RusteloosVoorbeeld

Gister het ons vasgestel dat die oplossing om van die oorsprong van ons rusteloosheid ontslae te raak, in sabbatsrus gevind kan word. Môre sal ons kyk hoe prakties ons as Christene dit in die 21ste eeu kan toepas. Maar eers moet ons kyk na wat die sabbat nie vir vandag se Christen is nie. Die beste plek om te begin is by die oorsprong van die sabbat.

Toe God die tien gebooie aan Moses op die berg Sinai oorhandig het, het hy beveel dat die Israeliete op die sewende dag van elke week moet rus. Dit was 'n teken van God se verbond met sy volk. Natuurlik is die sabbat gebaseer op God se eie dag van rus na die eerste week van sy skeppingswerk. 

In die Ou Testament is die sabbat met streng reëls en regulasies nagekom. Byvoorbeeld, die Israeliete was verbied om vure aan te steek (Eksodus 35:3), kos te versamel (Eksodus 16:23-29) en op die markplein handel te dryf (Nehemia 10:31). En die straf vir die opsetlike oortreding van die sabbat was niks anders as die dood nie (Eksodus 31:14-15).

Met die verloop van tyd het die Israeliete die sabbat tot wettiese uiterstes geneem, tot so 'n mate dat toe Jesus na die aarde gekom het, selfs genesing op die sabbat as 'n sonde beskou is. Nadat die Fariseërs gesien het hoe Jesus iemand op die sabbat genees en sy dissipels koringare in die lande gepluk het, het hulle hom gekonfronteer oor sy skynbare onwettige optrede. Lees Matteus 12. Jesus se reaksie was om te verklaar: "Die Seun van die mens is immers Here oor die sabbat" (Matteus 12: 8), wat daarop dui dat 'n nuwe verbond in die persoon van Christus hier is. In Markus se weergawe van dieselfde gebeure, word Jesus se woorde so aangeteken: "Die sabbatdag is vir die mens gemaak en nie die mens vir die sabbatdag nie" (Markus 2:27). Met ander woorde, Jesus sê dat die sabbat deur Hom nie meer 'n opdrag van die wet is nie. In plaas daarvan is dit 'n genadegawe vir die rusteloses. 

Wat het Jesus bedoel dat die sabbat nou vir die mens is? Hoe kan ons op 'n praktiese manier voordeel uit daardie geskenk trek? En hoe kan ons vandag gereeld rus, sonder om ons rus wetties en uitmergelend te maak? Dit is die vrae wat ons op die laaste dag van hierdie leesplan sal beantwoord.