Lukas 17
17
At Yesus en enesaʼgo weregei wene
(Matius 18:6-7, 21-22; Markus 9:42)
1At Yesus en asogo moʼgulentesirik e, at osi iak wogu legesa aʼge ebano wene mesik disogo moʼgulentesi,
“Aphwami en an ʼgoboksogo uknobouwagoluk is nin pema en enede ʼgagalua aʼge oruagat ani o. Aʼgeat de, at ap sa en enede ʼgagaliselat oruak aʼge ai Allah en ebe ai wiagap pouwa o. 2At ai en is malik wei aʼge yuat mesik en an ʼgobologo uknobouwagoluk ede ʼgagalumu, an ʼgobologo uknebasu holuk e, at ap ede ʼgagaliselat welago aʼge ai helep lok aʼge oʼgorlop pam herle erlilogo re, ik laut lok omugwema hwik elepma re, op o. 3Holuk e, henebe erlele wokho re, henebabut heberlogo welemis o. His henarilak honorokhwi aʼge mesik wiak tago holuk e, esaʼgo werip o. Esaʼgo worogup ʼgal, ebabut heberliso holuk e, wiak tago aʼge ano erlagapsogo ukpomup o. 4Ap ai en agauwa mesik erlige pam, eʼgik sabit enam pam pobuk naduk wiagaphebasulat e, nin hwedik nan hwedik eʼgik sabit enamat heʼbek wotluk,
Wiagaphebegis aʼge ai nebabut heberlaga o, oluk moʼgulhosu wago holuk e, erlagapsogo ukpasu lomup o,” oluk moʼgulentesi.
“Enede Allah pam heʼberik poluk tugulom o,” oluk moʼgulentesi wene
5Asogo egeimu, is osi peragenebesi aʼge ebano en e,
“Nue. Nis nenede Allah ebam heʼberik pege aʼge ano hurle emagoluk logon emin nenanniapnenebemen o,” oluk moʼgulegisema, 6at nonue ʼgain Onuk Logo aʼge ano en e,
“ʼGebi eʼgen owi wei aʼge pelogwi ai ʼgelaʼge, henede an nebam wei nagat heʼberik poluk e, his en,
E musani yu yema en henokho re, ik laut lok omugwema etleba yaklai lak o, oluk moʼgulorogupmu re, hiak esaʼgo holuayat ani o,” oluk moʼgulentesi.
Ue en eragam aʼge moʼguloso wene
7Asogo moʼgulontoluk e, pobuk wene agaikhe emin disogo moʼgulentesi,
“His ap mesik heneragam aʼge heniabuk wasu lemarik de a? Honuam domba wam oʼgonise lemarik a, owan ʼgu agokhweat de,
Hosoʼboru perlene na suk o, oluk moʼgulom epegep? Erlak o. 8We, disogo ogu legep epegi,
An nosoʼboru naduk sakho poluk, soʼboru soʼburentasulat sum ʼbuktogwi aʼge ano ʼbuksogo re, an naduk nouwagoluk woknosoam e, an arat nasu holuk en de, hat no yo, oluk ogu legep ano erlak no? 9Ue ano en eragam aʼge ano,
Disogo tip, asogo tip, oluk moʼgulema aʼge ano nak tiso holuk e, ue en hau worua no? Erlak o. 10His ai ʼgelaʼgeat o,
Disogo tip, asogo tip, oluk moʼgulhontoma ano arat takpoluk e, disogo ogu lomup,
Erlak o. Nis ebam louksogo tumu hau watnonobu aʼge tu erlak. We, heragam aʼge welat tu aʼge nak tige o, oluk ogu lomup,” oluk moʼgulentesi.
Ap enebe 10 yebil hwenaʼgo ʼgelaʼge obabenebegei wene
11Pobuk agauwa mesik erlige re, at Yesus o Yerusalem ʼbiselat, o Samaria ʼbelakholuk, o Galilea likholuk, ʼburl oʼgwe ʼbi laga. 12ʼBiselat e, o seli mesik ʼbisoam e, ap enebe 10 eniebil hwenaʼgo ʼgelaʼge enebetne welaga aʼge en enil Yesus yethegesarik e, enebe walekma eba inlau welegesarik welat e, disogo moʼgulegisa,
13“Yesus nue! Hedeapnenebemen o,” oluk enaik loksogo egesa. 14Asogo egesema, at Yesus en il yerontoluk e, disogo moʼgulentesi,
“His e, ap Allah eiye aʼge ebano en henebetne enil hontouwagoluk, onugentai lit o,” oluk moʼgulentesi. Asogo moʼgulentesimu, is ebano ebelaʼgwe lagaihwe, eniebil hwenaʼgo ʼgelaʼge ebano erlak aga. 15Asogo erlak agama re, ap ebano aʼge mesigat aʼge nak il agap pam ʼgwelakhesi ʼgal e, yebil ebano arat erlak agama re, togolik wagalat, iak loksogoat, Allah erliktil waga. 16Wagarik, Yesus eragam odogorlu pam hurotluk sakhunsogo welat hau weregei. Ap hau weregei ai owi o Samaria aʼge. 17Asogo hau weregeimu, at Yesus en e, disogo moʼgulesi,
“Ap enebe 10 eriano enebetne op nak egesa aʼgeat de, enebe sogo aʼge ʼgeba legesema. 18Is ap enebe Yahudi aʼge togolik wom erlakma en mo ogukhweat de, ap momu aʼge yu nak e, Allah erliktigoluk togolik wagama ai o,” oluk moʼgulontoluk e, 19at ap waga aʼge ano disogo moʼgulesi,
“Demat obapnobua, oluk hede nebam heʼberik pegen ai pam arat obaphebegis o. Holuk e, hebe inotluk howi pam lak o,” oluk perakpesi.
