Lukas 21

Youwak ulamuk kil arye Allah ati, aribukba Yesus arye, nyabuk yupu

1Yahudi yala nang, sik Allah ati arilbalamik aik pum bisik, Allah arena ati, ‘Yo bok dongopnamak’ tenen, marikna atonun ning moubuka deiamik. Ayo bok dongolyanmek marikna dam, Yesus ap, el mapu ap bukmekce, ayo bok dongolyanmek nang ati, sik wininmek ning urasin dinmek. Sik atenebuka bukmek talak ara, bona weik talin nang arye dekna weik yo bok dongolyanganmekura, Yesus arye dinmok.

2Tonda, youwak ulamuk kil, pia bona utotoa talina kum kil tonok ara, elce keil uang bitinye, dekna pia mitik ning, yangupdongobukura, Yesus arye eibuk. 3Dongobukopura, Yesus arye el mapu mening dam abukmek nang ati, nyabuk.

“Anggun dipdelulume. Na dipkoprop yupu nyapsine. Bona weik talin nang nirya arye, yo bok weik dongolyanmak bukni, weik yo bok dongopmaka ara, Allah el kanye ara nirya tabakuka nukuna ara mitikuk uple. Bukni, ayouwak ulirye, bona utotoa talina kum kil, el dongopmau ara, keil uang dekna mitik ning bukni, Allah el kanye ara, dekna pia weik#21:3 Dekna weik ning atonun – Yesus arye ayupu nyabuka deiyok ara, ani. Aning-aning weik talinyak ninye ara, sik bona weik noutamak arye bokuka, Allah el arena ati, weika arye arenamaka babye, aning ara, el urasin ara, mitik atonun ulule. Deiyok ara, sik tuba talinamak ning ara, weik tuba upnamla ati ara, sik caknam asa aryuk arinyake. Bukni, aning-aning nirya kum talinyak kili sal ara, aupmalye ning, mitik anunuk uamuk bukni, noutamak arye bokuka, mitik aryuk aribica babye, Allah el kanye ara, ‘Pia teleb ubuka arinyake. Sikce nati arininyak ning ara, urasin weik atonun ulule,’ tenelule. Deiyok ara, sik bona talina kum ninye tuba talinamaka ara, pia mitik demuk kipnamla ati ara, sik ikin asa aryuk arinyake. Tonda, 1 Korintus 16:2 dipdelulume. atonun deiple. 4Sik bona weik talin nang arye, sik aning-aning weike talibik noutam arye, ‘Na’ tenen, weik aupmalibuk, weik yo bok dongopmak bukni, ayouwak kil ara, pia bona utotoa talina kum kil ati ara, el talibuk ning nirya anyuk akunum dongopmaue.” Yesus arye el mapu ati nyabuk.

Yesus arye aning-aning nirya kum upnamle talak dam uplyopura, winipnamle ning ati, laka nyabuk yupu

5Yesus arye ayupu akunum nyabukopura, el mapu ap, Allah arilbalamik aik pum bisik unmek talak ara, el mapu arye anyaik domikak dipdeyikce, ayupu nyabik. “Naio, dipdelyame. Anyaik, weik pala cang urasin teleb keil arye domik. Tonda, Allah si erena ati arilamikura, anyaik pum dobuka delilamik aik kweirya ara, urasin pia telebe. Anyaik-anyaik nirya domik ning ara, urasin pia telebe,” nyabik. 6Nyabik bukni, Yesus arye el mapu nirya ati tamubuka nyabuk. “Weik aik dobikak nirya dipdelulume. Weik cang keil pala arye deibuka welebikce, dobik keil nirya ara, aminyan ara uluplobiceura, keil deice tonok ning babye, kum bataknamake. Anirya uluplopnamake,” nyabuk.

7Nyabukopura, sik nirya arye Yesus ati asipdeyik. “Naio nyapsilyame. Anyaik, ara dan talak arye daklopnamak do? Yata ning winiptu deice arye, ‘Anyaik daklopnamaka ati, dam uple,’ tenen, biktibye do?” nyabuka asipdeyik. 8Asipdeyikura, Yesus arye ayupu tamubuka nyabuk.

