Verkondig die evangelie van Jesus ChristusVoorbeeld

WEES LIEF VIR JOU VYANDE

Ek sê vir julle: Julle moet julle vyande liefhê, en julle moet bid vir dié wat vir julle vervolg, sodat julle kinders kan wees van julle Vader in die hemel.  Matteus 5:43-45 

Die Ten Booms was ‘n Hollandse familie wat tydens die Tweede Wêreldoorlog Jode in hulle huis versteek het. Toe die Nazi’s die Jode daar vind, het hulle die hele familie na ‘n konsentrasiekamp geneem, waar hulle baie swaargekry het. Corrie het haar suster, Betsie, wat baie siek was, in haar arms vertroos. Toe sy sterf, het een van die wagte ‘n graaf na haar toe gegooi en gesê: “Begrawe self jou suster!” 

Ná die oorlog het Corrie eendag ‘n groep mense toegespreek. Skielik het sy ‘n man in die gehoor gesien en hom herken as die wag in die konsentrasiekamp. Toe sy ná die byeenkoms by die deur staan om die mense te groet, het hierdie man na haar toe gekom, sy hand uitgesteek en haar om vergifnis gevra. Corrie het versteen. Sy het na God om hulp geroep. Die Heilige Gees het vir haar gefluister: “Vergewe hom en wees lief vir hom.” Sy het die man se hand geneem en gevoel hoe die genesende krag van God deur haar skouer en arm tot in hulle ineengestrengelde hande vloei. “Ek vergewe jou met my hele hart, “het sy uitgeroep. Corrie ten Boom het gesê sy het God se liefde nog nooit so intens geken as op daardie oomblik nie. 

Het jy woede en bitterheid in jou hart? Laat dit aan die voet van die kruis. Vergewe jou vyande en wees lief vir hulle. Jesus sal jou met sy vrede vul. 

Here Jesus, ek wil hierdie woede en bitterheid nie een tree verder dra nie. Help my om almal wat my seergemaak het te vergewe. Amen