Allah eragam enebasu wene
(Matius 24:23-28, 37-41)
20Asogo perakpesimu pobuk e, is ap Farisi aʼge en e, disogo egesa,
“At Allah en o metnerlige ʼgelaʼge en eragam onobou wema epegen,” oluk hin wegesema, at Yesus en e, disogo moʼgulentesi,
“At Allah eragam enebaigoluk wema ai re, aphwami en logon pobi tuagoluk elalin aʼge mesik enil pam tago erlak oruakhwe wema o. 21At Allah en eragam onobouwa ai, arat heneʼgerlakma lau waga ai en e, is aphwami en,
At ebe demat yema oruak aʼge yu hau manis! ogulat,
Eba oruak aʼge etle hai lit! ogulat, owan u erlak oruakhwe wema o,” oluk moʼgulentesi. 22Asogo moʼgulontoluk, at osi iak wogu legesa aʼge ebano disogo moʼgulentesi,
“An abat daklau wegi ano nin erlige nan erlige pobuk nenemin modok wolomul aʼge owan oruakhweat de, his honogola en e,
Agauwa mesigat paget nenil holo e, oluk asogo epagup aʼgeat de, henil niogwi erlak wolorogup aʼge ano ogo oruagat o. 23Is aphwami en e,
At ano ebe yema oruak o.
ʼGwelakhau manis, ogulat,
Eba oruak ano ʼgwelakhai lit, ogulat, ogwi holuk e, honogola en e,
Demat, oluk henil yethai lagalat, eneʼberlik lagalat, togup o. 24An abat daklau wegi ano weik e, o obinal yebekhasulat ʼbogorl edip-edip etleba modok selak etil-etil lasu ai ʼgelaʼge, wema o. 25Ye, asogo tua aʼgeat de, ai owan tu erlak oruakhwe re, aphwami yogodak oruak aʼge yema en woknobu erlakma en, uknoboluk e, di obotut yu obotut taknobouwa ani o. 26Is aphwami ap Nuh oruakhwe togu legesa eria hegit e, an abat daklau wegi ano pobuk asogoat tugukhwe weik o. 27Nuh oruakhwe, is aphwami eba seni sorogulat ap en hwami wogonobogulat, is nin pema wogontugulat, tugukhwe, ap Nuh ano ik so ogola ʼgwegeimu, ik lok ligagalat, is aphwami ebano perlengsogo warenebegei. 28Ai ʼgelaʼge, ap Lot ano oruakhwe togu legesa ai ʼgelaʼge tua o. Eria hegit e, is aphwami eba onsoʼboru noʼgulat, anggur eʼgen aʼbosu noʼgulat, di aʼge yu aʼge oʼgo ʼbalugulat, wogulat, eniabuk horlugulat, onowi worugulat, tugukhwe, 29ap Lot ano o Sodom ukpoluk liplai lagama re, Allah ʼbogorl pam en odouk de, moru ʼgelaʼge emin, belerang eʼben wiak aʼge emin, ʼbelakpou wagama re, is aphwami ebano enebe perlengsogo warenebegei. 30Ai ʼgelaʼge re, an abat daklau wegi ano pobuk selakmayat weik ai erlige re, asogoat tua o. 31Eria hegit e, an wagokhwe, sa en aʼge o pam poluk e, ebe o dum pam ligemarik oruakma, ebe ʼbu otluk aʼge o pam oruak aʼge ano wa ʼgwilo mia o. ʼBekhirat louwak o. Ye, ap sa en ebe iabukmu oruakma an wagoam pobuk togolik o pam wom miayat o. ʼBekhirat louwak o. 32Ap Lot ugwe takpesi ai henede eberit o! 33Ap sa en uʼgwarek ebe erlele horlouwa holuk, pobuk ebe nal ema o. Aʼgeat de, ap sa en ebe erlele hwerlasu erlakma en, nal ema holuk e, ebe delhorlouwa o. 34Ai erlige re, ap enebe ʼbiren hubaʼgo holiʼbo mesikmu nogogumu re, mesik wasulat, mesik ukpasulat, tua o. 35Ye, hwami enebe ʼbiren soʼboru weraruogoluk gandum eʼgen sagalugumu mesik wasulat, mesik ukpasulat, tua ani o, 36[Ye, ap enebe ʼbiren yabuk worugumu, mesik wasulat, mesik ukpasulat, tuayat o, oluk moʼgulentegis,]” oluk ese lagama, 37at osi iak wogu legesa aʼge ebano en e, disogo moʼgulegisa,
“Nue o! Hat egen ai o ʼgeba en tua aʼge de, egen,” oluk moʼgulegisema, at Yesus en disogo moʼgulentesi,
“Ap werak aʼge oruak holuk e, sue ap werak aʼge noʼgwi aʼge ai odokti lagai o,” oluk moʼgulentesi.
Tans Gekies:
Lukas 17: WUL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
