Gén 9
9
Ri jikibel-tzij ri xuben ri Dios rik'in ri Noé
1Ri Dios xerurtisaj ri Noé y ri e oxi' ruk'ajol y xubij chike: Kixalk'ualan y kixk'iyer y kan tinojisaj k'a ruwech chijun ruwach'ulew. 2Ronojel kiwech chikopi' richin ri ruwach'ulew xkebaybot k'a roma xibinri'il y kan xtik'oje' k'a ikiy chikiwech: Konojel ri aj-xik' taq chikopi', ri chikopi' ri ek'o pa ya' y konojel ri k'o kik'aslen kek'oje' pan iq'a'. 3Chuqa' utz ye'itej ri kitijul ri chikopi'; chuqa' ninya' q'ij chiwe richin nitej ronojel ruwech ichaj. 4Y ja k'a ri ti'ij ri k'a k'o na kik' ruk'uan man titej, roma chiri' k'o-wi ri k'aslen. 5Roma kan qitzij ninbij chiwe, chi wi k'o jun chikop nukamisaj jun chiwe rix, k'o chi xtinch'ojij ri ik'aslen chire; y wi jun chiwe rix nukamisaj jun chik wineq, chuqa' xtinch'ojij ri ruk'aslen chire.
6Jun wineq kan achi'el nubanik yin,
y wi k'o ta jun xtikamisan jun wineq,
ri xtibanon xa kan xtiqaqa chuqa' pa ruq'a' jun chik wineq.
7Y rix kan xkek'oje' e k'iy iwijatzul
y kan xkixwinaqir y kan xtinojisaj re ruwach'ulew, xcha'.
8Y ri Dios xch'on k'a rik'in ri Noé y ri ralk'ual y xubij chike: 9Yin xtinjikiba-nutzij iwik'in rix, y toq rix xa ix maneq chik, xa kik'in chik k'a ri iwijatzul. 10Y chuqa' xtinjikiba' ri nutzij kik'in konojel ri chikopi' ri xe'el-pe chupan ri nima-barco: Ri aj-xik' taq chikopi', ri chikopi' e richin k'echelaj y konojel ri ek'o chuwech re ruwach'ulew. 11Kan ninjikiba' k'a nutzij iwik'in rix chi man jun bey chik xkenkamisaj konojel ri winaqi' y ri chikopi' rik'in ri ya' ri xumuq re ruwach'ulew. Kan man jun bey chik xtink'is re ruwach'ulew rik'in re ruk'ayewal re', xcha'. 12Y chuqa' ri Dios xubij k'a: Jare' ri retal ri jikibel-tzij ri ninben iwik'in y kik'in konojel kiwech chikopi' ri ek'o chi'ikojol, y keri' kik'in ri ch'aqa' chik sol winaqi': 13Ri kotoq'a' ri xinya' pa sutz' jari' ri retal ri jikibel-tzij chiqakojol roj, yin y ri ruwach'ulew. 14Y ronojel bey toq yin xtinben richin nipe jun molaj sutz' pa ruwi' re ruwach'ulew y xtitz'etetej ri kotoq'a' chupan ri sutz', 15jari' toq xtinnataj chik ri nujikibel-tzij ri xinben yin iwik'in rix, y kik'in ronojel kiwech chikopi' ri k'o kik'aslen. Y man jun bey chik xtinya-pe ri ya' ri xmuqun ri ruwach'ulew pa kiwi' ri ek'o chuwech re ruwach'ulew. 16Xtik'oje' ri kotoq'a' pa sutz', y ri' xtunataj chuwe ri jikibel-tzij richin q'asen ri nubanon yin kik'in konojel winaqi' y ri chikopi' ri ek'o chuwech ri ruwach'ulew, xcha'. 17Y keri' ri Dios xubij chire ri Noé: Ja k'a retal re' ri jikibel-tzij ri xinya' kan chike konojel winaqi' y ri chikopi', xcha' ri Dios.
Ri xuben ri Cam
18Ri ralk'ual ri Noé ri xe'el-pe chupan ri nima-barco, ja ri Sem, ri Cam y ri Jafet. Ri Cam jari' ri rutata' ri Canaán. 19Re e oxi' achi'a' re' jare' ri e ruk'ajol ri Noé y koma rije' xek'iyer chik winaqi' chuwech chijun ruwach'ulew.
20Y toq q'axineq chik ronojel re', ri Noé roma jun tikonel, xusamajij-qa ri ulew y xerutik-qa uva; 21Y toq rija' xutej k'a vino, xq'aber-qa y xpune' chiri' pa nik'aj rachoch ri banon rik'in tzieq y maneq k'a rutziaq chirij. 22Y ri Cam, ri rutata' ri Canaán, xa xutz'et k'a kan chi ri rutata' maneq rutziaq; jak'a rija' xa xuchop rutzijoxik chike ri e ka'i' runimal ri ek'o kan chuwa-jay. 23K'ari' ri Sem y ri Jafet xkik'uaj-apo jun tzieq y xkiya-el chuwi-kitele'n y chikij xebiyin-apo richin chi xkikuch kan ri kitata' richin man xkitz'et ta chi maneq rutziaq.
24Y toq xq'ax yan el ri q'abarik chuwech ri Noé, jari' toq xretamaj chi ri Cam, ri ruch'i'p, xutzijoj ri xuben rija'. 25Y ri Noé xubij k'a:
Kan tiqaqa k'a ri itzel pa ruwi' ri Canaán,
rija' xtok jun wineq ri xtiyuqe' pa samaj,
kan xtok k'a jun chaq relik samajel kichin ri rach'alal.
26Y chuqa' xubij:
Nim ruwa-ruq'ij ri Jehová ri qa-Dios, ri ru-Dios ri Sem,
y ja ri Canaán jari' ri xtiyuqe' pa samaj rik'in.
27Y ri Dios kan xtunimirisaj ta ri Jafet,
y xtik'oje' ta pa taq rachoch ri Sem,
y ri e rijatzul ri Canaán xkeyuqe' pa samaj rik'in, xcha'.
28Toq q'axineq chik k'a ri ya' ri xmuqun ri ruwach'ulew, ri Noé k'a xk'ase' na 350 juna'. 29Y ri Noé xk'ase' k'a el chuwech re ruwach'ulew 950 juna'; y k'ari' xken.
Tans Gekies:
Gén 9: KQC
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Kaqchikel Bible © Bible Society in Guatemala, 2003.
