Tutura Rasul 5
5
Ananias pade Safira
1Naria mui hadua balailo, hangana Ananias. Hia hante bangkelena Safira nampobalu hamonta tana. 2Habagia lako oli tana ee mai laipatanina hi hia moto. Popatanina ee mai laincani bangkelena. Pade labina laikenina pade laijujuna i tingoora rasul.
3Naupawee Petrus nanguli, “Ananias, napa pade laiuho Magau Heta raramu, hampena laikalowonimu Inoha to Nagaha pade laipatanimu habagia doi oli tanamu? 4Kapomana tana etu laipobalu, iko motodipi tumpuna. Laipobalumupi tana ee, olina iko moto mui tumpuna. Napa pade noliwo bongoko nobabei ei mai? Moma manuhia to laikalowonimu, Alatala to laikalowonimu!”
5Nangepe to iuli Petrus lauria, nadungkami Ananias kapopola namate. Naeka mpuura humawee tauna to nangepe napa to nadupa hi Ananias ee mai. 6Napu ee narataramo bahangkua dua kabilaha. Laikumuira to mate ee mai pade laikowara rau ratanara.
7Ba maria tolu jaa lako hee, naratami bangkele Ananias. Naupawee moma incanina napa to nadupa. 8Petrus nangulika bangkele Ananias, “Ulika'a, nakono iwee moto kadea oli tana to laipobalumi?”
Nehono bangkele ee mai, “Io, nakono.”
9Iulina Petrus, “Napa pade nahintuwuko hante balailomu nampehori Inoha Pue? Hilora tauna to lako napu nopatana balailomu nokangkore i womo. Iko mui rakowara mehuwu lako hei.”
10Pangepena jarita Petrus, nadungkami bangkele Ananias ee mai i tingoo Petrus pade kapopola namate. Pehuara kabilaha to nopakowa ee i rara hou, lairatara namatemi. Laikowarami rau laitanara i humpii balailona. 11Naeka mpuura humawee tauna to neparahaya hi Yesus pade tau ntanina to nangepe napa to nadupa lauria.
Tanda-tanda pade to nepakahera
12Rasul-rasul Yesus Kristus ee mai nobabei nadea ngaa tanda pade to nepakahera i tingoo todea. Humawee tauna to neparahaya hi Yesus nohangu rara nahiromu oa i Gandaria Salomo i karawaa Hou Alatala. 13Moma naria tau ntanina to nabia nehua dohera tauna to neparahaya hi Yesus ee. Naupawee todea nampabila mpuura. 14Pade kahaa-haea nantambai dola kadea tauna to neparahaya hi Pue, belo balailo belo bangkele. 15Nampahilo to nadupa ee, nadea tauna nangkeni to nadua hante poturuara pade alira nehuwu rau karajaa bona ane moliu i Petrus, nau mambela waona aga, mauriramo. 16Wee mui todea ntanina lako ngata-ngata humpii Yerusalem, nadeara narata nangkeni tauna to nadua pade to laipehua anudaa. Humawee to nadua bo to laipehua anudaa ee mai laipakauri.
Rasul-rasul laibakaha lako tarungku
17Kahuduana nopamulami Imam Bohe hante humawee to pantukuna lako kahiromua to Saduki nokaingku, habana nohiri mpuura hi rasul-rasul. 18Laihokora rasul-rasul ee mai pade laipahuara i rara tarungku. 19Naupawee, ngkawengia hadua malaeka Pue nobea womo-womo tarungku ee mai pade nangkenira nehuwu, iulina, 20“Koimo komi mokangkore i karawaa Hou Alatala pade karebaimi hi todea humawee lolita nangkambelai katuwu to nabou ei.”
21Laituruhira parenta lauria, pade lau hampepulopi rauramo i karawaa Hou Alatala pade nopamularamo nopatudu i hee.
