1 KRONIEKE 16:23-31
1 KRONIEKE 16:23-31 Bybel vir almal (ABA)
Julle moet vir die Here sing, al die mense op die aarde moet dit doen. Julle moet elke dag die goeie nuus bring dat die Here mense red. Julle moet vir die volke vertel, vir al die volke, julle moet vertel dat die Here Koning is en dat Hy wonderwerke doen. Want die Here is groot, mense moet Hom baie prys, hulle moet vir Hóm bang wees, nie vir al die afgode nie. Want al die gode van die volke beteken niks, maar dit is die Here wat die hemel gemaak het. Almal wat Hom dien, weet dat Hy Koning is, almal in sy woonplek is bly, hulle weet dat Hy die sterk Koning is. “Julle almal, al die volke, julle moet die Here prys, julle moet Hom prys, want Hy is Koning, Hy is sterk. Julle moet die Naam van die Here prys, julle moet presente bring en na Hom toe kom, julle moet buig voor die Here, die heilige Koning. Al die mense op die aarde, julle moet bang wees vir Hom en bewe. Hy laat die aarde vas staan, dit skud nie. Die hemel moet bly wees, die aarde moet juig, hulle moet vir die volke sê: ‘Die Here is Koning.’
1 KRONIEKE 16:23-31 Afrikaans 1933/1953 (AFR53)
Sing tot eer van die HERE, o ganse aarde! Verkondig sy heil van dag tot dag. Vertel onder die nasies sy eer, onder al die volke sy wonders. Want die HERE is groot en baie lofwaardig, en Hy is gedug bo al die gode. Want al die gode van die volke is afgode, maar die HERE het die hemele gemaak. Majesteit en heerlikheid is voor sy aangesig, sterkte en blydskap is in sy woonplek. Gee aan die HERE, o geslagte van die volke, gee aan die HERE eer en sterkte. Gee aan die HERE die eer van sy Naam, bring offers en kom voor sy aangesig, aanbid die HERE in heilige gewaad. Beef voor sy aangesig, o ganse aarde! Ook staan die wêreld vas, sodat dit nie wankel nie. Laat die hemele bly wees en die aarde juig, en laat hulle onder die volke sê: Die HERE is Koning!
1 KRONIEKE 16:23-31 Afrikaans 1983 (AFR83)
Sing tot eer van die Here, almal op aarde! Verkondig elke dag sy reddingsdade! Vertel die nasies van sy mag, al die volke van sy magtige dade. Die Here is groot, al die lof kom Hom toe, ontsagwekkend is Hy bo alle gode. Al die gode van die volke is niks: dit is die Here wat die hemele gemaak het. Majesteit en luister straal van Hom uit, krag en vreugde vul die plek waar Hy is. Prys die Here, alle volke, prys die Here om sy eer en mag! Prys die Here om die eer van sy Naam! Kom na Hom toe, bring vir Hom offers! Buig voor die Here by sy heilige verskyning; betoon eerbied aan Hom, almal op aarde. Die wêreld staan vas, dit wankel nie. Die hemele moet bly wees en die aarde moet juig, hulle moet onder die nasies verkondig: “Die Here regeer.”
1 KRONIEKE 16:23-31 Die Bybel 2020-vertaling (AFR20)
Sing vir die HERE, o ganse aarde! Verkondig sy verlossing van dag tot dag! Maak onder die nasies sy majesteit bekend, onder al die volke sy wonderdade. Want groot is die HERE en besonder lofwaardig; Hy is ontsagwekkend, meer as alle gode. Ja, al die gode van die volke is niksbeduidend, maar die HERE het die hemel gemaak. Luister en glans is voor Hom; krag en blydskap is in sy heiligdom. Gee erkenning aan die HERE, familiegroepe van volke! Gee erkenning aan die HERE vir sy heerlikheid en krag! Gee erkenning aan die HERE vir die heerlikheid van sy Naam! Bring offers en kom in sy teenwoordigheid! Buig in aanbidding voor die HERE in sy glansryke heiligheid! Bewe vanweë sy teenwoordigheid, o ganse aarde! Ja, die wêreld staan vas, dit wankel nie. Laat die hemel bly wees, en die aarde juig. Mense onder die nasies sê: “Die HERE regeer!”
