Man van GodVoorbeeld

Die Regte Begin

Die eerste stap na regte manlikheid, is geestelike wedergeboorte: "Moenie verbaas wees dat Ek vir jou gesê het: Julle moet opnuut gebore word nie" (Johannes 3:7). Die belangrikste behoefte van elke gesin is 'n vader wie se hart aan Christus behoort. 

Hoekom?

Omdat ons van nature geestelik dood is, aangesien dit "julle oortredinge [is] wat skeiding gebring het tussen julle en julle God (Jesaja 59:2). Jy kan nie sien wie die Here wil hê jy vir jou gesin moet wees nie — of wat jou gesin van jou nodig het nie — omdat jou oortredinge jou heeltemal van sy teenwoordigheid afgesny het en jy daarom nie sy leiding kan ontvang nie.

Juis daarom moet jy glo dat Jesus vir jou sondes aan die kruis gesterf het en dat sy offer genoeg was om jou met die Vader te versoen. Wanneer jy vir Jesus sê dat sy dood aan die kruis genoegsame betaling vir jou sondes was, en jy Hom vra om in jou hart te kom en jou te vergewe, te reinig en in jou te woon, sal Hy op daardie oomblik in jou lewe kom en jou verlossing is dan gewaarborg deur die Heilige Gees wat in jou woon (Efesiërs 1:13-14). 

Die man is die hoof van sy huis en wanneer Christus in sy hart kom woon, is hy ten volle toegerus om sy gesin se geestelike leier te wees. Christus wat in hom woon, help hom om die man te word wat hy moet wees. 

My vriend, as jy Christus nie aanneem nie, ontneem jy jou gesin van die een ding wat hul bo alles nodig het — geestelike leierskap. Indien jy egter 'n man van God is, kan die Here jou verander, sodat jy alles is wat jou gesin nodig het — 'n man met die wysheid, genade en krag om fisiek, emosioneel en geestelik na hulle om te sien. Daar is geen plaasvervanger vir 'n eggenoot en vader wat gered is nie.