Vind VredeVoorbeeld

Oorwin Vrees 

Baie mense dink die teenoorgestelde van vrees is hoop, moed of krag. Eintlik is die regte teenoorgestelde betekenis van vrees geloof. As vrees verlamming veroorsaak, steel dit nie net ons vrede nie, maar dit val die fondament van ons vrede aan — ons geloof. Ons verloor ware vrede as vrees teenwoordig is. 

Die meeste vrese is gewortel in die feit dat ons twyfel dat God teenwoordig is, dat Hy regverdigheid sal laat geskied of ons sal help, of in staat sal wees om ons krisis te kan hanteer. Geloof sê: "Ja, God is hier. Ja, God sal voorsien. Ja, God is tot alles in staat!"

Die meeste vrees is ook gewortel in bedreigings — soms dreigende woorde, soms dreigende gedrag. Geloof sê: "Ek sal nie getraumatiseer word deur enige dreigemente nie. Ek sal wys optree en nie bang wees nie. Ek glo God sal verhoed dat enige bedreiging wat my pad kruis, my sal benadeel. En as dit sy wil is dat die dreigement wel my pad kruis, glo ek dat God my sal help om die bedreiging te hanteer."

Toe Saul, koning van Israel, besef dat God sy salwing en seën van hom af weggeneem het (as gevolg van sy verwaandheid en ongehoorsaamheid), en dit aan die jong Dawid gegee het, was hy woedend. Hy het 'n veldtog geloods om Dawid te soek en te vermoor, sodat die bedreiging uit sy lewe verwyder kon word (1 Samuel 19). Dawid het op sy beurt weer bedreig gevoel deur Saul se weermag en menigmaal vir sy lewe gevrees. Die Skrif leer ons egter dat Dawid versterk was deur God se beloftes van beskerming en dat hy eendag koning van Israel sou word.

In ons hedendaagse wêreld lees ons dikwels van mense wat, ten spyte van vreesaanjaende gedagtes van siekte, ongelukke of gevaar, steeds voortgegaan het, ongeag 'n onsekere uitkoms — dinge soos verwerping, mislukking en ja, soms oorwinning. Ek kan dink aan arktiese ontdekkingsreisigers, olimpiese atlete, sendelinge, entrepreneurs en filantrope. Bedreigings hoef ons nie noodwendig altyd te stuit of te laat tou opgooi nie.

Ons uitdaging, in terme van die bedreiging, gaan dus nie oor wat dalk kan gebeur nie, maar eerder om op dit wat ons weet die waarheid is, te fokus.

Baie mense leef vandag onder 'n donker wolk van bedreiging. Sommige beleef die bedreiging van siekte, sommige staar bedreiging of besering van hul kinders in die gesig, en sommige hoor gerugte dat hulle hul werk kan verloor.

Die antwoord op al hierdie bedreigings is geloof in wat ons weet waar is van die God wat ons dien, en van sy liefde en omgee vir ons, sy vermoë om altyd in al ons behoeftes te voorsien — veral sy vrede, wat ons deur enigiets dra wat ons deurmaak.