Lewensbeginsels Waarvolgens Jy Kan LeefVoorbeeld

Ons Intimiteit Met God

Lewensbeginsel 1: Ons intimiteit met God — sy hoogste prioriteit vir ons lewens — bepaal die impak op ons lewens.

Een van ons grootste behoeftes is om te weet dat ons geliefd is. Elkeen van ons moet diep in ons hart seker wees dat iemand ons liefhet, omgee vir ons en ons beste belange op die hart dra. Dit is hoe God ons ontwerp het. Hy wil hê ons moet weet dat Hy ons met 'n passievolle intensiteit liefhet wat te diep is om te verwoord. 

God het mense gemaak met verhoudinge in gedagte — eerste met Homself en dan met ander. Ons kan nie mekaar ten volle liefhê totdat ons nie die liefde van God ervaar het nie. Ons ervaar sy liefde wanneer ons vrywillig oorgee aan sy oproep om ons Verlosser, Here en Vriend te wees.

Wanneer jy Jesus Christus as jou Verlosser aangeneem het, het Hy jou nie net vergewe nie, maar jou ook nuut gemaak. Jy het toe nie meer op 'n afstand van God gestaan nie, maar dit was moontlik om nader aan Hom te kom.

As jy verslap het in jou toewyding aan die Verlosser en jy voel asof jy elke dag verder wegbeweeg in jou verhouding met Hom, moet jy bid dat Hy jou weereens sal nader trek. Hy ken ons swakhede, en as jy vir Hom vra Hy moet beheer oor jou lewe neem, sal Hy op 'n kragtige manier na jou toe kom en hoop en lig in jou situasie bring — maak nie saak hoe donker en hopeloos dit mag voel nie (Jesaja 55:6-7).