AMOS 8:1-14

Deel

AMOS 8:1-14 Bybel vir almal (ABA)

Die Here het vir my gewys wat Hy wil doen. Daar was 'n mandjie vrugte, en die Here het vir my gevra: “Amos, wat sien jy?” Toe sê ek: “Ek sien 'n mandjie vrugte. Hulle is ryp en dit is tyd om hulle te eet.” Die Here het toe vir my gesê: “Dit is nou die tyd. Ek sal my volk, die Israeliete, se sonde nie weer vergewe nie. Wanneer Ek kom om hulle te straf, dan sal die mense in die koning se paleis nie meer sing nie, hulle sal huil. Daar sal baie lyke wees. Die vyande sal nie praat nie, hulle sal die lyke oral op die grond gooi. “Luister na wat Ek sê. Julle doen slegte dinge aan die arm mense, julle wil die mense wat niks het nie, doodmaak. Julle sê: ‘Wanneer is die Nuwemaan-fees verby? Dan kan ons weer koring verkoop. Wanneer is die Sabbatdag verby? Dan kan ons weer ons koringwinkels oopmaak en skelm wees. Wanneer ons die koring weeg, dan sal ons die mense te veel laat betaal.’ Julle verkoop ook die koring se kaf en julle verkoop arm mense omdat hulle geld skuld vir 'n paar sandale. Dan word die mense slawe.” Die Here het belowe, en Hy is self die getuie. Hy is God. Die Israeliete moet Hom eer. Hy het gesê: “Ek sal altyd onthou wat julle gedoen het. Die mense van die land sal bang word hieroor en bewe. Almal wat hier woon, sal huil en treur. Al die mense in die land sal skrik en wegvlug soos die water in die Nyl-rivier wat vol word en wegloop.” Die Here sê: “Op daardie dag sal Ek die son in die middel van die dag laat ondergaan. Ek sal dit donker maak op die aarde wanneer dit nog dag is. Ek sal alles verander. Julle sal nie feesvier nie, julle sal treur. Julle sal nie sing nie, julle sal huil oor almal wat dood is. Julle sal rouklere aantrek en julle koppe kaal skeer. Julle sal rou soos iemand wat rou oor sy enigste kind wat dood is. Dit sal vir julle 'n baie slegte dag word.” Die Here het gesê: “Daar sal 'n tyd kom wanneer Ek almal in die land honger sal maak. Maar hulle sal nie honger wees vir kos of dors wees vir water nie. Hulle sal honger wees vir die woorde van die Here. Hulle sal soek van die een see tot by die ander see. Hulle sal oral soek, van die noorde tot by die ooste, om te hoor wat die Here sê, maar hulle sal niks hoor nie. Mooi meisies en jongmans sal daardie dag baie dors word en flou val. Wanneer hulle iets belowe het, dan het hulle altyd gesê: ‘Die afgod van Samaria is die getuie,’ of hulle het vir die stad Dan gesê: ‘So seker soos jou god lewe!’ of: ‘So seker soos daar 'n pad is na die stad Berseba!’ Maar hulle sal val, hulle sal nie weer opstaan nie.”

AMOS 8:1-14 Afrikaans 1933/1953 (AFR53)

DÍT het die Here HERE my laat sien — kyk, daar was 'n mandjie met somervrugte. En Hy sê: Wat sien jy, Amos? En ek antwoord: 'n Mandjie met somervrugte. Toe sê die HERE vir my: Die einde het vir my volk Israel gekom; Ek sal hom verder nie meer verbygaan nie. En die liedere van die paleis sal in dié dag weeklaag, spreek die Here HERE: 'n menigte lyke; hulle gooi dit oral neer. Stilte! Hoor dit, julle wat die behoeftige vertrap en daarop uit is om die ootmoediges van die land uit te roei, deur te sê: Wanneer is die nuwemaan verby, sodat ons koring kan verkoop, en die sabbat, sodat ons die graanskuur kan oopsluit — om die efa te verklein en die sikkel te vergroot en bedrieglik te handel met 'n valse weegskaal; om die armes vir geld te koop en die behoeftige vir 'n paar skoene; ook die afval van die koring sal ons verkoop. Die HERE het gesweer by die hoogheid van Jakob: Gewis, Ek sal in ewigheid nie een van hulle werke vergeet nie. Moet hieroor die aarde nie bewe en elke inwoner daarvan nie treur nie? Ja, dit sal oprys in sy geheel soos die Nyl en onstuimig opkook en wegsak soos die rivier van Egipte. En in dié dag, spreek die Here HERE, laat Ek die son op die middag ondergaan en vir die aarde die lig duister word terwyl dit nog dag is. En Ek verander julle feeste in rou en al julle liedere in klaagsang, en Ek bring op alle lendene 'n roukleed en op alle hoofde kaalheid. En Ek maak dit soos by die rou oor 'n enigste kind en die einde daarvan soos 'n bittere dag. Kyk, daar kom dae, spreek die Here HERE, dat Ek 'n honger in die land stuur, nie 'n honger na brood nie en nie 'n dors na water nie, maar om die woorde van die HERE te hoor. En hulle sal swerwe van see tot see en rondslinger van noord na oos, om na die woord van die HERE te soek, maar hulle sal dit nie vind nie. In dié dag sal die mooi jongedogters en die jongmanne van dors beswyk — hulle wat sweer by die skuld van Samaría, en ook sê: So waar as jou god leef, o Dan! en: So waar as die weg van Berséba leef! En hulle sal val en nie weer opstaan nie.

