?”

Die man het gesien hoe diep geraak die besoeker was en gesê: “God het 'n doel met haar siekte. Elke ander Christen in die stad word fyn deur die geheime polisie dopgehou. Omdat sy al so lank siek is, kom niemand ooit by haar nie. Hulle laat ons alleen en sy is dus die enigste persoon wat onopgemerk kan vertaal.”

Dit is dus onakkuraat om te sê dat God gewerk het ten spyte van haar swakheid. Die waarheid is dat Hy déúr haar swakheid op 'n kragtige manier verheerlik is. Jy sal jammer voel vir daardie vrou, net soos ek. Die presiese ding wat ons wou wegwens en wegbid, juis dáárdie ding wat klaarblyklik haar lewe vernietig, die stekelrige doring wat soveel pyn veroorsaak het, was 'n heilige plek wat 'n baie swak vrou toegelaat het om 'n pilaar van krag in God se koninkryk te word.