EKSODUS 24:3-8
EKSODUS 24:3-8 Bybel vir almal (ABA)
Moses het toe gekom en hy het vir die volk alles vertel wat die Here gesê het, al die wette wat Hy gegee het. Al die mense het gesê dit is reg. Hulle het gesê: “Ons sal alles doen wat die Here gesê het.” Moses het toe al die woorde van die Here neergeskryf en vroeg die volgende oggend 'n altaar gebou by die voet van die berg. Daar was twaalf gedenkstene, een vir elke stam van die Israeliete. Moses het die Israeliete se jongmanne gestuur, en hulle het brand-offers vir die Here gebring. Daar was ook bulle vir ete-offers. Moses het die helfte van die bloed geneem en hy het dit in bakke gegooi. Hy het die ander helfte van die bloed teen die kant van die altaar uitgegooi. Hy het die boek geneem waarin hy alles geskryf het oor die verbond wat die Here met hulle gemaak het. Hy het dit vir die mense gelees, en hulle het gesê: “Ons sal alles doen wat die Here gesê het, ons sal gehoorsaam wees.” Moses neem toe die bloed wat in die bakke was en gooi dit op die mense en sê: “Hierdie bloed bewys dat julle belowe om die verbond te hou wat die Here met julle gemaak het.”
EKSODUS 24:3-8 Afrikaans 1933/1953 (AFR53)
Toe Moses kom en aan die volk al die woorde van die HERE en al die verordeninge vertel, antwoord die hele volk met een stem en sê: Al die woorde wat die HERE gespreek het, sal ons doen. En Moses het al die woorde van die HERE opgeskrywe en die môre vroeg hom klaargemaak en onder die berg 'n altaar gebou, en twaalf gedenkstene volgens die twaalf stamme van Israel. En hy het jongmanne van die kinders van Israel gestuur; dié het brandoffers geoffer en as dankoffers bulle vir die HERE geslag. En Moses het die helfte van die bloed geneem en dit in komme gegooi en die helfte van die bloed teen die altaar uitgegooi. En hy het die boek van die verbond geneem en dit voor die ore van die volk gelees. En hulle het gesê: Alles wat die HERE gespreek het, sal ons doen en daarna luister. Toe neem Moses die bloed en gooi dit uit op die volk en sê: Dit is die bloed van die verbond wat die HERE met julle gesluit het op grond van al hierdie woorde.
EKSODUS 24:3-8 Afrikaans 1983 (AFR83)
Moses het toe al die gebooie en bepalings van die Here aan die volk gaan bekend maak. Hulle het soos een man gesê: “Ons sal alles doen wat die Here beveel het.” Toe het Moses al die gebooie van die Here neergeskryf. Vroeg die volgende oggend het hy aan die voet van die berg 'n altaar gebou van twaalf klippe, vir die twaalf stamme van Israel. Hy het toe van die jong Israeliete gestuur om bulle as brandoffers en maaltydoffers vir die Here te offer. Moses het die helfte van die bloed in bakke gehou en die ander helfte op die altaar gesprinkel. Hy het die verbondsboek geneem en dit vir die volk voorgelees. Hulle het gesê: “Ons sal alles doen wat die Here beveel het en daaraan gehoorsaam wees.” Moses het toe die bloed gevat en op die volk gesprinkel terwyl hy sê: “Dit is die bloed van die verbond wat die Here op grond van al hierdie gebooie met julle gesluit het.”
EKSODUS 24:3-8 Die Bybel 2020-vertaling (AFR20)
Moses het gegaan en aan die volk al die woorde van die HERE, en al die bepalings oorgedra. Die hele volk het eenstemmig geantwoord en gesê: “Alles wat die HERE gesê het, sal ons doen.” Moses het al die woorde van die HERE neergeskryf. Hy het vroeg die oggend opgestaan en aan die voet van die berg 'n altaar opgerig en twaalf gedenkstene vir die twaalf stamme van Israel. Hy het jong manne uit die Israeliete gestuur, en hulle het •brandoffers geoffer, en vir die HERE bulle geslag as •maaltydoffers. Moses het die helfte van die bloed geneem en in bakke gegooi. Die ander helfte van die bloed het hy teen die altaar gesprinkel. Toe neem hy die Boekrol van die Verbond en lees dit duidelik hoorbaar aan die volk voor. Hulle het gesê: “Alles wat die HERE gesê het, sal ons doen en gehoorsaam.” Moses het toe die bloed geneem en dit oor die volk gesprinkel en gesê: “Kyk, dit is die bloed van die verbond wat die HERE met julle sluit op grond van al hierdie woorde.”
