Om na God te LuisterVoorbeeld

God Het Iets Om Vir Jou Te Sê

Een van die belangrikste lesse wat ons kan leer is hoe om na God te luister. In ons ingewikkelde en besige lewe is niks méér belangrik, méér nodig en lonend as om te hoor wat God vir ons wil sê nie — beide as 'n liggaam van gelowiges en as individuele mense.

Jy mag dalk vra: "Praat God egter vandag regtig nog met ons?" Die Bybel verseker ons dat Hy dit doen. Die boek Hebreërs begin so: "In die verlede het God baie keer en op baie maniere met ons voorvaders gepraat deur die profete, maar nou, in hierdie laaste dae, het Hy met ons gepraat deur die Seun. God het Hom deur wie Hy die wêreld geskep het, ook erfgenaam van alles gemaak" (Hebreërs 1:1-2).

Ons God is nie 'n sprakelose God nie. Hy is lewend en aktief in ons wêreld — en Hy praat! Ook praat Hy nie in onverstaanbare terme, raaisels of geheimenisse nie. Hy praat duidelik met ons. Die primêre doel van enige kommunikeerder is nie om goed te praat nie, maar om gehoor te word. God praat op 'n manier wat ons Hom kan hoor, sy boodskap duidelik kan ontvang en presies verstaan wat Hy wil hê ons moet doen.

God praat beide in algemene en spesifieke terme met alle mense en Hy praat persoonlik met elkeen van ons. Ons kan skaars daardie moontlikheid met ons beperkte denke verstaan. God is 'n ewige God en Hy is in staat om met elkeen van ons te kommunikeer net daar waar ons is — te midde van ons huidige omstandighede of krisisse — op 'n baie persoonlike, direkte en duidelike wyse.

Dit kan die belangrikste begrip wees wat jy ooit moet verstaan as jy wil leer hoe om na God te luister. Wanneer God praat, praat Hy met jóú. Alles in die Bybel is op een of ander wyse op jou lewe van toepassing. Elke boodskap wat op die Woord van God gebaseer is, bevat die waarheid en is vir jou bedoel. Daar is nie 'n hoofstuk in die Bybel, 'n preek wat op die Woord van God gebaseer is, of 'n boek wat die Woord van God uiteensit en verduidelik, wat nie vir jou bedoel is nie. Elkeen van ons moet die Woord van God persoonlik opneem.