1 KRONIEKE 16:23-31 Contemporary Afrikaans Bible 2023 (CAB23)
Sing tot eer van die HERE, o ganse aarde! maak van dag tot dag sy redding bekend. Verkondig sy heerlikheid onder die heidene; sy wonderwerke onder al die nasies. Want die HERE is groot en baie lofwaardig; ook is Hy gevrees bo al die gode. Want al die gode van die volk is afgode, maar die HERE het die hemel gemaak. Heerlikheid en eer is voor sy aangesig; krag en blydskap is in sy plek. Gee aan die HERE, julle geslagte van die volk, gee aan die HERE eer en sterkte. Gee aan die HERE die eer van sy Naam; bring 'n offer en kom voor Hom; aanbid die HERE in die skoonheid van heiligheid. Vrees voor sy aangesig, o ganse aarde; ook die wêreld sal stabiel wees, dat dit nie wankel nie. Laat die hemel bly wees en die aarde juig, en laat die mense onder die nasies sê: Die HERE is Koning.
1 KRONIEKE 16:23-31 Die Boodskap (DB)
Kom sing vir die Here, almal op aarde. vertel elke dag hoe Hy ons uit die nood gered het. Moenie stilbly by die volke nie. Vertel vir die nasies hoe sterk die Here is en wat Hy alles kan doen. Die Here is baie groot en daarom moet ons Hom met die mooiste woorde grootmaak. Hy is groter as alle ander gode. Wat is die ander gode in vergelyking met Hom? Net mooi niks nie! Mense het hulle gemaak. Maar ons Here het die hemel gemaak. As ’n mens by die Here is, word jy oorweldig; oorweldig deur hoe Hy oor alles heers, hoe belangrik Hy in vergelyking met enigiemand anders is, hoe sterk Hy is en hoe mooi alles by Hom is. Elke mens op hierdie aarde moet die Here erken vir wie Hy regtig is. Hulle moet erken dat Hy sterker en belangriker as enigiemand anders is. Gee daarom aan die Here die dank en eer wat net Hy verdien. Kom na Hom toe en bring vir Hom ’n offer wat Hom gelukkig sal maak, kniel voor Hom en erken Hom vir wie Hy regtig is. Al die mense op aarde moet besef hoe klein hulle teenoor die Here is. Hy is so sterk dat die aarde onbeweeglik vas in sy hand lê. Die hemel en elkeen wat daar is, moet van opgewondenheid oorloop. Die aarde en elkeen wat daar is, moet hulle blydskap uitskreeu. Vertel vir elkeen op hierdie aarde: “Die Here is koning!”
1 KRONIEKE 16:23-31 Nuwe Lewende Vertaling (NLV)
Laat almal vir die HERE sing! Vertel elke dag dat Hy red. Vertel vir die nasies van Hom. Vertel almal van sy wonderdade. Want die HERE is groot, waardig om geprys te word! Bo al die gode moet Hy geëer word. Die gode van die volke is maar net afgode, maar die HERE het die hemel gemaak! Eer en heerskappy omring Hom, krag en vreugde is in sy woonplek. Gee aan die HERE, families van die volke, gee aan die HERE eer en krag. Gee aan die HERE die eer wat Hom toekom! Bring jou offers en aanbid Hom. Aanbid die HERE in sy heilige heerlikheid. Laat die aarde voor Hom bewe. Die wêreld is gevestig en kan nie wankel nie. Laat die hemel bly wees en die aarde juig! Sê vir die volke: Die HERE is Koning.