Hamalina ee mai Imam Bohe pade to pantukuna nantudu humawee to Pobotuhi Agama hante totua-totua ngata to Yahudi mahiromu. Napu ee laitudura to nampodoo Hou Alatala rau mangalara rasul i rara tarungku. 22Naupawee karatara to nampodoo tarungku ee mai, momara naria rasul ee mai lairatara ria. Alaana nanculiramo pade nangkewo humawee lauria, 23iulira, “Womo tarungku lairata kami naraha moto katebihokina, pade humawee to nampodoo tarungku naria motora i womo tarungku. Naupawee hangka laibea kami womo tarungku, moma hema lairata kami.” 24Pangepera imam to i matana pade kapala to nampodoo Hou Alatala to laipetumuikara, naingu rarara pade nonepekune napa to nadupa ee.
25Poma nahae, narata hadua tauna nampotomukara pade nangkewo kareba ei, “Epe pura komi! Tauna to laitarungkumi, nopatudu todea i Hou Alatala ee motorada ria!”
Rasul-rasul i tingoo to pobotuhi Agama
26Nangepe lauria, neongkomi kapala to nampodoo Hou Alatala hante ana buana rau nangalara rasul ee mai. Naupawee laiala belo motora apa naekara hi todea, nemo-nemo mei todea mampawunura hante watu.
27Rasul eera mai laikeni i tingoo to Pobotuhi Agama. Pade Imam Bohe namparehara, 28iulina, “Laitagi kami mpuumo komi wei bona nemopa komi mopatudu nangkambelai Yesus. Naupawee, laipotolelemi laumi popatudumi i humangkulili Yerusalem. Moma wuwu ee, lairaimi muipa kami ane kami to nopatehi-'I.”
29Nehonora Petrus pade rasul ntanina ee mai, “Kami kana manturuhi Alatala, moma manturuhi manuhia. 30Alatala, Pue tumpulokota motomi to nampakatuwu nculi Yesus to laipatehimi i kau salib. 31Yesus ee laiongko Alatala mali pangkana-Na nawali to Pangkeni pade to Pepakahalama bona mamalata to Israel mancoro pade ra'ampunimi humawee dohata. 32Nangkambelai humawee lauria, kamimi habina. Kami hante Inoha to Nagaha to laipopewai Alatala hi humawee tauna to nanturuhi-'I.”
33Nangepe lauria, nagigi mpuu rarara tauna to i rara Pobotuhia Agama ee mai pade nahintuwuramo mampatehira rasul ee. 34Naupawee naria hadua to Pobotuhi Agama lako hira to Farisi, hangana Gamaliel. Hia ee mai hadua to popaguru buku Taurat to laibilara mpuu todea. Nokangkore'i pade nantudu to nampodoo tarungku mangkeni rasul-rasul ee mai mehuwu hangoni. 35Napu ee laiulina Gamaliel hi to Pobotuhi Agama ee, “Ompi-ompiku to Israel, timba belo napa to mingki mibabei hi tauna eira mai! 36Apa naria ilodo, narata tauna to ikahangai Teudas, to nangaku ane hia tauna to laipemabohe. To pantukuna ba maria opo atu dua, naupawee hangka laipatehipi, to pantukuna nagaroramo. 37Napu ee, tempo potulihia hangara todea, narata mui Yudas to Galilea. Nadea tauna laidiina nantuku'i nampaewa to poparenta. Naupawee hia mui laipatehi pade nagaro mui humawee to pantukuna. 38Etumo, ku'ulika komi, nemo maria to mibabei hi tauna eira. Palele motoramo. Apa ane patujura pade to laibabeira dota manuhia moto'i, natantu amimi maronto. 39Naupawee ane to laibabeira ei dota Alatala, moma komi mamala mampopentuura. Nemo-nemo mei nampaewa Alatala lau komi.”
Napa to laiuli Gamaliel ee mai laitarimara. 40Lauparia laikio nculiramo rasul ee mai nehua. Rasul eera mai laicambu pade laitagi bona nemorapa mopatudu nangkambelai Yesus. Napu ee laibakaharamo. 41Rasul eera mai nampalahi Pobotuhia Agama ee hante goe rarara, apa i tingoo Alatala nahipatoramo laipopore habana petukura hi Yesus. 42Butu eonara nopatudu pade nangkarebai Kareba Belo i karawaa Hou Alatala pade i hou-hou tauna, ane Yesus eemi Magau to Pepakahalama to laitipa Alatala.
Tans Gekies:
Tutura Rasul 5: MYL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
