Lukas 16
16
Ap mesik eragam aʼge en ilmasisogo taga laga wene
1Asogo moʼgulentesirik e, pobuk, at Yesus osi iak wogu legesa aʼge ebano disogo moʼgulentesi,
“Ap ʼgain mesik eragam aʼge en ue en aʼge di aʼge yu aʼge tenak oruakma re, is aphwami nin pema en e, at ue ano asogo moʼgulugulat e,
Hat heragam aʼge ai en e, hat en aʼge ebano modok yogunat ʼbalu-ʼbelasogo tiso yo, oluk moʼgulegisa. 2Asogo moʼgulegisema, at ʼgain ano en eragam aʼge ano worlhasuam wagama re, disogo moʼgulesi,
Hat taga legen aʼge nesaʼgo hwelegis ai re, noʼgosogo taga legenma. Yogodak hat an nowi pam yema welat an naʼge hat tenak wolorogun erlakma re, tenak welat taga legen aʼge pelal wogo aʼge ai ʼbeliʼgogo moʼgulnoroguntik e, woknemin o, oluk moʼgulesi. 3Asogo moʼgulesimu, at eragam aʼge ano ogola en e,
Nue en,
An nowi pam welat naʼge tenak wolorogun erlak. Lebikhebaik, egei ai, an noʼgosogo tik. Lebiknebasu holuk e, an yabuk hwerlasulom e, neʼgik maben. Ye, noʼgonu wiak moʼgulentil denagalom e, neʼgerli. 4Asogo lebiknebasu holuk e, aphwami en an is onowi pam eba woknobuagoluk, an tu aʼge nede eberegis o, oluk ede opoluk, 5is aphwami, at ue ano en aʼge enebam ʼbelak welaga aʼge ebano enebe loʼbok worlentesimu mesik naduk naduk waga aʼge moʼguleselat e,
An nue en aʼge eʼbelak hat hebam meren oruak no, oluk egeimu, 6at ap ano en e,
Minyak zaitun sogoluak lok aʼge ebe 100 naʼgogo nebam ʼbelak oruak o, oluk moʼgulesimu, at en e, disogo moʼgulesi,
ʼBelak hebam ai paget, pelal wogo aʼge yu waguntik e, pobuk pelal ʼget aʼge mesik wasulat e, 50 neʼgak aʼge ʼbelak nebam oruak o, oluk pelal perlenesogo wemen o, oluk asogo moʼgulesirik 7eʼberlik e, ap mesik moʼguleselat,
Hat e, ʼbelak meren hebam oruak, oluk moʼgulesimu, at ap ano en e, disogo moʼgulesi,
Gandum eʼgen ʼbelak aʼge sum ebesik e, 1.000 yagarak aʼge ʼbelak nebam oruak o, oluk moʼgulesimu, at en e,
ʼBelak hebam oruak ai paget, pelal wogo aʼge yu waguntik e, pobuk pelal ʼget aʼge mesik wasulat e, 800 pam ʼbelak nebam oruak o, oluk pelal womup o, oluk moʼgulesi. 8Asogo tegei aʼge ebano, at obok ue ano esaʼgo hwelegeitik e, disogo egei,
Eige! Ede modok ʼgagalak ai nogorlok e, oluk eragam aʼge wiak taga laga aʼge ano erliktegei.
Asogo erliktegei ai re, is aphwami ʼgwiangma yema aʼge enebabut e, is enaʼge tuogoluk enede modok ʼgagalak aʼgeat de, is Allah eiyagai onogola dakharak enebesi aʼge ai, enebabut e, is ʼgelaʼge erlak ai en e, asogo egei yo. 9Ai holuk e, an wene mesik moʼgulhentaik. Henaʼge di aʼge yu aʼge ʼgwiangma aʼge, enilmasisogo wiak togwi aʼge ai erlak ago holuk, honowi op modok wolomma eba wokhonobuagoluk e, yogodak ya henaʼge ai pam henarilak enemin ʼbalirak poluk wolomup o,” oluk moʼgulentesi.