Ninye weika arye, “Yesus el si deice arye yanganyabe,” nyabikirye, “Mesias yanamle nyalamiknye bira, na uka. Tonda sirya talak ara akunum dam uple,” nyanamak deice arye, ninye weik atilila yupu kekebuka, diba tenenamake. Atilila nang nyanamsiak deice arye, ninye weik sik kanye talima nirya leibuka, yuk tam dobanamsiak ati, na mapu anggun kanye talima moubuka unamlulume. Atilila yupu nyanamak nang ara, sik yupu kekebuka, sik tam kum kilonamlulume.

9Tonda aminyan talak ninye arye, “Ton tam nang ap, ton tam nang ap oldanmake,” nyabuka nyanamaka ap, “Nun mutuku talisinyak nang ‘Obuka daknamap’ tenen, oldanmake,” nyanamaka ap, yanuka nyabikiba, kekepmunyopura, ilil kum unamsulule. Allah arye, ‘Atonun ning wininamle,’ akunum tenyamuk ati, wininamle bukni, ‘Sirya talak sirya dakna ning ara, kabula,’ tenenamlulume.

10Sirya talak noutamak ara, ton wininamle ning ara, weik ninye deiyoknye, Raja#21:10 Raja – Ayupu nyabuk ning ara, minop sekik ning noutam ara, “Kerajaan melawan kerajaan dan negara akan melawan negara,” nyabuka sekik. Ati, mitik mutuku noutamak unyak ninye olana ati kum nyabuk. Ara pala weik mutuku noutamak unyak ninye arye, yuk pala weik mutuku noutamak unyak ninye ati olanamake. nang arye talinyak mutuku nang arye, ton mutuku nang ati, binuka oldanamake. Tonda, ton yala nang arye, ton yuk yala nang ati, oldanamake.

11Winildanmace talak ara, mutuku yuk-yuk weika arye lulukunamle. Tonda, wa wibuka kouamice ning nong kum uplyopura, din pia patana dem unamle. Tonda, mutuku-mutuku nirya yuk-yuk ninyeuk weik touk dilamlyeura, ninye weik dipnamake. Tonda, im deice upnamle ning eibikirye, ilil pia weik unamle ning ap, ‘Sirya talak akunum uple’ tenen, biknamaka ati, Allah arye pitin-pitin kilin ning im deice deipnamle ap, weik upnamle.

12Aning ati ara, aning-aning winipnamle ning ara, moubuka bikmunce, tenenamlulume. Bukni, anyapmasin ning nirya min kum wi nyaplye talak ara, anggunda, ‘Yupu talina deiyok nang arye wenebuka opnamak’ tenen, tapu koubuka arilbanamsiyake. Ara, nati diba tenepluma ati, anggun nong deice ikin ning weik delinamsiake. Tonda, ‘Anang arye wenebuka opnamak’ tenen, Allah yupu peterena aik noutamak ap, talye wenena aik pum bisik ap, bobanamsiake. Nati, diba tenyamnumunya ati, ‘Anang arye opnamak’ tenen, weik ninye deiyok nang, Raja nang ap, Gubernur nang ap, sik dam bobanamsiake.

13Anang dam bobisikce talak nirya ara, narye ninye lyenun yupu, sik anang kekena ati, na si sisibuka laka nyanamlulume. 14Sikce aweik nang dam bobanamsiak bukni, wini talak ara, tenebuka kintinipnululume. Wenen nang dam bobinamsiak talak ara, sikce opnamsiaka ati, ‘Yata yupu nyaptibye deice arye yupu sektibye do?’ tenen, teniltona meme. Awininamle ning ati ilil una meme. 15Sik wenepnamsiak talak ara, narye weik kel yupu anggun kanye talima ak arepsinyeura, nyanamlum yupu ara, anang arye bisibuka yanipmanto kum winipnamsiake.