AMOS 8:1-14 Contemporary Afrikaans Bible 2023 (CAB23)

So het die HERE HERE my laat sien: en kyk, daar is 'n mandjie somervrugte. En hy sê: Amos, wat sien jy? En ek het gesê: 'n Mandjie somervrugte. Toe sê die HERE vir my: Die einde het gekom oor my volk Israel; Ek sal nie weer by hulle verbygaan nie. En die liedere van die tempel sal in dié dag huil, spreek die HERE HERE: daar sal baie lyke op elke plek wees; hulle sal hulle in stilte uitwerp. Hoor dit, o julle wat die behoeftiges verslind, ja, om die armes van die land te laat beswyk, en gesê: Wanneer sal die nuwemaan verby wees, dat ons koring kan verkoop? en die sabbat, dat ons koring kan uitsteek deur die efa klein en die sikkel groot te maak en die weegskaal deur bedrog te vervals? dat ons die armes kan koop vir silwer en die behoeftige vir 'n paar skoene; ja, en verkoop die afval van die koring? Die HERE het gesweer by die hoogheid van Jakob: Ek sal sekerlik geen van hulle werke vergeet nie. Sal die land nie hieroor bewe en elkeen wat daarin woon, treur nie? en dit sal heeltemal opkom soos 'n vloed; en dit sal uitgewerp en verdrink word soos deur die vloed van Egipte. En in dié dag, spreek die HERE HERE, sal Ek die son op die middag laat ondergaan en die aarde verduister in die helder dag. En Ek sal julle feeste in rou en al julle liedere in klaaglied verander; en Ek sal 'n roukleed oor al die heupe laat opkom en 'n kaalte op elke hoof; en Ek sal dit maak soos die rou van 'n enigste seun, en die einde daarvan soos 'n bitter dag. Kyk, daar kom dae, spreek die HERE HERE, dat Ek 'n hongersnood in die land sal stuur, nie 'n hongersnood na brood of 'n dors na water nie, maar om die woorde van die HERE te hoor. En hulle sal ronddwaal van see tot see, en van die noorde tot die ooste, hulle sal heen en weer hardloop om die woord van die HERE te soek en dit nie vind nie. In dié dag sal die skoon maagde en jongmanne beswyk van dors. Die wat sweer by die sonde van Samaría en sê: Jou god, o Dan, leef! en: Die manier van Berséba leef; selfs hulle sal val en nooit weer opstaan nie.

AMOS 8:1-14 Die Boodskap (DB)