10Asogo moʼgulentesirik disogo egei,
“Sa en weisogo tenak welemagoluk wogogwiam hegitsogo tiso holuk e, lok aʼge wogummu, hegitsogo taga lema o. Ye, sa en weisogo tenak welemagoluk wogogwiam, hegitsogo tiso erlak holuk e, lok aʼge wogummu hegitsogo tua erlagat o. 11Ai ʼgelaʼge, his henaʼge di aʼge yu aʼge ʼgwiangma aʼge enilmasisogo togwi aʼge ai wokhontoma tenak welat, hegitsogo wolorogup erlak holuk e, ebe op aʼge ai eiye welemagoluk sa en wokhontouwa. 12His en ap mesik aʼge hegitsogo tenak wolorogup erlak holuk e, his ogo, honuʼgwarek henaʼge aʼge ai eiye welemagoluk sa en wokhontouwa epegep. 13Ap mesigat aʼge ap ʼgain enebe ʼbiren eneragam welat eniabuk tugulom modok mia o. Asogo welema holuk e, eneragam aʼge ai en,
Naik op on yu nede. Ye, mesik e, wiakma re, nebit, oluk eselat e, ede hwedik aʼge ai eʼbirek nak loʼboksogo welat e, mesik ebit on ano re, apserisogo wolom o. Ai ʼgelaʼge, his en e, Allah eragam aʼge welat, uang eragam aʼge wolom mia o,” oluk moʼgulentesi.
At Yesus en enesaʼgo weregei wene
(Matius 11:12-13, 5:31-32; Markus 10:11-12)
14Asogo moʼgulentesimu re, is ap Farisi aʼge ebano uang modok enede hwedik welegesarikmu no oluk e, Yesus en wene asogo osokhwe enesaʼgo hweligisarik e, eniak sik-seksogo eidarak pegesa. 15Asogo tigisema re, at Yesus en is moʼgulentasulat e,
“An hegitsogo taga legi, oluk aphwami enilem henebabut hegit aʼge ʼgelaʼge togu legep o. Aʼgeat de, Allah en henede modok aluk o. Di aʼge yu aʼge is aphwami en op o, oluk logo pogwi aʼge ai re, at Allah en modok ebit o.
16At Yohanes ik olomu ʼbelabenebise laga aʼge ano owan wom erlak oruakhwe, wene Allah en nenesaʼgo weregei wene ano emin, is Allah iak moʼgulontogu legesa wene ano emin, wene aiat logo welaga. Aʼge re, at Yohanes waga ai hwerli en e, op wene Allah en eragam enebasu wene ano moʼgulentil denagoma, aphwami ʼberlek en wene wouwogoluk enannisogo onuʼgwarek en ning-ning ʼgu agai. 17Asogo ʼgu agai aʼgeat de, ʼbogorl emin, ʼgwiang emin, erlak ema aʼgeat de, wene Allah en nenesaʼgo weregei aʼge ai ologun mesigat nak erlak ema modok erlak o.
18Ap sa en ugwe wogo aʼge lologo ukpoluk pobuk hwe mu aʼge mesik wasu holuk e, ʼbabiat tua o. Ye, ap sa en, hwe ogun en lologo ukpouwa aʼge wasu holuk e, ʼbabi ʼgelaʼgeat wouwa o,” oluk moʼgulentesi.
