Lewensbeginsels Waarvolgens Jy Kan LeefVoorbeeld

Veg Jou Gevegte op Jou Knieë

Lewensbeginsel 8: Veg al jou gevegte op jou knieë, dan sal jy altyd wen.

Geloof is om aan God te sê: "Ek glo U sal." In ons geveg met die vyand, mag ons dalk ook só bid: "Ek glo U sal die vyand oorwin, en hom laat vlug as ek hom weerstaan en my vertroue in U plaas." Oor en oor het Dawid hierdie geloofsverklaring aan die Here afgelê: "my God, op U vertrou ek ..." (Psalm 25:2) en "In u hande gee ek my lewe oor ..." (Psalm 31:6). Perfekte geloof sien die stryd as klaar gestry en God wat die oorwinning behaal. Toe Dawid gesê het: "Op U vertrou ek", het hy bedoel: "Dit is reeds gedoen. Vader, U wese is volmaak. U doen alles perfek. U oorwin ook my vyande." Hy het God se vermoë onvoorwaardelik vertrou. Daar was geen sweem van: "Ek hoop Hy sal" nie, want Dawid het geweet dit is so goed as reeds gedoen.

Ons groei in geloof deur vertroue, deur God in elke situasie te vertrou, keer op keer, verhouding na verhouding. Ons bou 'n persoonlike geskiedenis van gehoorsaamheid aan God, waartydens Hy onvoorwaardelik getrou en liefdevol teenoor ons bly.

Dis onmoontlik vir jou om die duiwel vir lank te weerstaan, as jy nie glo dat Jesus deur jou, die vyand kan (en sal) verslaan nie. Jy kan slegs standvastig in jou geloof wees, wanneer jy jou totaal en al aan God oorgee op alle terreine van jou lewe. As jy weier om 'n probleemarea aan God toe te vertrou, sê jy: "Ek kan dit self doen, ek het U nie nodig nie." Dit is presies wat die Satan wil hê jy moet doen — vertrou op jou eie vermoëns en nie op dié van ons almagtige God nie. Dit is ook die plek waar die duiwel sy grootste aanval teen jou sal loods!

Die goeie nuus is dat God elkeen van ons 'n mate van geloof gegee het om te ontwikkel. Hy gee ons ook die vermoë om Hom te vertrou en ons lewens aan Hom oor te gee. Ons kan vasstaan en die vyand teenstaan, maar slegs deur die krag van God. Hy is die Een wat ons gebede hoor en ons verdedig. Wanneer ons bid, vlug die Satan.