JESAJA 1:1-3
JESAJA 1:1-3 Bybel vir almal (ABA)
Die Here het vir Jesaja gewys wat sal gebeur met Juda en Jerusalem. Dit was in die tyd toe vier konings ná mekaar koning van Juda was. Die konings was Ussia, Jotam, Agas en Hiskia. Jesaja was die seun van Amos. Die Here het gesê: “Die hemel en die aarde moet luister en hoor wat Ek sê: Ek het kinders grootgemaak en Ek het vir hulle geleer hoe om te lewe, maar hulle wou nie luister na My nie. 'n Bees weet aan wie hy behoort, en 'n donkie weet waar sy eienaar vir hom kos gee, maar die Israeliete wil nie naby My wees nie. My volk wil nie aan My behoort nie.”
JESAJA 1:1-3 Afrikaans 1933/1953 (AFR53)
DIE gesig van Jesaja, die seun van Amos, wat hy gesien het met betrekking tot Juda en Jerusalem, in die dae van Ussía, Jotam, Agas en Hiskía, die konings van Juda. Hoor, o hemele, en luister, o aarde, want die HERE spreek: Ek het kinders grootgemaak en verhoog, maar húlle het teen My oortree. 'n Os ken sy besitter en 'n esel die krip van sy eienaar, maar Israel het geen kennis nie, my volk verstaan nie.
JESAJA 1:1-3 Afrikaans 1983 (AFR83)
Die openbaring wat Jesaja seun van Amos ontvang het aangaande Juda en Jerusalem. Dit was in die regeringstyd van Ussia, Jotam, Agas en Hiskia, konings van Juda. Luister, hemele, gee aandag, aarde, want die Here het gesê: Ek het kinders grootgemaak en opgevoed, maar hulle het teen My in opstand gekom. 'n Bees ken sy eienaar en 'n donkie die krip van sy baas, maar Israel ken My nie, my volk het geen begrip van wat Ek doen nie.
JESAJA 1:1-3 Die Bybel 2020-vertaling (AFR20)
Die visioen van Jesaja, seun van Amos, wat hy gesien het aangaande Juda en Jerusalem in die dae van Ussia, Jotam, Agas en Hiskia, konings van Juda. Luister, hemel, en gee aandag, aarde, want die HERE praat: “Kinders het Ek grootgemaak en opgevoed, maar hulle het teen My in verset gekom. 'n Bees ken sy eienaar en 'n donkie die krip van sy besitter. Israel het egter nie kennis nie, my volk toon geen insig nie.”
JESAJA 1:1-3 Contemporary Afrikaans Bible 2023 (CAB23)
Die gesig van Jesaja, die seun van Amos, wat hy gesien het aangaande Juda en Jerusalem in die dae van Ussia, Jotam, Agas en Hiskia, die konings van Juda. Luister, o hemele, en luister, o aarde, want die HERE het gespreek: Ek het kinders gevoed en grootgemaak, en hulle het teen My in opstand gekom. Die os ken sy eienaar en die esel die krip van sy heer, maar Israel weet nie, my volk let nie op nie.
JESAJA 1:1-3 Die Boodskap (DB)
Hierdie is ’n aantal boodskappe in verband met Juda en Jerusalem wat God vir Jesaja die seun van Amos in die vorm van visioene gegee het. Hy het hierdie visioene gesien in die tyd toe Ussia, Jotam, Agas en Hiskia die konings van Juda was. Hemel en aarde, julle moet getuies wees van wat die Here gesê het: Die kinders wat Ek grootgemaak en versorg het, het nou teen My in opstand gekom. ’n Dier soos ’n bees ken sy baas se stem en selfs ’n donkie weet goed waarheen om te gaan om kos te kry, maar nie my volk Israel nie. Dit maak nie saak wat Ek doen nie, hulle verstaan niks.
JESAJA 1:1-3 Nuwe Lewende Vertaling (NLV)
Hier is die visioene wat Jesaja seun van Amos oor Juda en Jerusalem gesien het. Dit was in die tyd dat Ussia, Jotam, Agas en Hiskia konings van Juda was. Luister, hemele! Luister, aarde! Dit is wat die HERE sê: “Die kinders wat Ek grootgemaak en versorg het, het teen My gerebelleer. Selfs die bees ken sy eienaar en die donkie die krip van sy baas, maar my volk Israel weet nie, my volk verstaan niks.”