Verlosser - Die Belofte VervulVoorbeeld

Lees: Maleagi 3:1, Lukas 1:13-17

SOAP: Lukas 1:17

Maleagi het geprofeteer dat daar 'n boodskapper sou wees wat 'n weg vir die Messias sou oopmaak. Daardie persoon was Johannes die Doper. Johannes was die seun van Sagaria en Elizabeth, wat 'n neef van Maria was. Lukas 1 vertel die storie oor hulle. Die Bybel sê dat Sagaria 'n priester was en dat hulle geen kinders gehad het nie omdat Elizabeth onvrugbaar was en hulle te oud was om 'n baba te hê.

Maar hulle was mense van geloof. Lukas 1: 6 sê dat hulle altwee regverdig was voor God en dat hulle onberispelik was in alle gebooie en verordeninge van die Here. Hulle was ook 'n paartjie wat gebid het. Wanneer die engel aan Sagaria verskyn terwyl hy by die tempel aan diens is, is die eerste ding wat die engel vir hom sê: "jou gebed is verhoor." Watter gebed het God beantwoord? Die een vir 'n seun! Hierdie egpaar, selfs al was hulle te oud om kinders te baar, het voortgegaan om te bid vir 'n wonderwerk.

Hul seun Johannes was 'n belangrike deel van die profesie omdat die volk deur sy bediening sou weet dat die Messias oppad was. Van godvresende ouers sou die kind gebore word wat "voor die Here sal uit gaan in dieselfde gees en krag as Elia, om vaders en kinders met mekaar te versoen, om ongehoorsames op die regte pad terug te bring en om so vir die koms van die Here 'n volk voor te berei." 

Soms bid ons oor iets vir 'n lang, lang tyd. Ons bid vir die verlossing van 'n gade of kind. Ons bid vir 'n roeping of 'n bediening. Ons bid dat God daardie spesiale persoon vir ons sal bring. Maar na jare van opregte gebed, gee ons op uit moedeloosheid. Wanneer ons op daardie punt is, begin ons soms - op die kleinste maniere - om die liefde wat God vir ons het, te betwyfel. Maar God het altyd lief. Sagaria het geen idee gehad dat God die grootste begeertes van sy hart sou beantwoord nie - en selfs meer dat sy seun die belangrike taak sou hê om die weg vir Jesus voor te berei. Wat 'n wonderlike antwoord!

Hemelse Vader, daar is geen gebed wat in u teenwoordigheid verspil is nie. Help my om te onthou dat wanneer ek volgens u wil bid, U op magtige maniere antwoord, soos u Sagaria en Elizabeth se gebed beantwoord het.

Mini Uitdaging: Deel met 'n vriend of familielid 'n gebedsversoek van jou wat God op 'n verrassende manier beantwoord het. Oorweeg ook om 'n paar uitdagende, moeilike gebedsversoeke met mekaar te deel en te verbind julle daartoe om vir die volgende paar weke daarvoor te bid.