Die Here het my ’n mandjie vol vrugte laat sien. Toe die Here my vra: “Wat sien jy daar, Amos?” het ek geantwoord: “’n Mandjie vol ryp vrugte.” Die Here sê toe vir my: “My volk Israel is net so ryp om gepluk te word vir sy vonnis. Ek gaan nie toelaat dat dinge so verder aangaan nie. Op die dag van teëspoed,” sê die Here, “sal daar begrafnisliedere in die paleis gesing word. Lyke sal oral in die koning se huis op die grond lê. Bly liewer stil.” Luister ’n bietjie wat die Here vir Homself beloof het, julle wat op die arm mense trap. Julle wat van die behoeftiges in julle land probeer ontslae raak. Julle kan nie wag dat die fees van die nuwemaan verby is sodat julle weer julle deure kan oopmaak en kan aangaan om graan te verkoop nie. Julle wens die Here se rusdag om sodat julle weer julle winkels waar julle koring verkoop, kan oopmaak vir besigheid. Julle is daarop uit om met weegskale waaraan daar gepeuter is, al minder goed vir al meer geld te verkoop. Julle verkoop koring wat met nuttelose kaf gemeng is. Julle verkoop arm mense wat nie hulle skuld kan betaal nie. Julle is bereid om hulle vir so min te verkoop as die geld wat ’n mens kry vir ’n paar sandale. Die Here het gesweer: “Ek sal in der ewigheid nie vergeet wat Israel alles aangevang het nie.” Is dit nie iets wat die wêreld moet ontstel nie? Moet die bewoners van die aarde nie huil as hulle hoor wat julle doen nie? Moet die aarde nie bewe soos alles sidder voor die Nyl wat met geweld afkom en daarna weer terugsak, wanneer hulle hoor hoe die Here julle gaan straf nie? “Op daardie dag,” sê die Here, “sal Ek die son laat ondergaan in die middel van die dag. Ek sal dit laat donker word oor die aarde terwyl dit nog helder daglig is. “Ek sal julle vrolike feeste in begrafnisse verander. Julle juigliedjies sal slepende klaagliedere word. Ek sal julle begrafnisklere laat aantrek. Julle sal ’n kaal kol voor op julle kop skeer soos iemand wat rou omdat sy enigste kind dood is. Daardie dag sal in bitterheid eindig.” “Daar is ’n tyd wat gaan kom,” sê die Here, “dat daar ’n hongerte in die land gaan kom. Mense gaan nie honger wees vir iets om te eet of dors vir iets om te drink nie. Hulle gaan honger wees om te hoor wat die Here sê. Hulle sal hoog en laag soek na die woord van die Here. Hulle sal trek van die Middellandse See tot by die Dooie See. Hulle sal oral soek, van die noorde tot in die ooste. Maar hulle sal niks kry nie. Op daardie dag sal die mooi jongmeisies en die sterk jongmans flou word van die dors vir die Here se woord. Dié wat hoog en laag gesweer het by die sonde van Samaria, wat graag gesê het: ‘So waar as die god van Dan lewe,’ of graag gesê het: ‘So waar as daar ’n pad is vir mense wat na Berseba gaan om daar te bid,’ hulle almal sal op daardie dag op die grond neerval. Hulle sal nooit weer opstaan nie.”

AMOS 8:1-14 Nuwe Lewende Vertaling (NLV)

Die oppermagtige HERE het my weer ’n visioen laat sien. Dit was ’n mandjie vol ryp vrugte. Hy het vir my gevra: “Wat sien jy, Amos?” Ek het geantwoord: “’n Mandjie vol ryp vrugte.” Toe sê die HERE vir my: “My volk Israel is soos hierdie vrugte, ryp vir straf! Ek gaan hulle straf nie langer uitstel nie.” Die oppermagtige HERE sê: “Wanneer daardie dag aanbreek, sal die liedere wat hulle in die paleis sing ’n huiltoon hê. Lyke sal in groot getalle oral rondlê. Bly liewer stil!” Julle wat die armes besteel en die behoeftiges vertrap, luister hierna! Julle kan nie wag dat die Nuwemaanfees of die Sabbat verby is sodat julle graan kan verkoop nie. Julle meet graan met ’n vals maatbak en bedrieg deur skaalgewigte swaarder te maak. Die koring wat julle verkoop, meng julle met kaf! Julle koop armes vir geld en behoeftiges vir ’n paar sandale. Die HERE, die Trots van Israel, het ’n eed gesweer: “Ek sal nooit vergeet wat Israel gedoen het nie! Julle dade sal die aarde skud, almal op die aarde sal huil. Die wêreld sal opstyg soos die Nyl en wegsak soos die rivier van Egipte.” Die oppermagtige HERE sê: “In dié tyd sal Ek die son teen die middag laat sak, en dit donker laat word terwyl dit nog dag is. Ek sal julle feeste tye maak van rou en julle vrolike sang tot ’n klaagsang. Soos iemand rou oor die dood van ’n enigste kind, so sal julle rouklere dra en julle koppe kaal skeer. Dit sal ’n bitter dag wees!” Die oppermagtige HERE sê: “Die tyd kom dat Ek hongersnood oor die land sal stuur. Nie ’n honger na brood of water nie, maar om te hoor wat Ek sê. Mense sal angstig soek na die woorde van die HERE. Hulle sal soek van see tot see, van die noorde tot die ooste, maar dit nie kry nie. In dié tyd sal jong meisies en jong mans flou word van dors. Dié wat sweer by die afgode van Samaria; hulle sal sê: ‘Die God van Dan leef verseker!’ en: ‘Daar is beslis ’n pad na Berseba toe.’ Hulle sal almal neerval op die grond en nooit weer opstaan nie.”

