Ek Ken Jou: Oordenkings Van "Time of Grace"Voorbeeld

Ek weet van jou verdrukkings en armoede

Ons almal hou daarvan om die gelukkige verhale van oorwinnings in die lewens van Christene te hoor. Wanneer iemand 'n getuienis bring, eindig dit gewoonlik met 'n oorwinning. Mense luister graag na die toespraak van 'n wenner. Wie wil nou 'n getuienis hoor van 'n Christen wat deur verdrukkings gaan en nie sy rekeninge kan betaal nie?

God wil dit hoor. Hy wil nie net van ons hoor as dit goed gaan, as ons baie geld het, goed voel, 'n werk het of ons gesin gesond is nie. Hy ken ons en is nog steeds lief vir ons al het ons bloedkanker, veelvuldige sklerose, serebrale verlamming of Down-sindroom. Hy het ons lief wanneer ons in 'n prokureur se kantoor sit en bankrot verklaar word of dokumente vir 'n egskeiding ontvang. Hy het ons lief selfs al is ons in die tronk, 'n rehabilitasiesentrum of wanneer ons psigiatriese behandeling ondergaan.

Hy weet dat ons gebroke mense is. Dis hoekom Hy geweet het dat Hy 'n Redder moes stuur, want ons kon onsself nie red nie. Dit is wat God vir die Christene in Smirna gesê het: "Ek ken julle verdrukking en julle armoede, en tog is julle ryk ..." (Die Openbaring 2:9). Hulle rykdom, en ons s'n, is nie op geld, eiendom of 'n besigheid gebaseer nie. Dit is gebaseer op sy liefdesverbond met ons deur die heilige lewe en werk van Jesus Christus. Hulle rykdom, en ons s'n, is gebaseer op ons lidmaatskap van God se familie asook ons vrymoedigheid om vir God "Vader" te noem.