7 Dae Om 'n Meer Vrygewige Persoon Te WordVoorbeeld

Vrygewig met ons bemoediging.

Vriendelike woorde kan kort en maklik wees om te sê, maar hulle weerklank kan waarlik eindeloos wees. - Moeder Teresa

Woorde het krag. Terwyl dit ons miskien nie fisies kan seermaak nie, kan dit beslis ons gees beskadig. Wat as ons kies om ligbringers te wees in hierdie wêreld waar dit lyk of daar 'n oorvloed van mismoedigheid is? Wat as ons ons dae deurbring deur op die uitkyk te wees vir plekke/mense waar ons bemoedigers kan wees en iemand anders se lewe verlig? Kom ons maak dus seker ons woorde en dade bring bemoediging eerder as om mense te verkleineer. 

Hier is sommige maniere hoe ons vriendelikheid in 'n mens se dag kan bring:

As jy 'n vriendelike gedagte het, sê dit.
Dit is waarskynlik een van die moeiliker dinge vir mense om te doen. Dit is óf omdat ons nie gedurig aan mooi dinge dink aangaande mense nie, óf ons is bang vir hoe hulle gaan reageer. Sal hulle sê: "Dankie," of sal hulle nie ons vriendelikheid waardeer nie, omdat dit hulle ongemaklik laat voel wanneer hulle gekomplimenteer of bemoedig word? Ons kan nie toelaat dat enige van dié twee ons terughou daarvan om gehoorsaam te wees aan die aansporing van die Heilige Gees nie. As ons verplig word om iemand aan te moedig met ons woorde, moet ons dit uitspreek.

As jy 'n behoefte sien waaraan jy kan voldoen, doen dit.
Ons sien elke dag mense met behoeftes. Dit kan die ma wees met die skreeuende kleuter by die kruidenierswinkel, wat haar beursie by die huis vergeet het en nie vir haar kruideniersware kan betaal nie. As ons die finansiële vermoë het om haar te help, kom ons help haar. Miskien is dit die ouer man wat lyk of hy nie iets kan optel of 'n deur kan oopmaak nie. Ons sal hom heel waarskynlik kan help. Behoeftes hoef nie groot te wees om 'n verskil in iemand se lewe te maak nie. Ons kan 'n bron van bemoediging wees in die kleinste dade. 

As jy 'n las sien, bid daarvoor.
Die meeste van ons wens ons het meer vir ander mense gebid. Maar ons doen dit net nie. Ons sê: "Ek sal vir jou bid" en dan doen ons dit nie en voel dan sleg omdat ons nie het nie. In plaas van om te sê dat ons sal bid vir iemand, kom ons bid net. Ons kan selfs in daardie oomblik bid ... in die openbaar! Ons het geen idee wat daardie soort optrede vir iemand sal beteken nie. Of ons kan net in stilte bid en dan later 'n boodskap stuur wat sê: "Ek het vandag vir jou gebid!" 

Mag ons oë hê om geleenthede en maniere raak te sien om vandag en elke dag 'n impak op iemand te hê. Hulle is oral om ons. 

Oordink

• Is dit maklik vir jou om ander te bemoedig? Hoekom?
• Watter een van die bogenoemde voorstelle sal jy elke dag begin implementeer om iemand op te bou?
• Voor jy die dag afsluit, bemoedig iemand.