AMOS 8:1-14 Afrikaans 1983 (AFR83)

Die Here my God het my 'n gesig laat sien: Daar was 'n mandjie ryp vrugte, en die Here het vir my gevra: Wat sien jy, Amos? Ek het gesê: “'n Mandjie ryp vrugte.” Toe sê die Here vir my: Die tyd is ryp vir my volk Israel, Ek sal hom nie meer spaar nie. Daardie dag sal die sang in die paleis 'n gehuil word, sê die Here my God. Daar sal baie lyke wees, oral neergegooi. Bly liewer stil! Luister hierna, julle wat arm mense vertrap, julle wat die mense in nood in die land wil uitroei. Julle sê: “Wanneer is Nuwemaan verby dat ons koring kan verkoop, of Sabbat, dat ons ons graanwinkels weer kan oopmaak en minder graan vir meer geld kan verkoop? Ons laat die skaal mos kul soos ons wil!” Julle verkoop arm mense vir geld, behoeftiges oor 'n paar sandale, julle verkoop selfs die koringkaf. Die Here het 'n eed afgelê by Homself, by Hom wat die trots van Jakob moes gewees het: Ek sal nooit vergeet wat hulle gedoen het nie! Sal die aarde nie hieroor beef nie, sal sy bewoners nie treur nie! Sal die hele wêreld nie in beroering kom soos die Nyl, wegsak soos die rivier van Egipte nie! Daardie dag, sê die Here my God, laat Ek die son helder oordag ondergaan, maak Ek dit donker op aarde terwyl dit nog ligdag is; Ek verander julle feeste in treurgeleenthede, julle liedere in klaagsange; Ek trek vir julle rouklere aan en skeer al julle koppe kaal; Ek laat dit word soos wanneer 'n mens oor 'n enigste kind treur, julle uiteinde sal vir julle 'n bitter dag wees. Maar daar kom dae, sê die Here my God, dat Ek 'n honger oor die aarde laat kom: 'n honger nie na kos nie, 'n dors nie na water nie, maar om die woorde van die Here te hoor. Die mense sal ronddwaal van see tot see, rondslinger van noord tot oos om die woord van die Here te soek, maar hulle sal dit nie kry nie. Daardie dag sal die mooi meisies en die jongmanne van dors beswyk, dié jongmense wat ede aflê by wat Samaria se sonde is en sê: “So seker as jou god leef, Dan, so seker as daar 'n pelgrimspad na Berseba toe is!” Hulle sal val en nie weer opstaan nie.

AMOS 8:1-14 Die Bybel 2020-vertaling (AFR20)

Dít het my Heer, die HERE, my laat sien: Daar was 'n mandjie met somervrugte. Hy het gevra: “Wat sien jy, Amos?” Ek het geantwoord: “'n Mandjie met somervrugte.” Daarop sê die HERE vir my: “Die einde het vir my volk Israel aangebreek. Ek sal nie weer by hom verbygaan nie.” “Die sangeresse van die paleis sal weeklaag op daardie dag,” is die uitspraak van my Heer, die HERE. “Tallose lyke, oral neergegooi! Stilte!” Luister hierna, julle wat die behoeftiges vertrap, en daarop uit is om weerloses in die land uit te wis deur te sê, “Wanneer is nuwemaan verby, sodat ons weer koring kan verkoop, en die Sabbat, sodat ons die graansakke kan oopmaak?” net om 'n efa kleiner te maak en 'n sikkel groter, en om te kul met 'n vals weegskaal, om armes vir geld te koop en behoeftiges vir 'n paar sandale. “Die uitskotgraan sal ons ook verkoop.” Die HERE het gesweer by die trots van Jakob: “Ek sal al hulle dade in ewigheid nie vergeet nie. Sal die aarde nie hieroor skud nie, en elkeen wat daarop woon, nie treur nie? Dit sal in sy geheel styg soos die Nyl; dit sal onstuimig wees en terugsak soos die rivier van Egipte.” “Op daardie dag,” is die uitspraak van my Heer, die HERE, “sal Ek die son laat ondergaan op die middaguur en dit helder oordag donker maak vir die aarde. Ek sal julle feeste in 'n rouplegtigheid verander en al julle liedere in treursange. Ek sal om alle heupe 'n roukleed hang en op elke kop 'n kaal plek maak. Ek sal dit laat wees soos die rouplegtigheid oor 'n enigste kind en die einde daarvan soos 'n bittere dag.” “ Kyk, daar kom dae,” is die uitspraak van my Heer, die HERE, “dat Ek hongersnood in die land sal uitstuur – nie 'n honger na brood en 'n dors na water nie, maar 'n honger om die woorde van die HERE te hoor. Hulle sal strompel van see tot see; van noord na oos sal hulle dwaal, op soek na die woord van die HERE, maar dit nie vind nie. Op daardie dag sal die mooi jongmeisies flou word, ook die jong manne, van dors. Hulle wat sweer by die Skuld van Samaria, en sê, ‘So waar as wat jou god leef, Dan’, of ‘so waar as wat jou god leef, Berseba’; hulle sal val en nie weer opstaan nie.”