“Ap ʼgain mesik aʼge aʼbik aʼge emin, Lazarus emin, disogo tigisa,” oluk ebam elitsogo moʼgulentesi wene
19Asogo moʼgulontoluk e, pobuk at Yesus en wene mesik disogo moʼgulentesi,
“Ap ʼgain mesik aʼge modok aʼbik welat e, osum ogo oʼgo lok aʼge op aʼge nak ʼbukhwerlasulat, di aʼge yu aʼge op aʼge eʼgerlakma hialogo welat, nin hwedik nan hwedik ebano ogola agaisogo nak welaga. 20Aʼgeat de, ap mesik ilmu erlak aʼge onuk Lazarus. Ebetne yebil modok aʼbik welaga aʼge, ap ʼgain aʼge aʼbik aʼge ano owi ʼgodukmu eba pou waga legesa. 21Pou wagaiam ʼbourak welat, ogola en e,
Ap ʼgain aʼge ano osoʼboru nasukhwe eʼgen hwelilogo o holumu ʼbisoam odok takpoluk nogumsogo nasulle, oluk epasu oruakma, mene wotluk e, yebil ebetne ebano emage en melanghasulat nasu laga.
22Asogo nasulat oruakma, at Lazarus ilmu erlak aʼge ano waraga. Waragama re, is malaikat ʼbogorl pam Allah en peragonobou wago aʼge ebano logon wegesarik, ebe woluk e, ap Abraham eragam pei legesa. Pei legesema en e, pobuk ap ʼgain aʼge aʼbik aʼge ano watlai laga. Watlai lagama re, ʼgwiangma sebeligisa. 23Ye, ebe re, warotluk lagaimu etleba lagarik modok wik-wiaksogo welat orogole hebeksogo likhesi ʼgal e, Lazarus ano Abraham eragam oruakma il ligentesi. 24Il ligontoluk, iak loksogoat disogo moʼgulentesi,
Abraham naik a! An odouk orlouk lokma yema nonouk aʼbik taga legi yu hede niemen a! Lazarus eʼgik dum ik ogulholuk nemage sakho uagoluk, porlumagoluk moʼgulemin o, oluk moʼgulesimu, 25at Abraham en e, disogo moʼgulesi,
Nomlogo yo. Hat helaluk welat, op aʼge nak nasulat, hwerlasulat, tagokhwe, Lazarus yu nak e, wiaksogo welaga aʼge ano hede eberin o! Ye, yogodak e, at Lazarus yu yema wagarik ogola agaisogo oruakhwe re, hat nak e, nonouk aʼbik hwerlasu legen ai o. 26Ye, mesik e, aphwami nis oruakma yema en hat oruakma eba heʼbek wagalat, ye, his eba en nis neneʼbek wagalat, tuano oluk ʼburl eba ʼbule yat aʼge wogo pesimu oruak o, oluk egei. 27-28Asogo moʼgulesimu, at ap ʼgain aʼge aʼbik aʼge ano en e, disogo moʼgulesi,
Holuk e, naik o! An nowi pam etleba nue nari enebe huaben oruakma re, nonouk tugumu yema wemano oluk e, at Lazarus ai hosoʼbi moʼgulentai louwagoluk moʼgulhese legi o, naik, oluk moʼgulesimu re, 29at Abraham en e, disogo moʼgulesi,
Is eba re, Musa wene ai emin, ap Allah iak moʼgulontogu legesa aʼge ebano eniak ai emin e, tenagat oruak o. Holuk, wene aiat holugulom o, oluk moʼgulesimu, 30ap ano en e, disogo moʼgulesi,
Asogo egen aʼgeat de, ap mesik warotluk lagaimu en elaluk otluk entai loma nak e, enebabut heberlom o, naik, oluk moʼgulesimu, 31at Abraham en e, disogo moʼgulesi,
Is hue hari eba re, Musa wene emin, is ap Allah iak moʼgulontogu legesa aʼge eniak ai emin, enesaʼgo hwelak erlak holuk e, ap mesik warotluk lagaimu en elaluk otluk moʼgulentai loma, is eba onogola en e, demat opoluk enesaʼgo holu miayat o, oluk moʼgulesi o,” oluk Yesus en moʼgulentesi.
Tans Gekies:
Lukas 16: WUL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