16Anggun ni yapu koprop ap, anggun nin yapu koprop ap, anggun weitcapu koprop ap, anggun kayapu nang koprop ap arye, anggun diba tenenululum ning ati, ‘Ninye deiyok nang arye opnamak’ tenen tomobobinamsiake. ‘Opnamak’ tenen, tomobuka bobinamsiyake. Yukubuka bobasiceura, ton nang ara, adiparyuk oplopnamsiake, ton nang ara talye bataknamsiake. 17Nati, diba tenenice nang nirya ara, ‘Anang ara, Yesus el mapu unyaka ati ara, nun like,’ tenebuka bataknamsiake.

18Winipnamsiak bukni, Allah arye moubuka disulula anye arye, anggun gisok potong tonok babye, ton kum winipnamsile. 19Anggun ilil una kum aryuk, talye tunim abuka upmunyopura, Allah arye lyepnamsile. Ara, anggun nonguk ara opsitinge bukni, Allah arye kam una deiyok ning akunum arepsilyopura, anggun sambalauk pia kum dipnamle. Pia kamuk unamle.

20Aning ati ara, sik yin talin nang pia weika arye, Yerusalem mutuku dana-dana tam nirya warikukapsikirye, kintinipsikibuk eipmunyopura, ‘Yerusalem mutuku ulul ning ulubukapsikirye, sung-sunga kibuka opnamsiak talak ara, akunum dam uple,’ tenenamlulume. 21Aning uplye talak ara, anggun Yudea tam unamlum nang ara, Yudea batakuka, adiparyuk bik-bik abuka yo kan-kan mutuku duknul bindaknamlume. Anggun Yerusalem asik noutam unamlum nang ara, asik kopropa batakuka, buru tam sakuka dungnul binamlume. Anggun buru tam ulamlum nang ara, tamubuka asik noutam yangana meme.

22Aning ara talya ati kum nyapsine. Deiyok ara, ani. Aning winipnamle talak ara, Allah yupu laka nyalamik nang arye, “Allah arye ninye nirya wenebuka opnamle,” nyalilamik touk upnulye talak ati nyapsine. 23Yesus arye nyabukce, ayupu ton dukdongobuka nyabuk.

Mi bomice kilapu ap, mi moum dinilamice kilapu ap, akilapu ara adiparyuk bik-bik abuka kum binmanto ati, pia ikin unamle. Amutuku noutamak unamak ninye nirya ati, ara Allah el yu weik upliba weneplirye, dereplyeura, Allah arye, pia weik arye kanye imun kipdeiplyeura, kanye imun asa unamle.

24Amutuku yanuka obisipnamak nang arye, Yahudi yala ninye weik parang ya arye olonamake. Ton nang ara tapu koubukabikirye, yuk karen mutuku bobikirye pil dinamake. Yerusalem asik dokcak nirya ara, Yahudi yala kum ninye arye, ‘Amutuku ara mambul ak,’ tenena kum aryuk, talye yan yanibuka unamake. Winibuka daulamiceura, Yahudi yala kum ninye weik ninye deiyok nang kibikirye, mutuku-mutuku nirya pia talinamake. Allah arye tenyamuk talakuk wininamake.

25Im deice tam ulul ning ara, keting ap, kurya ap, wala ap deice arye, weik mambul ning laka nyana ati winipnamle. Laut mekwen nirya ara, mekwen weik arye lonting-lonting ablirye, mekwen mikip weik arye langdibuka weleplirye, weik lelim nyaplyopura, tukwak mutuku ninye mutuku sirya im sirya nirya arye, ‘Mekwen dipsilyak’ tenen, weik kanye imun uplibuk, ‘Yata wiripnamap do?’ tenen, pia teniltonauk unamake. 26Im deice tam ulul ning nirya ara, lonting-lonting anamle ati ara, ninye mutuku sirya im sirya nirya, ‘Yata winipnamsil do’ tenen, ilil pia weik uplibuk, gisok biri-biri ablirye, dipmanto unamake.

