GÉNESIS 18
18
Tumpa güɨrökuavee omee vaerä Abraham taɨrä
1Jaɨkue rupi yandeYa oyekuaa Abraham pe ɨvɨra encina jee vae jupa pe, Mamre iɨvɨ pe, oputuu oï jo guakapi pegua jöke pe araku güi yave, kuaraɨ ara mbɨte jaɨkue rupi. 2Abraham omopüa iñäka jare oecha mboapɨ kuimbae reta yogüeru oväe jóvai; jare oecha yave osɨi oë ojo oövaiti reta vaerä,#Heb 13.2. jare oyetavatɨka itindɨasɨ ɨvɨ re. 3Jare jei:
—CheYa, ndepɨakatu ko chekotɨ yave, romoñera repɨta vaerä kuae nderembiokuai jo pe. 4Taruruka peve ɨ peyoe vaerä pepɨ; jare peyapakua peputuu ɨvɨra iküaraɨa igüɨ pe. 5Jare peyu ramboeve chépɨri, aruta peu mbɨyape perete täta vaerä, jare opa pekaru yave peasa kuri.
Jae reta jei chupe:
—Eyapo nde rere rami.
6Jayave Abraham oike jaɨai reve jo guakapi pegua pe jare jei Sara pe:
—Eipɨɨ veinte kilo rupi trigokúi ipɨuasɨ kavi vae jare nderaɨai eyapo mbɨyape tanimbugüɨ pe oyɨ vae.
7Abraham osɨi guaka reta kotɨ, jare oiparavo toro taɨrusu vae ikɨra kavi vae, omee metei jembiokuai pe, jare jókuae jembiokuai oyapo tembíu ɨmambae pegua. 8Jare güeru toro taɨrusu vae isoo jare güeru vi guara, güeru imboupa reta jóvai oñono; jare imboupa reta okaru ramboeve ɨvɨra igüɨ pe, jae oyemboɨ jae reta jóvai oyeokuai vaerä chupe reta.
9Jare jei reta chupe:
—¿Jama pa nderembireko Sara?
Jae jei:
—Oime oï kuae o guakapi pegua japɨpe.
10Jayave jei Abraham pe:
—Ayu yeta ndépɨri kuri kuae año ou vae re, jayave nderembireko Sara oimeta ma imembɨ.#Ro 9.9.
Jare ikupe kotɨ, o guakapi pegua jöke japɨpe Sara oyeapɨsaka oï opaete kuaekuae re. 11Abraham jare Sara okuakuaa yae reta ma; jare Sara güi opɨta ma, kuña reta yasɨ ñavo oiporara vae. 12Kuae oendu yave Sara opuka vɨari oyeyóyai jare jei ipɨa pe: “¿Chetɨ̈aro pei ra chepɨayekouta, jare cheya#1 P 3.6. ko indechi yae ma vi?” 13Jayave yandeYa jei Abraham pe:
—¿Maera pa Sara opuka jei reve: Añetete ra ko chemembɨta chetɨ̈aro pei? 14¿Oime pa mbae yavai yae cheve vae? Kuae año ou ye vae re ayu yeta ndépɨri, jayave Sara oimeta ma imembɨ.#Jer 32.16,27; Lc 1.37; Ro 9.9.
15Sara jókuae oendu yave okɨɨye, jare oyekuaku tëi, jei:
—Mbaetɨ ko apuka.
Ërei Tumpa jei:
—Repuka ko, che ko aikuaa.
Abraham oiporu Tumpa pe Sodoma re
16Jayave jókuae kuimbae reta opüa joko güi jare omae reta Sodoma kotɨ; jare Abraham güɨraja omondo reta. 17Jayave yandeYa jei: “Tamombeu Abraham pe ayapota vae, 18echa chugüi oñemuñata tëtaguasu imbaepuere yaeta vae. Jare jese vi opaete tëtaguasu reta ɨvɨ rupigua oyekouta. 19Echa aiparavo ko güɨroata vaerä taɨ reta jare opaete iñemuña reta cheporomboe rupi; oyapo reta vaerä jupi vae jare sɨmbi vae; jökorai yave aruta Abraham re opaete arökuavee chupe vae.” 20Jayave yandeYa jei Abraham pe:
—Sodoma pegua jare Gomorra pegua reta mbaetɨ etei ma jërakua kavi ara ñavo, iyoa reta jeiete yae ma ikaviä, 21añave agüeyɨta jokotɨ, jare aechata oyapo reta ra mbaeyoa, jërakua cheve rami. Ërei mbaetɨ yave aikuaata.
22Jare mókoi kuimbae reta opa yogüɨraja joko güi Sodoma kotɨ; ërei Abraham opɨta yandeYa jóvai. 23Abraham oya katu jese jare oparandu chupe:
—¿Remboaita vi pa jupi vae, jeko vae ndive? 24Güɨramoi oime cincuenta jupi vae tëta guasu pe: ¿Remboaita pa jeseve tëta guasu? ¿Ngaraa pa neɨ̈ro jókuae cincuenta vae reaɨu jeko pegua? 25¿Reyukata pa jupi vae, jeko vae ndive, jare jupi vae remboyovakeñota pa jeko vae ndive? Nde reporojäa opaete ɨvɨ re vae, ¿ngaraa pa reyapo jupi vae?
26Jayave yandeYa jei:
—Aväe yave cincuenta jupi vae tëta guasu pe, cheɨ̈rota opaete pe, jae reta aɨu jeko pegua.
27Abraham jei ye chupe:
—Neɨ̈ro cheve cheYa, mase chemiari ye, yepe tëi che ko ɨvɨkúi jare tanimbu rami. 28Güɨramoi cincuenta jupi vae güi oatata pandepo. ¿Remboaita pa jókuae pandepo oata vae jeko pegua?
Jae jei:
—Ngaraa amboai aväe yave cuarenta y cinco.
29Jekuae jei ye:
—Güɨramoi reväeta chupe cuarenta.
Jae jei:
—Ngaraa ayapo, cuarenta vae aɨu jeko pegua.
30Abraham jei ye:
—Romoñera agüɨye vaerä ndepochɨ cheve: Güɨramoi reväeta jaeño treinta.
Jare jei chupe:
—Ngaraa ayapo, aväe yave chupe treinta.
31Jekuae Abraham jei ye chupe:
—Mase, ko chemiari ye ndeve cheYa aipoɨumbae reve: Güɨramoi reväeta chupe veinte jupi vae.
Jae jei:
—Jókuae veinte vae aɨu vae re, ngaraa amboai tëta guasu.
32Abraham jekuae jei ye:
—Agüɨye ndepochɨ cheYa chemiari yave metei ye yepe: Güɨramoi reväeta payandepo.
YandeYa jei:
—Ngaraa amboai payandepo vae aɨu jeko pegua.
33YandeYa opa ma imiari Abraham ndive yave ojo joko güi; jare Abraham oyerova ye oikoa kotɨ.
Tans Gekies:
GÉNESIS 18: GUABD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia DC Guaraní Bolivia © Bolivian Bible Society, 2001.