EKSODUS 24:3-8 Contemporary Afrikaans Bible 2023 (CAB23)
Toe het Moses gekom en aan die volk al die woorde van die HERE en al die verordeninge vertel, en die hele volk het een stem geantwoord en gesê: Al die woorde wat die HERE gespreek het, sal ons doen. En Moses het al die woorde van die HERE opgeskrywe en die môre vroeg klaargemaak en 'n altaar onder die heuwel gebou en twaalf pilare volgens die twaalf stamme van Israel. En hy het jongmanne van die kinders van Israel gestuur wat brandoffers gebring het en dankoffers van beeste aan die HERE gebring het. En Moses het die helfte van die bloed geneem en dit in komme gegooi; en die helfte van die bloed het hy op die altaar gesprinkel. En hy het die boek van die verbond geneem en voor die ore van die volk gelees, en hulle het gesê: Alles wat die HERE gespreek het, sal ons doen en gehoorsaam wees. En Moses het die bloed geneem en dit op die volk gesprinkel en gesê: Hier is die bloed van die verbond wat die HERE met julle gesluit het oor al hierdie woorde.
EKSODUS 24:3-8 Die Boodskap (DB)
Moses het toe na die volk toe gegaan en vir hulle alles gesê wat die Here vir hom gesê het. Hy het ook vir hulle die reëls gegee wat die Here vir hom gegee het. Die hele volk het toe geantwoord asof hulle uit een mond praat: “Ons sal alles doen wat die Here van ons verwag.” Moses het ook alles neergeskryf wat die Here vir hom gesê het. Hy het vroeg die volgende oggend ’n plek aan die voet van die berg gaan bou waarop hulle vir die Here kon offer. Hy het ook vir elkeen van die twaalf families ’n regop klip rondom die altaar ingeplant. Hy het toe twaalf jong Israeliete laat kom. Hulle het offers wat verbrand word en offers wat voor die Here geëet word, vir die Here gebring. Hy het van die bloed van die diere wat geoffer is, in bakke opgevang. Van die bloed het hy oor die offerplek uitgegooi. Terwyl die volk na hom staan en luister, het Moses vir hulle die reëls voorgelees wat hy neergeskryf het. Daarin het die Here gesê wat Hy verwag van mense met wie Hy ’n ooreenkoms gesluit het. Hulle het toe weer ’n keer gesê: “Ons sal gehoorsaam wees. Ons sal alles doen wat die Here van ons verwag.” Moses het van die bloed in die bakke oor die volk gesprinkel terwyl hy sê: “In ooreenstemming met die reëls wat ek vir julle voorgelees het, sluit die Here nou met hierdie bloed formeel ’n ooreenkoms met julle.”
EKSODUS 24:3-8 Nuwe Lewende Vertaling (NLV)
Moses het na die volk toe afgegaan en vir hulle alles gesê wat die HERE beveel het. Hulle het soos een man geantwoord: “Ons sal alles doen wat die HERE gesê het!” Moses het alles wat die HERE vir hom gesê het, neergeskryf. Hy het vroeg die volgende oggend opgestaan en ’n altaar aan die voet van die berg gaan bou. Hy het rondom die altaar twaalf klippe ingeplant. Dit was vir die twaalf stamme van Israel. Daarna het hy jong Israeliete laat kom en hulle beveel om bulle vir die HERE te offer. Dit was brandoffers en vrede-offers vir die HERE. Hy het ’n deel van die offerdiere se bloed in houers opgevang. Die ander helfte het hy oor die altaar gesprinkel. Daarna het Moses die Boek van die Verbond gevat en vir die volk daaruit gelees. Hulle het weer almal soos een man geantwoord: “Ons sal alles doen wat die HERE gesê het! Ons sal daarna luister!” Moses het toe van die bloed in die houers gevat en oor die volk gesprinkel. Hy het gesê: “Hierdie bloed bevestig die verbond wat die HERE met julle gesluit het toe Hy hierdie woorde vir julle gesê het.”