27Aning nirya winiplyopura, nara Ninye Mi Koprop Atonunye birye, na mikip weik ap, dirina weik ap arye, dua kan-kan yanganyeak eipnamniake. 28Anyapmasin ning nirya deiyok koubuka winilye talak ara, anggun tikukapmunce, ‘Nun ni, nun Lyena Deiyoknye yanusil’ tenen, kanye etek-etek nyapsilyeura, erebuka dinamlulume. Ara, ‘Allah arye lyepnamsil talak akunum uple,’ tenepnamluma ati, nyapne. Yesus arye nyabuk. 29Yesus arye ayupu nyabukopura, adomon yupu tonap nyabuk.

30Anggun nirya kele, benalye yo kita#21:30 binalye yo – Minop sekik buku noutamak ara, binalye yo kum sekik bukni, nun mutuku ulul ning sekmaba ara, ‘EIPA ninye moubuka biktinge’ tenen, sekmupu. Sik minop sekik ning ara, yo duk moulamle yo sekik. Tonda, ayo el yo bok siliknyeura, ara ‘Dou mapnamala atia,’ tenelamik. omlya ani, kulupnulya ati, telil ongoplyopura, ara ‘Dou mapnamla atia,’ tenelulume. Tonda, ‘Pou upmala anye arye, dou mapnamle’ tenen, nyalulume. 31Aning dimunce, ‘Dou mapnamale’ tenen, bikililaluma atonun, anyapmasin ning eipmunyopura, ‘Sirya dakne talak dam uple,’ tenepnamlulume. Ara, Allah arye aning-aning nirya ap, ninye mutuku-mutuku nirya ap, taliplirye, Weik Ninye Deiyoknye unamle talak, ‘Akunum deiyok kuple’ tenen, biknamlulume.

32Na dipkoprop nyapsine. Anyapmasin ning deiyok uplye talak eipnamak ninye ara, sik nirya min kum dipmace talak ara, anyapmasin ning sirya dakne talak babye, dipkoprop eipnamake. 33Im deice tam ulul ning nirya ap, tukwak tam ulul ning nirya ap ara, kum danamle bukni, na nyasinye yupu nirya ara, tonok babye, ton kum kum danamle. Pia aupnamle, na nyanye touk dipkoprop upnamle.

34Aning ati ara, anggun kanye moubuka unamlulume. Malye-malye winina ap, talye kanye bobuka urdemuk una ap, kanye wangan mek talye dina apura, ‘Nun aik, nun ongon butum, nun dina ap, yata wiripnuyap do?’ tenen, teniltona ap deice arye, anggun kanye talima tenena ning ara, ikin weik upsilirye, mitang yuksilyeura, na pil dopmanto kum ululum ati, kanye pia moubuka unamlulume.

Winipmanto ara, kabang bisik balamlya ak wena wemikceura, kabang talye mangkau arye balyeura, youlamla atouk, na yanamne sum mangkau kanye bopmamunye talak winipsilyak ati, kanye pia moubuka unamlulume. 35Tuku ak mutuku-mutuku nirya unyak ninye ara, anyapmasin ning dipkoprop akunum winipnamle ati, anggun kanye moupdoplulume nyapsine.

36Aning ati ara, pia moubuka kalekuka dimunce, unamlulume. Tonda, ninye nirya ati, upnamle ning upsiliba, ‘Allah batakuka malye winibibyak’ tenen, Allah moronauk unamlulume. Tonda, ‘Ikin weik upsilyak’ tenen, Allah moronauk unamlulume. Ton ikin ning ara, Ninye Mi Koprop Atonunye birye, ninye nirya weneplirye, yupu bokipnamla talak ara, ‘El dam bibirye, alye kum daknamap’ tenen, Allah moronauk unamlulume. Yesus arye el mapu ati nyabuk.

37Atalak ara, Yesus arye asum-asum nirya, Yahudi yala nang sik Allah ati arilbalamik aik pum peterenman ak, einipneura, Zaitun mutuku dup welebuka malbalamuk. 38Mapmana bereknopura asum-asum beren tam talak nirya ara ninye nirya arye, ‘Yesus yupu kekepnuyap’ tenen, Allah arilbalamik aik wekelyanopura peterelamuk.

Tans Gekies:

Lukas 21: EIPA

Kleurmerk

Deel

Kopieer